يا عواصف الديار على المعقود

الفصل الخامس

من بكرا العصر كانوا ابو عساف وعساف وبدر بالمجلس ومعهم الملاك وداخل كانت شموخ بالغرفة بانهيارها و ام بدر تنشد عنها
ودخلت عليها أمجاد: شموخ ياروح أختك قومي يالله عمتي بتشوفك
شموخ: تكفين يا أمجاد قولي لهم مابي
أمجاد: صاحية انتي وشلون أقولهم ولو درا ابوي بيذبحك
قامت شموخ وداخلها يحترق وأمجاد حاولت تعدلها وتمسح دموعها وطلعوا وابتسمت ام بدر
أم بدر: يالله حيهم ببنيتي
شموخ بابتسامة مزيفة وجلست بجنب عمتها وام بدر تمدح فيها ، وشوي جاء عساف معه الكتاب وبابتسامة قربه لشموخ وهي ترتجف آخذت القلم ووقعت وزغاريد أم بدر إرتفعت وطلع عساف

—

باليل دخل عساف الي كان توه جاي من المزرعة وشاف خواته وعائشة بعد جايه وجالسين عند النار ببيت الشعر وقرب لهم
عساف: مسيتم بالخير ياخوات عساف
أمجاد الي دوم هي الأولى بترحيب بعساف: يالله انك تحييهم
جلس معهم: ماشاء الله جلسة عامره وعواشه معنا
عايشة: تسلم ياخوي
كانت شموخ مستغربة من عايشة وهي كانت باردة تجاه عساف اما أمجاد فهي غاسلة أيدها منها
رغد: ما أشوف جبت لنا شيء
عساف دقها بإصبعه: ولا انساكم بعد يأم بطين
وطلع من الكيس مسليات وعطاهم وقاموا يتهاوشون على وش ياخذون وعساف ضحك عليهم بالبداية وبعدها سرح وهو يناظر النار وهي تتآكل وعائشة نظرته
عايشة: علامك ياعساف؟
عساف قام وأبتسم: ولا شيء بدخل أنام ولا تتاخرون بالسهر ونامن
البنات بين: ابشر ، وان شاء الله
ودخل عساف الملحق وانسدح وهو يفكر بالي صار يسمعه بالديرة بعد خبر ملكة اخته شموخ ، وهو إنه خواته اعرسوا وهو أكبرهم باقي ومنها قاموا يشككون به ويقولون به بلاء
وألتفت على جنب يحاول ينسى وينام

—

باليوم الثاني قرروا بدر وسيف يكشتون ومنها يحللون اخر ايام العزوبية وقرروا هالمرة معهم عساف..
بدر: وانا طالبك يا خال يجي معنا وحنا مو مطولين اليلة بنجي
ابو عساف كان مانع عساف من الكشتات والبر والعذر ولده الوحيد ومايبي ياذيه شيء
بدر: وحنا مو مبعدين وعساف بعيونا لا تخاف
عساف كان معهم عيونه كلها امل وخايف يرفض أبوه وينكسر وابو عساف التفت يشوف لهفت عساف وهي كلها يوم
ابو عساف: رح ياعساف وامنتك عليه يابدر
عساف أستأنس اول مره يوافق أبوه ومن الفرحة بغى ينط على ابوه يبوسه بس هداه الله وباس راسه
عساف: مشكور يبه
وطلعوا وعساف مستأنس مره وبدر يضحك عليه
بدر: خلاص اركد بتروح بتروح
عساف وعيونه طايره ودنيا مو ساعيته : تخيل يابدر اول مره يوافق اول مره أطلع مكان يبعد اميال وابوي مو معي علشان يتفقدني ويحسسني بزر
بدر: انت مو بزر وكل هذا خوف خالي عليك
عساف: جرب خوفه والله انك تحس بالموت البطيء
بدر: بسم الله عليك ويالله لا نتاخر على سيف
وطلعوا وكان سيف ينتظر وشافهم وهم جايين يضحكون
سيف: ماشاء الله تضاحكون وانا لاطعيني هنا
بدر ضحك: اسفين اسفين يالله نمشي
وركبوا سيارة بدر وطلعوا من الديرة