في الجانب الأبيض والأسود

part 15

وقع احمد عالأرض، و ميرال بترجف و بتحط ايدها على مكان الجرح: شش شو صارر
احمد بيتوجع بس بحاول ما يبينلها و بيضغط على وجعو، بيحكي و بيلهت من وجعو: لا، لا تخافي
حاطه ايدها على مكان النزيف و بتتطلع حواليها بتحاول تشوف اذا في حدا مين الي صاوبو
الدم كل مالو عم يزيد و احمد بلش يدوخ شوي شوي
ميرال بتبكي: ستنى، ستنى شوي رايحين عالمشفى
صارت تدور بين جيبو على المفاتيح
احمد بحاول يحكي بس ماعم يطلع معو شي غير الوجع
ميرال مسكت مفاتيح السيارة و صارت توقف و تحط ايدو على كتفها وتسندو و توقفو، بتكتم دموعها و بتحكي: وين وين السيارة
احمد: بال، جنب الش
ميرال: خلص خلص ريح حالك، بس شوي تحمل بس دقيقه
صارت تمشي و احمد متسند عليها، ماسكه ايدو الي على كتفها لا يوقع و الايد التانية على مكان الدم ضاغطة عليه مشان تخفف منو
بتمشي شحط، بتقوي حالها ما تنهار
وصلتو عالسيارة فتحتها و صارت تمددو بالمقعد الخلفي، دموعها عم تنزل و بتشهق بخوف: سمعني سمعني لا تنام، خليك حاطط ايدك على جرحك
و احمد بيتوجع
ركبت بسرعة و شغلت السيارة و صارت تسوق بأسرع مافيها على اقرب مشفى..

روانا بتحكي مع سارة: ولك والله هيك صار
سارة: يعني هو مع ميرال هلأ؟
روانا: اي
سارة: شوفي الخاين قال بدنا نطلع اليوم سوا ههههههه، يلا يارب خير معهم
روانا: لا تزعلي ام السوس، بكرا بطالعك
سارة: ما علينا، تعي لإحكيلك شو صار اليوم
روانا: يي صح فادي، شو صار احكي
سارة: ولي ولي على قلبي، ولك طلع رومانسي وانا مالي خبر
روانا: هههههههههه، احكي نطفتي قلبي
صارت سارة تحكيلها الي صار
روانا: هههههههه عجبتيه بالبجامة واطلالة دب الباندا؟
سارة: تخيلي
روانا: اذا على هيك بضمنلك انو حبك عنجد
سارة: اخخ اخخ يا قلبي على هالخفقات
روانا: يعني صرتي من جماعة مو فاضية عم احكي خاص؟
سارة: يبعتلك سم هيك انا؟؟
روانا: هههههههههه، يا ويلك شوفك بكرا جاية تتدلعيلي، فيدي اخدني وجبلي وحكالي
سارة: الحق علي بحكيلك، دبه
روانا: على سيرة اخدني وجابني، بدي احكيلك شو صار معي المره الماضية
سارة حطت صحن البزر بحضنها: احكي

ميرال بتشهق بدون دموع صارت من الخوف، بتتطلع وراها على احمد و عالطريق: احمد، احمد تحمل باقي شوي
احمد بشد على سنانو من الوجع و الدم معبي مكانو
ميرال بتبكي: تحمل مشاني..

روانا: سمعت صوت غريب من برا
سارة: شو؟
روانا: صوت مسدس او شي
سارة: هلأ بيطلعو العاب نارية كالعادة
روانا: يمكن
سارة: كملي كملي
روانا: و طلعت ميرال وقتها..

نسرين قاعدة بغرفتها: مافي الا هالحل، اني روح لعندك عالشركة، و بعمل حالي بعتذر على كلامي لاختك..

وصلت عالمشفى و نزلت منها بسرعة، ركضت عالطوارئ وصارت تصرخ: حدااا يجيي بسرعةة
شافت ممرضتين بيركضو لعندها، و التالت بجيب التخت الي بينقلو عليه المرضى، صارت تركض لعند السيارة، فتحت الباب بسرعة و شافت احمد مغمى عليه، صارت تتنفس بخوف و تسحبو عليها
اجو الممرضين: هاد شغلنا يا انسه لو سمحتي
بعدت ميرال عنهم و صارو يشيلوه ويحطوه بالتخت، و يمشو فيه بسرعة عالطوارئ، و ميرال بتركض معهم و واقفه عند طرف التخت و ماسكتو
دخلوه عالطوارئ و اجا الدكتور، منعو ميرال تفوت لجوا
وقفت الممرضة بوجهها: لو سمحتي ممنوع
ميرال بتحاول تبعدها: لك بعدي من وجهي
الممرضة بحدة: يا انسه عم قلك ممنوع الدخول لغير الدكاتره
ميرال لفت ضهرها و صارت ترفع شعرها عن وجهها و تتنفس بخوف
الممرضة: خلص اقعدي هون بس يفحصو الدكتور بطلع و بحكيلك
ما سمعت لكلامها ميرال و راحت قعدت عند الكرسي الي قدام الغرفة..