في الجانب الأبيض والأسود

part 2

خلصت اختبارها و قامت حطت الورقة على المكتب وثبتتها بأضافرها و تطلعت بالدكتور بنظرة تحدي: تاني مرة لا تلعب معي
و تركتو و مشيت
مسح الدكتور على وجهو و صار يهز برجلو و توجه لعند الادارة..

طلعت مشي عالبيت و بتأسرع لترجع على تختها و مكانها المعتاد،
كانت بتمشي بالشارع و العيون عليها، ببنطلونها الجينز الاسود الضيق و بلوزتها البسيطة السودة
متجاهلة الكل و البرود اساس وجهها، وصلت عالبيت و طلعت المفاتيح لتفتح الباب و تدخل
الأب: اهلين بنتي تعي قعدي معنا
ميرال سكرت الباب و حكت بصوت واطي: تعبانة هلأ بعدين بجي
وطلعت على غرفتها وسكرت الباب
الغرفة المطبوعه باللون الأسود بكل مكان، الجدران باللون الكحلي المعتق القريب للسواد، و التخت بالفرش الي فيه أسود، والأرض و المكتب و الخزانة كلو باللون الأسود
زتت الوراق الي بإيدها و الكتب عالتخت
و قعدت عالمكتب ركِّت جبينها على ايديها و طلَّعت نفس من تمها و غمضت عيونها
دقت الباب بهدوء
ميرال ببرود: مين
روانا: انا
ميرال: روانا تركيني هلأ
فتحت الباب و سكرتو بضهرها
قامت ميرال من مكتبها قعدت عالتخت و شلحت من رجلها
روانا: كيفك ميمي
ميرال: بتنفس
روانا: مضايقه من شي؟
ميرال: لا
روانا: اجيتي و وجهك معصب
ميرال: هففف خلص روانا قلتلك مافيني شي
روانا: طيب براحتك، بس انا رح ضل قاعدة جنبك
ميرال: بدي نام
روانا: اليوم جاية سارة تسهر معنا
ميرال: طيب
روانا: نامي هلأ مشان نسهر المسا، و انا رح قول لبابا يجيب غراض السهرة، بدك يجبلك عصيرك؟
ميرال: واحد بكفي
روانا: من عيوني
طلعت روانا وسكرت الباب وراها

روانا..
الاخت الاصغر من ميرال بسنة، مرحة و بتحب الدنيا و بتحب اختها كتير بالرغم من السواد الي فيها و البرود
عمرها ٢١ سنة، بتدرس بجامعتها، حلمها تطلع اختها من السواد الي هي فيه بحياتها، بس فاقدة الأمل من انها تضحك للدنيا من بعد كل الأحداث الي صارت معاها من الماضي، رفيقة سارة الروح بالروح..

سارة عالجوال: ماشي حبيبتي، اليوم ان شاءالله، لا لا ما عليكي احمد بجيبني
حكت احمد و فتح اخوها الباب و متطلع عليها برفع حواجب و بأشر بإيديه بمعنى شوفيه
سارة: امانة جيب معي شي؟، تمام يقلبي، بشوفك، الله معك مع السلامة
أحمد: شو؟
سارة تربعت عالتخت و حطت المخدة بحضنها: توصلني اليوم عند بيت عمو أيمن
أحمد: ليش
سارة: شو ليش، بدي اسهر مع روانا اليوم
أحمد: اي ساعه؟
سارة: عال٩ ونص او ١٠
أحمد: سوسو ٩ ونص؟ مو عيب تفوتي على بيت عالم ٩ ونص؟؟
سارة: اي هي سهرة
أحمد: ولو حبيبتي ما بصير عال ٩، عال ٧ ونص او ٨ بصير؟
سارة: امممم، طيب
أحمد: و رجعك ١١ ونص
سارة: يييي أحمد خليهم ١ طيب
أحمد: أبو البنت بالبيت
سارة: ما بنشوفو ولا بشوفنا بضل بغرفتو قاعد عالجوال ولا نايم
تنهد أحمد: طيب، عال١٢ بجي برجعك
سارة: تمام