يا عواصف الديار على المعقود

الفصل الرابع

بعد اسبوعين كان عساف عند مربط الخيل حق خويي بدر جاي يشوف سهم ، وبالبيت كان ابو عساف الي يحسب ان عساف يشتغل بالمزرعة وام عايشة تقهويه والبنات حولهم وام بدر معهم
ام بدر: أقول يابو عساف مادام انه مضى اسبوعين على زواج عايشة ماتحس ان شموخ تناسب بدر
شموخ وقفت سالفتها مع أمجاد وكانت عارفه هـ اليوم راح يجي وكلها رجاء أن ابوها يرفض
أبو عساف: والله ماهي شينه وبدر تربا بينا ورجال والنعم فيه ولا وش رأيك يا شموخ
شموخ الي حست بورطه وأمها وخواتها يناظرونها وهم يعرفون انها ماتبيه
شموخ: رأيي من رأيك يابوي بس اني ما أشوف بدر آلا اخو واعذريني ياعمتي
ابو عساف ماعجبه الآمر: ودامه رأيك من رأيي انا موافق وماعندنا اخو ما اخو اخوتس عساف وبس والملكة بكرا ياهياء عطي بدر خبر
وقام وشموخ حست بتنهار صدق وقامت هي بعد ولحقوها رغد وأمجاد ، واما ام بدر فهي تحسبها انها قامت من الحيا وعند ام عايشة جلست مع ام بدر علشان ماتشك
وبغرفة البنات اول مادخلت شموخ إنهارت تصيح وأمجاد راحت تحضنها
رغد: خلاص أهدي انا مدري ورآه ماتبينه ولا برأسك آحد
شموخ رفعت رأسها تخزها: وش تقولين اكيد لا بس أبد مابي اتزوجه وانا أشوفه أخو وبعد مابي واحد من الديرة ابي اطلع واعيش طول عمري بذي الديرة خلاص مليت
وكأن كل بصدر شموخ طلعته وهي تفضفض ، بس ولا وحده من البنات يقدرون يساعدونها ويردعون ابوهم

—

عند ابو عساف كان طالع وجالس مع شيبان الديرة الي بمجلس الرجال وبجنبه ابو سيف
ابو سيف: عسى صلحتوا الإسطبل حقكم يابو عساف
ابو عساف: الاسطبل حقنا؟
ابو سيف: ايي سيف جايب خيل أصيل اسود يقول انه حقكم وان الإسطبل حقه يبي له تصليح
ابو عساف عصب وخاب ظنه ببدر وعرف الحين ليش عساف هادي ووقف أستأذن من الرجال وطلع وهو بأشد عصبيته

—

ببيت ام بدر الي رجعت وشافت بدر يشتغل على سيارتهم وهي دخلت تسوي لهم شيء يشربونه ، بس قطع عليهم طق الباب وراح بدر يفتح الباب وقابله وجهه خاله الي ما يبشر بالخير
بدر: حياك يا خالي أدخل
دخل آبو عساف وجت ام بدر: يالله حيهم ياخوي علامك؟
ابو عساف: خيبة ظني بك يا بدر
بدر: آفا يا خالي
ام بدر: وش مسوي بدر
ابو عساف: انا مو قايلك تبيع الحصان رايح تعطيه سيف وكاذب علي 
بدر نزل راسه وام بدر مصدومة وكمل أبو عساف وبكل غضب: اسمعني يابدر وان كان لي غلاة عندك وتبيني أسامحك اليوم قبل بكرا الحصان ينباع ولا والله ما رضيت عنك
وطلع ابو عساف والتفتت ام بدر لبدر: الي يقوله أخوي يتنفذ يابدر ورضاي من رضا اخوي وكانك تبي رضاي اليوم قبل باتسر تبيعه
ودخلت ام بدر ووقف بدر بين نارين بين رضا أمه وخاله وبين تفرقة سهم عن عساف وطلع هو من البيت وراح مربط الخيل حق ابو سيف وشاف هناك سيف
بدر: سيف
لف عليه سيف وترك الشغل الي بيده: علامك؟
بدر: مو قايلك خالي لا يدري عن الخيل
سيف: طيب وانا ما قلت له
بدر: بس ابوك قاله
سيف: هاه..
وقاله بدر عن سالفة هـ الخيل وطالبه حل
سيف: أسمع أجل رأيي انا ببيع خيلكم لواحد بالرياض وينقله هناك ونخليه فترة عنده لما تهدا الاوضاع وينساه خالك وبعدها نجيبه
بدر: وعساف
سيف: لا تقوله صح بيزعل بس علشان خالك لا يكتشف وبعدين نعلمه
بدر: أجل شورك وهداية الله

—

بالليل دخل عساف مستانس لانه طول عند سهم وقابله أبوه الي جالس ببيت الشعر وملامحه بارده
عساف: مسيت بالخير يبه
وابو عساف مارد ويوم قرب عساف لابوه ابو عساف قام وصفقه
ابو عساف: الحين مسيت بالخير وانا اشوفك مسفهل ذي الأيام
عساف وسع عيونه وشك ان ابوه درا بسهم وتأكد يوم كمل
ابو عساف: بس خلاص راح وان شفتك ذاكره جلدتك
عساف طلع من البيت ركض وابوه يناديه وهو يتمنى ان ماصار الي بباله بس وصل لمزرعة ابو سيف وشاف الشاحنة راحت ومسك سيف
عساف بصراخ: مييييننن فيهاا تكلممم
سيف نزل عيونه
عساف: سيف تكلمم من فيهاا اقولللكك
سيف: سهم
عساف جن جنونه وراح يركض ورا الشاحنه برجلينه واما عن سيف يوم شاف عساف جن ركض لبيت بدر يقوله
بدر: ووين راح!
سيف: على الطريق الي يطلع من الديرة
وراحوا اثنينهم بس ما امداهم طلعوا من الديرة وشافوا عساف طايح على الأرض وراح له بدر رفعه
عساف: راح يابدر رااح
بدر: ماراح
وسيف ناظره: بدر وش تقول أنت!!
بدر: ما اقدر اسكت ياسيف سامحني
وعساف الي كانت عيونه غارقه بدموع وكان يناظرهم
بدر: عساف ابوك درا اني ما بعت الخيل ولا هو ولا امي راضين علي اذا مابعته بس تراها مو بيعه صدقيه
عساف منهد حيله: وش تقصد
بدر: لازم انت تتظاهر قدام خالي انك ماتدري عن الي بقوله سهم بيقعد بالرياض عند قريب سيف لما ينساه ابوك ونجيبه
عساف: يعني مطول
بدر: الله اعلم متى ينسى أبوك وابيك تصبر قل تم
عساف: تم
قالها حزن وضيق على الي يعيشه وهو ضايق من عادات ابوه ان الرجال لازم ما يتعلق بشيء وغيره يروح ويجي بديل
بدر: يالله قم معي
قام ورجعوا بطريقهم ويوم وصلوا الديرة ودعوا سيف الي راح بيته واما بدر قرر يوصل عساف ويوم دخلوا البيت كان ابو عساف بالحوش وتقدموا له وعلى وجهه عساف واضحه ملامح الحزن
ابو عساف: ان ما محيت هالوجه أعرف كيف امحيه
بدر: خلاص ياخالي انا بتفاهم معه
ابو عساف: زين وعلمه كيف يصير رجال ولا يهزه حصان
دخل ابو عساف البيت واما عساف اخذه بدر للملحق وعدل فراشه وساعده ينسدح وانسدح بدر جنبه
عساف: بدر أنت محظوظ
لف عليه بدر: ورآه
عساف: ماعندك اب يعصب عليك ويحرمك من الي تحبه وأمك تحقق لك آلي تبي
بدر: ماتدري يمكن ابوي كان كذا
عساف: بس عندك ام تخفف
بدر: امي أمك يا عساف ولا نسيت اننا ربينا مع بعض
ضحك عساف: وشلون أنسى
بدر: اي كذا اضحك بلا زعل يابو دميعه
عساف عقد حواجبه: انا ابو دميعه يانصاب
بدر ضحك عليه: توك صايح ولا علشانك اخو بنات صاير كذا
عساف ضربه: رجال غصب عليك
بدر وهو يتعدل بسدحته: اي وأضح
عساف قام جلس: شكله ودك تنجلد صح
بدر: خلك الحين وكلمني عن اختك شموخ
عساف عقد حواجبه ورجع انسدح: وش تقول
بدر: امي خطبتني لأختك شموخ وابوك قايل نجيب الملاك بكرا
عساف أستأنس: صدق يعني يابدير بتصير نسيبي
بدر أبتسم لفرحته: اي بس عاد عطني شيء عن اختك
عساف: إذا اعرست عليها عرفتها بس ماراح اخليها بخاطرك وأقولك تراك بتأخذ وحده فلوسها كله على الأسواق
بدر: افا هذي بدايتها
عساف: أمزح بس تراها سنعه واجوديه بس ما ما أمزح في إنها تحب السوق بس الله يتمم عليكم
بدر: امين وتلحقنا
سكت عساف وصار يناظر السقف والتفت بدر عليه يوم شاف صمته
بدر: للحين تحبها
عساف ناظره: مين؟
بدر: من غيرها الي سمت سهم.. نوف
عساف رجع يناظر السقف: مدري
بدر: لا تخفي علي تراك واضح
عساف: ما اخفي عنك بس صدق مشاعري مجهولة وما أذكرها زين تعرف السبب بس خلنا ننام تأخرنا
بدر قام: انا بروح تصبح على خير
عساف: نام هنا
بدر: ما قلت لأمي وأخاف تفقدني مع سلامه
سلموا على بعض وطلع بدر لبيتهم وعساف تلحف وهو للحين يفكر وش مشاعره تجاه نوف بس غلبه النوم ونام

يتبع..