يا عواصف الديار على المعقود

الفصل الثاني عشر

على الغداء فوق طاولة الطعام كان عساف جالس جنب أمه وهي تغرف له من الغداء
ام زايد: امي عساف أحط لك سلطة
هز لها عساف رأسه بـ اي وهو للحين ما تعود يحاكي امه ، وهي بعد ماحطت له الغداء حطته قباله
ام زايد: يالله سم
بعد ماسمى عساف بدا ياكل وام زايد مانست زايد ومدت يدها
ام زايد: هات صحنك يمه اغرف لك
زايد: انا بغرف لي
أبو زايد: بسك تغرفين للعيال اغرفي لنفسك اول
ضحكوا وشالت صحنها تغرف لها: ياحبك لاحراجي
أبو زايد رفع يدها وباسها: آسف وتسلم هالايادي
كان عساف يشوف الحب الي بين ابو زايد وام زايد وجلس يفكر لو كان ابوه محله أبوه وهو وأمه عائلة جميلة ، ايش الشيء الي فككها وضر أصحابها..
ام زايد: عساف علامك
وعى عساف على سرحانه وابتسم: ولا شيء الغداء لذيذ
أم زايد استأنست على المدح: ياجعله هني يامي

—

بديرة كانوا بعد ابو عساف وأم عايشة والبنات يتغدون وام عايشة فرحانه من عدم وجود عساف
ام عايشة: يازين الهدوء
ابو عساف مافهم مقصدها: اي والله انتس صادقه بس ناقصنا عساف
ام عايشة ودها تصارخ بس علشان تحافظ على بيتها سكتت ورغد تكلمت: يبه عساف لين متى بيجلس بالرياض
ابو عساف: والله مدري بس يقول انه مو مطول الله يحفظه ماحب طرق السفر
ام عايشة بداخلها: ياعساه مايرجع
وأمجاد لابوها: صادق يبه هـ الطرق تخوف الله يصلحه عساف كان جلس وقال لأمه تجي
ام عايشة عصبت: وين تجي!
والتفتوا عليها وتحمحمت وناظرت رغد وأمجاد بحده: أقصد بدت دوريات حريم الديرة مانقدر نفضى نضيفهم
ابو عساف قام: صادقه امكم انتم بس أدعوا له يرجع بسلامة والله حافظه وانا عاد بروح لابو سيف
وبس طلع لفت ام عايشة بغضب: صاحية انتي وش يجيبها
أمجاد: بس يمه قلت علشان عساف ما يقعد يمتر الطرق
ام عايشة: متر الطرق ولا ما متر بقلعة تقلعه واسمعيني يا أمجاد او انتي يارغد ان جبتوا طاريهم بتشوفون شيء ما يسركم
قامت أمجاد وما أعجبها كلام أمها ورغد لفت لأمها: على الأقل كان خليتيها تكمل لقمتها يمه
ام عايشة: بتغثيني قومي معها
وعلشان رغد ام بطين قررت تسكت لآجل بطنها بس

—

بالرياض كانوا جالسين بصالة بعد الغداء ويحلون على الفاكهة وزايد فارش الأوراق قباله ويوريه ابوه
ابو زايد: طيب قدمت على العسكريه؟
زايد تنهد: الله يسامح الي ورثت منه طولي مايسمح
ضحكت عليه ام زايد: اعذرني ياولدي لإنك ماخذ طول خوالك
زايد بصوت عالي: الله يساااامحهممم ويسامحك يايمه
آبو زايد: طيب الشركات وش صار على تقديمها
زايد: رفضوني
أبو زايد: ابي أعرف انا انت ماخذ شهادة إدارة اعمال على ايش بالله
زايد: تسألني انا يبه مدري عنهم
عساف قرر يشارك: أجل انا عندي أقتراح
زايد: غرد وانا اخوك غرد
عساف: تعال معي الديرة واشتغل بالمزرعـ..
زايد: ستوب! اعذرني يا عساف ديرتكم حلوه وشغلها حلو بس ابد ما تناسبني خلها هواية احسن
ابو زايد لسعه بسبحة: هذا جزاته يقترح لك
زايد: بس يبه تخيل انا وديره ما نجتمع
ابو زايد ألتفت لعساف: تبي الصراحة يا عساف وهو صدق ما انصح تشغله معك بيدمر شغلك
عساف: واضحة يا عمي
ام زايد : بسكم عن ولدي وان شاء الله يحصله الوظيفة الي يبيها
زايد: ايي يمه عطيهم
وقطع مناقرتهم أذان العصر وطلعوا الرجال سوا للمسجد ، وبعد الصلاة رجع ابو زايد البيت وزايد سحب عساف معه
عساف: وين يالخوي
زايد: ان جلسنا بالبيت بنموت من الملل تعال نروح النادي
عساف: اذا انت ما يناسبك المزرعة ترى انا ما يناسبني نادي وحديد
زايد: اخص تعرف لنادي والحديد
عساف: ابي افهم وش تحاسب الديرة انت ترانا معكم مو بالصحراء
زايد: اي كذا احسب الصراحة
عساف: اجل وانا اخوك غلطان
زايد: وانت بعد غلطان عن نادينا
عساف: اجل علمني
زايد: تعال وتشوف
راح معه عساف وهو مسافة طريق بالسيارة ووصلوا وهو أصلًا مو بعيد وعلى طول توجه زايد للإسطبل وعساف وراه
زايد: هاه وش رأيك
عساف بابتسامة يوم شاف الخيل: وتسأل بعد انت جبتني لشيء الي احبه
زايد: اجل تعال اوريك الأحصنة وفيه حصان يهبل عاد حجزته قبل
وراحوا بس تصنم عساف يوم شاف ذاك الحصان الأسود والاصيل ، وسهم ما كان يختلف عنه وبدا يصهل بصوت عالي ويدف الحارس الي ماسك لجامه وبس تركه الحارس ركض سهم لعساف وعساف استقبله
عساف اخفى وجهه برقبة سهم: يا مرحبا ي سهم
زايد كان يناظر متفاجئ وجاء له نوح وهو قد شاف الموقف
نوح: السلام يالخوي
زايد: وعليكم السلام
نوح اشر براسه لعساف: وش السالفة مو ذا أخوك الي بديرة
زايد: الا هو اما سالفة الحصان علمي علمك
أبتعد عساف عن سهم ببتسامه ويمسح على رأسه وسهم يصهل بفرح على لقاء صاحبه وقرب زايد لعساف
زايد: واضحة من اللقاء انكم تعرفون بعض
عساف: هذا رفيق دربي السهم ومن غاب شانت نفسي واخلاقي وعزز الله ان في لقاك طال ياصاحبي
زايد: علشان كذا عرف صاحبه
عساف: اي والله يا انه احيا روحي
زايد: تبي تركبه
عساف: تكفى
وراح زايد ينادي الحارس علشان يضبط سهم لعساف

—

وبالديرة وببيت ام بدر كانت شموخ تعاونها وتدخل لها الخيط بالابرة
شموخ: وهذاني ياعمتي دخلته
ام بدر وهي تضحك: جزاتس الله خير يابنيتي عاد ذا القميص جابه لي بدر وطويل يسحب يبي له تخبين
شموخ: تبين اسويه لتس ياعمة
ام بدر: لا انا بخبنه*بخيطه* مابي اتعبتس وانتي امسكيه
شموخ وهي تضحك: اي تعب ياعمة
مسكته شموخ وبدت ام بدر بدت تخيط ودخل عليهم بدر وأبتسم لهم
بدر: مسيتم بالخير
ام بدر: الله يمسي عليك بالنور عسى عاونت خالك
بدر: اي وخلصنا شغل المزرعة وطلعنا لمجلس الرجال
ام بدر: قواكم الله
بدر: شموخ جزاتس الله خير جيبي لي ماء تكسرت رجليني
قامت شموخ تجيب له ويوم ارتوى كمل: الله يعافي عساف صدق كان صبور
شموخ: وراه
بدر: انا بس يوم واحد وتعبت عاد وشلون عساف الي كل يوم يروح هناك
ام بدر: ياقليبي عليه يا عساف حليل ما يقول شيء
شموخ الي صدق شهدت على ذا الشيء: اي والله صدقتي ياعمه
ام بدر: عاد ما دريتوا عن وضعه هناك بالرياض لا يضيع
ضحك بدر: الله يذكرك بالشهادة عاد انا كنت باتصل
وطلع الجوال يتصل وحاط سبيكر لان امه وشموخ قطوا معه وماهي الى ثواني وجاه صوت عساف
بدر: آوه ارحب يا آهل الرياض
عساف: يامرحبا يا أهل الديرة
بدر: أخص اشوفك مسفهل ماودك تجي
عساف: كانت النية اسير وارجع الليل بس مادريت انهم بيربطوني ثلاث ليالي
شموخ: يعني مطول
عساف: ارحبي يا أخت عساف لا بحاول آجي بكرا وان ما قدرت بعده إزعاج الرياض مايمزح
ام بدر: يقولون لك من عاش على الهدوء ظن أن الازعاج كمين
ضحكوا شموخ: لا يا عمتي عكستي المثل انتي
ام بدر: صدز
ورجعوا يضحكون ورجع قالوا عساف: عاد ماقلت لكم على المفاجأة الي صارت قبل شوي
بدر: قل يا عوين أخوك
عساف بفرح: شفت سهم! تخيلوا عرفني يا إنني مشتاق له بالحيل وكنه كبر شويات
كانوا الباقين مو معه وبينهم نظرات خايفين من ردة ابو عساف لا درا

يتبع..