يا عواصف الديار على المعقود

الفصل الواحد والعشرين

بالمزرعة بعد المغرب الجو بدا يبرد آكثر ووقفوا بيدخلون بس داهمتهم ام عايشة الي جت شايشه ورغد ورآها لاحقتها
ام عايشة بعصبية: صدز انتس ما تستحين مو كافي انتس على ذمته مناديته عندتس!
ابو عساف عصب خاصتاً انها هجمت وزايد الي صد بعيد يوم دخلت موجود وصرخ: اقصري حستس يامره!!
ام عايشة: وش اقصر وش أخلي ناسي شرطك ولا مانسيت
ابو عساف عصب اكثر وهو ما يحب من يعلي صوته على صوته ، وخلاص الليلة ما راح تعدي على خير
رفع اصبعه بتهديد: اسمعي يامره انا عديتها مره ومرتين بس الوضع زاد عن حده يا تحطين عقلتس براستس ولا عرفـ..
ما كمل كلامه الا وأمجاد جايه ركض وحالها مبهذل مع عبايتها وهي تصيح وتنادي
أمجاد: يا يمههه يبههه عسااف الحقوا عايشة بتولد
صبت عظام آبو عساف ، وام عائشة على حافة الانهيار ، آما عساف استجمع قوته وراح شغل السيارة الي كانت مركونة من قبل بالمزرعة
عساف بحزم: اركبوا بسرعة نلحق عليها
ركب ابو عساف جنبه وام عايشة ورغد وأمجاد وام زايد ورا ومشوا ، وبنسبة لزايد فـ راح رجليه لبيت بدر

—

ببيت ابو عساف دخلوا وكانوا يسمعون صراخ عايشة من الغرفة وصياح شموخ ، ودخلت عليهم ام عايشة والبنات
أمجاد وهي تصيح: وش نسوي بتولد
ام عايشة ركضت لعائشه وهي تكلم أمجاد وداخلها رعشة كبيرة خوف يخسرون الإثنين: اعجلي يابنت ونادي ام سيف بسرعة
أمجاد: ام سيف مو موجودة بالديرة!
ام زايد كانت وراهم ومعهم ومتوتره من توترهم ، بس كان لازم تتدخل لازم تسوي شيء ، دفتهم وراحت لعائشة
ام زايد وهي تعدل وضعية عايشة وتكلم أمجاد ورغد: جيبوا ماء دافي بسرررعههه ومناشف
ام عايشة وهي تبكي: وش تسوينن؟؟!!
ام زايد: إذا تأخرنا بيروحون منا بولدها
أخترعت ام عايشة وخافت آكثر على بنتها: تبين تنتقمين مني بنتي؟؟!!!
وقفت ام زايد مصدومة من ردها ونوايا السوء الي تظنها لها بس صرخة من عايشة افاقتها: مو الوقت الي ارد عليتس
جو امجاد ورغد وابتدت ام زايد تولدها..
وبرا كان عساف خايف على اخته من خوف أبوه ورايحين جايين من عند الباب ينتظرون بشارة خير ، وفجأة صرخة قويه من عايشة الجمتهم كلهم برعب وام عايشة انهارت ورغد ماسكتها ، وأمجاد قاعده تساعد ام زايد ، وبنسبة لشموخ فهي طلعت من قبل لايبدون من الغرفة وجلست بصالة بدوار فضيعة
وقطع جوهم المشحون صوت البكاء ، صوت بكاء رضيع عم البيت وكأن الحياة توقفت عندهم
ابو عساف من هول الموقف: لا آله الا الله الله اكبر والحمدلله!!
عساف وعيونه مغورقه: الحمدلله الحمدلله حمدًا كثيرًا يارب لك الحمد
طلعت لهم أمجاد وكانت هي بعد منهارة لكن بنفس الوقت مستانسه
أمجاد بفرح: أبشرك يايبه ولدت عايشة وجابت بنت
ابو عساف: الحمدلله الحمدلله الذي لا يغادر سقما ، الله يبارك فيها ويجعلها قرة عين والديها
أمجاد وعساف: أمين يارب

—

بالغرفة شالت أم زايد المولودة وحطتها بحضن عايشة الي كان تعب الولادة واضح عليها ، لكن هونها النظرة لمولودتها
ام زايد بابتسامة: يازينها ما شاء الله الله يجعلها صالحة وباره بوالدينها
ام عايشة كانت ورا ورغد جنبها كانت تناظر لظهر ام زايد الي تعتني بعايشة وتركت دين عظيم برقبتها
ام عايشة بهول: أنتي تركتي دين برقبتي رغم الكلام الي قلته لتس!
ام زايد لفت عليها وما تضايقت منها بالعكس كانت مبتسمة: افا يأم عايشة الي سويته قليل في آنك اعتنيتي بعساف طول السنين ، من حقي ادي واجبي هذي أخته قبل لا تصير أي إنسانه أساعدها
انهلت دموع ام عايشة وطاحت على ركبها: ياولي من الله ، ياويلي من الله ، هذا وانا ماسويت خير له ياربي يالله انك تسامحني
ام زايد كانت ضايقه من ذا الشيء لكنها راحت لها مع ابتسامتها الي تجرح بقلب ام عايشة زيادة ورفعتها عن الأرض: ادري بعساف انه مسامحك ومحللك وجيت خواته هو خير له صدقيني
ساعدتها أم زايد تجلس على جنب والتفتت لرغد: روحي ناديهم
رغد أنطلقت وقالت لابوها وعساف يدخلون، واول ما دخلوا طاحت عيونهم على الصغيرة الي بحضن عايشة
ابو عساف شالها: لا اله الا الله بسم الله عليها ان شاء الله يجي أبوها بسلامة بدري ويكبر بإذنها
عايشة: يبه ثامر يبيك انت تكبر بإذن مولودنا الاول
ابو عساف رفع رأسه يناظرهم متردد ويوم شاف عايشة تناظره بابتسامه وافق يكبر بأذنها رغم انه يبي من أبوها هو الي يكبر باول مولود ، رفعها ابو عساف وقرب من أذنها
ابو عساف: الله أكبر، الله أكبر، الله أكبر، الله أكبر، أشهد أن لا إله إلا الله، أشهد أن لا إله إلا الله، أشهد أن محمدًا رسول الله، أشهد أن محمدًا رسول الله، حي على الصلاة، حي على الصلاة، حي على الفلاح، حي على الفلاح، الله أكبر، الله أكبر، لا إله إلا الله
بعد الآذان في الإذن اليمنى ، اقام بالأذن اليسرى وبعد ما أنتهى عطا البنت لأمها وطلع وكلهم تعجبوا انه طلع كذا بصمت ، وعساف لحقه وشافه بالحوش كان يمسح دموعه
موقف هز عساف خاصتاً آنه آول مره بحياته يشوف أبوه يصيح ، أما ابو عساف فكانت دموع فرح لأول حفيدة له وشعور جياشة اجتاحته

—

اليوم الثاني كان بيت ابو عساف مزدحم بالي جو يباركون وثامر وأهله جو وابو نوف بعد جو من الشرقية وهالمرة محملين بعفش كثير ونيتهم يجلسون لما عرس رغد
عند الحريم كانت نوف جالسه بزاوية مع شموخ ورغد بعيد عن زحمة الحريم
نوف: يالله عاد متى دوري واشوف البنوته
رغد: انا ماشفتها من الصبح هذا وجهي إذا قدرتي تشوفينها
نوف: طيب تصرفي جيبيها
رغد: لاحقه بتشوفينها بعدين الحين سولفي لي وش سويتي وش ما سويتي لنا أربع شهور ماشفناك
شموخ ونفسيتها ماش: صدز وبتندمين ليا شلتيها بسم الله عليها أمس جت وماغير تصيح
نوف: ماشاء الله الله يعينكم شكلها بكاية من الحين
رغد بضحك: شموخ كانت بتنحاش لبيتها الفجر من الصياح بس الله هداها
شموخ وقفت: اي وانتي مكبره المخده ولا تحسين بروح أرتاح  ازين
نوف ورغد كاتمات الضحكة: الله معتس
بعد ما راحت التفتت رغد لنوف: إيه اسلمي
نوف قلبت عيونها: وش اقول ما عندي شيء
رغد رفعت سبابتها قدام وجهها: كذابه عندتس ولا وراه قلبتي عيونتس
نوف بابتسامة مخبيه شيء: بتعرفين بعد العرس
رغد ضربت رأسها: لاا قولي والله ، يالخبلة وشلون بدري وانا مراح اكون بالبيت
نوف: وش بتس عجلة بتعرفين بعد العرس ، يعني بعد العرس مهب جايه تسلمين على أهلتس اهجدي!
رغد: ترى إذا دريت آنه شيء ما يستاهل لا تبكين ليما كفختس
نوف بتأفف: زين زين
شوي وجتهم أمجاد وهي منهد حيلها توجب ، وضربتهم ثنتينهم على رأسهم وجلست وسطهم
أمجاد: الحين يوم انكن جالسات تهرجون فاضين وراه ماجيتوا تعاونوني
نوف: انا عن نفسي كنا ماسكين خط ومقصره حيل
أمجاد لرغد: وست الحسن والدلال
رغد: وانا بعد مقصره أمس ولدت وحده ومافيني حيل
أمجاد: يا سلام الي يقول كنتس سويتي شيء ، بس مايخالف ينتظركم المواعين
وقامت من عندهم قبل يتحلطمون فوق رأسها

—

بمجلس الرجال كانوا العيال قايمين بالواجب ويقهوون وثامر كل ما مار من رجل بارك له وبدوا الرجال ينادونه أبو خُزامى "مولودة عايشة وثامر"
ثامر بجهور: الله يبارك فيكم جميع وجعلنا نحضر أفراحكم
ابو عساف كان يناظره بفخر وما غلط يوم خلاه يأخذ بنته وهو متطمن وشاف فيه الرجال الكفو ، وعاد عايشة ما قصرت مدحته كثير وكيف حسن تعامله معها وهذا الي زاد معزته بقلب ابو عساف
زايد مر على عساف وربت كتفه: مبروك صرت خال
عساف الي كان طاير ببنت عايشة: الله يبارك فيك اي والله ان الدنيا طايره بي
بدر كان جنبهم ومستانس لعساف مره: ريض ياخوي بتصير خال للمره الثانية قريب
عساف: اههخ بس الله يجيبه بسلامة

يتبع..