ماكان ودي انزله الحين وكنت ابي اكمله بس لكثره الطلب اني انزله الحيينن نزلته ، قراءه ممتعه حلويني .
-
"عند قصر الجد ابو طلال "
بدو يصحون والكل دايخ من زواج امس كااانن متعبب بس كل التفاصيل حلوه كالعاده
تجمعو على الفطور العيال والعمام ومتوسطهم الجده والجد ومن داخل حريم العمام والبنات وحريم العيال
عند البنات
روان : الريم مابتجي اليوم
الجده : بنمشي الديره اليوم وقلنا تجي بعد ماترتاح
ام مشعل : افضل لها بعد
ام بندر : عسى ابو مشعل حصل شي
الجده : والله يابنيتي باقي يدور بس باذن الله بيحصل
ام الواليد : ان شاء الله
الجده : اقول يا اديم جهزتي شي لعرتس
اديم بغصه : اي اي خلصت
الجده : الله يوفقتس
ام اديم : امين ونشوف بهاج معرس يارب
الجده : ايييه يابهاج الله يهديه بس
الكل : امين
اديم : غناكم الله
الجده : ماكلتي يابنيتي
اديم : الا ياخاله كلت
الجده : بالعافيه
اديم : يعافيتس وقامت راحت ورا البيت وهي تمسك فمها تمنع شهاقاتها ودموعها تنزل
عند العمام والعيال وتو بهاج يدخل
الجد بعصبيه : انت وينك لا جيت تصلي والحين توك تدخل على الفطور
بهاج ببرود : صليت بالمقلط ماكان فيني قوه اقوم اصلي بالمسجد
الجد : من المناهق باليول ورقاد بالنهار بس انا قايل برجع اربيك من جديد
بهاج وبدت تطلع عصبيته : هذا كلامك يايبه كل ماقلت شي طلعت فيني عذروب
الجد : انا ماطلع الا فيك يالخبل
بهاج وهو يرفع صوته : ايييييه يبه هذا انت تبيني بس اشتغل وامشي معك سيده ماشوفك قلت لفلان ولا علان مره بس وليدي بهاج يشتغل دايم بهاج نايم ودايم بهاج وبهاج يبه مو كل شخص تبيه يمشي معك يمين يمشي معك الواحد يتعب من الشغل ولا كل واحد بيدوم معه قوته وشغله نفس اليوم وكل شخص يتغير
الجد بعصبيه : يالي ماتستحي ترفع صوتك علي
ابو مشعل : يابوي هد
الجد : وين اهدي وذا السلوقي عندي
بهاج وهو يرجف من عصبيته : طبعا انا السلوقي بس عيال الناس وييينننن كانهم ملاك بعيون ابوي
الجد وهو بيرفع العصا مسكه ابو بندر : يبه بهاج موب بزر تطقه
الجد : وخره عني لا اكفر فيه
اخذوه العيال بالقوه وبهاج يرجف بشككل من عصبيته وحرته وده يطلع الي فييه بس مو قادر
الواليد وهو يعطيه المويه : اشرب وهد
خبط المويه بالجدار وهو يقول بعصبيه : دقو على يزيد
فيصل : انت خبل يزيد مع مرته وش يجيبه من صبح ربي
بهاج وهو يصارخ وينتفض : دقققو على يييزييييد !
فهد دق على يزيد ورد : يزيد تعال الحين
يزيد بخوف : شفيكم
فهد : بهاج تهاوش مع جدي ويبيك
يزيد : ليه
فهد : تعال الحين قبل يسوي بنفسه شي
يزيد : طيب وقفل
الريم : شفيه
يزيد : لاتخافين يعيني تعرفين بهاج وجدي
الريم ببتسامه : تمام انتبه لك وطلع يزيد وهو يستعجل ويسرع
وصل يزيد ونزل ودخل لهم
يزيد : اطلعو برا
بندر : ليه
يزيد : يلا عاد
اطلعو كلهم باقي بس يزيد وبهاج
يزيد : شفيك
بهاج : ابوي يايزيد ابوي
يزيد : بهاج كم مره قلت لك تجااااهل افهمني وتجاهل
بهاج وهي تدمع عينه : عرسها الاسبوع الي بيدخل وش اسوي
يزيد وهو يخلي راسه على رجوله : يعين ابوي تصبر وانا اخوك تصبر
بهاج : ماعاد بي حيله والواضح انها راضيه
يزيد : يابهاج النصيب
بهاج شهق وهو يدفن راسه بحضن يزيد : تكفى طلبتك سو شي طلببتتك
يزيد : ماعاد به حل وانا اخوك نصيبها وجاها
بهاج : يزيد انا طالبك
يزيد : ابشر بحاول بس قم الحين وتعدل
بهاج قام وهو يمسح دموعه بطرف شماغه : وابوي
يزيد : قم وتعذر منه يلا
بهاج : ابوي قاسي
يزيد : عشاني هالمره
قام بهاج وهو يلف شماغه بطريقه العوامه ويزيد كان لابس ثوب بني وشماغ ابيض فاااتح طلعو برا وكان الجد وابو اديم والعمام والعيال كلهم بالحوش
جاء بهاج وحب راس الجد ابو طلال : العذر والسموحه منك يايبه
الجد سكت ورفع راسه : اقعد
بهاج جلس وجاء بعده يزيد وسلم على الجد : شلونك جدي
الجد : بخير وش جابك ووين مرتك
يزيد : جيت اشوف بهاج تعبان وبرجع لها الحين
الجد : وماعندك شغله الا بهاج؟
يزيد : لا ياجدي بس قلت لك كان تعبان
الجد : طس عن وجهي
يزيد صد وهو شايل بخاطره من اسلوب جده ذا الفتره صاير مو زيينن ابداً ويرمي الكلمه ولا يثمنها بس بالنهايه اعذره لانه كبير سن وكل كبير سن كذا ركب سيارته وتوجه لبيته
"غلا ، خالد "
ركبو الطياره وكان غلا جمب الشباك وخالد جمبها
غلا : خالد
خالد : لبيه
غلا : ايش الورقه
خالد : قفلي الموضوع ولا تجبين طاريه
غلا : بس خالد ياخي
خالد : شقول انا؟؟
غلا صدت بزعل : طيب
خالد : انتِ الي اجبرتيني اكلمك كذا قلت لك قفلي الموضوع
غلا سفهته
خالد : ياعمريي الزعلانه
غلا دمعت عيونها
خالد : لا لا يابابا ماتفقنا نبكي
غلا : انت عادي ماتقول كل شي بس انا لو سكت ذبحتني
خالد وهو يبوسها : ويزيييننن الي يعاتب والله
غلا بعصبيه وبدموع وهي تمسح خدها : لاتبوسني خير
خالد : كيفي
غلا : مو بكيفك
خالد رجع يبوسهاا بعناد : اجل بكيفك؟
غلا وهي ترجع تمسح خدها : يابزر
خالد : شف من البزر ونونو
غلا : انت النونو البزر طيب
خالد رفعها بحضنه : اشش بنام
غلا بحراج : خااالد نزلنييي يابزر خلني
خالد وهو يسند راسه براسها : شقول انا
غلا : خالد شوف والله يطالعون
خالد : بنتي وبكيفي شدخلنا فيهم
غلا : ماني بنتك
خالد : الا بنتي
غلا بطفوله : خالد اذا وصلنا خل نروح الالعاب نلعب
خالد : شفتي انك نونو؟
غلا وهي تضربه بخده بخفيف : اففف منك
خالد باس يدها الصغييييره مره : من عيوني وش تبين بعد؟
غلا : اممم ناكل ايسكريم ونروح البحر
خالد : بس؟
غلا : ابي ايباد نتابع فيه فلم
خالد : غلاا وش كثير كذا
غلا بدلع طفولي : خاالد والله بس شوي
خالد وهو يداعب خشمها الصغير : من عييوني
غلا سندت راسها على صدره : بتصير تروح الجامعه وتتركني لوحدي
خالد وهو يسمح على راسها : لا ياحبيبي عندك العامله
غلا : اخاف منها
خالد : حبوبه ماتسوي شي
غلا غمضت عيونها : خليك ماعاد تروح
خالد : عندك مابروح
غلا : ماتوديني عند بابا
خالد : اذا وديتك يعني انا خبل
غلا ضحكت بنعاس ودخلت بنومها وكانت طفله بيدين خالد
"الرياض بقصر الجد "
بدو الكل يرتبون الاغراض بيمشون الديره وكان الجد بكامل روقانه وماتخلى من تدقيقه على شغل العيال
فهد : جدي وشوله ذا الروقان غريبه
الجد : والله وانا ابوك بروح الديره ديرتي فيها اهلي وناسي وربعي وش ابي برياضكم مافيها الا الخراب
الواليد وهو جاي بدفاشه : قلنا جدي بس ماقلنا تغلط على الرياض
الجد : اقول تقلع عني بعد ماعاد باقي الا وغد ويعلمني
( تقلع = بعد ، وغد = طفل )
الواليد : افاااا يابو طلال ماهقيتها
الجد : رح شف اهلك خلصو ولا لا طولنا بياذن العصر مامشينا
مناف وهو جاي : يلا يلا ركبنا
الجد : وين ام طلال
نايف : مشتاق لها اعترف
الجد : ان خبطت فيك الجدار عرفت شلون اشتاق لها
نايف سكت وهو كاتم الضحكه
ركبو كلهم بسيارتهم وكل سياره تمتلي بالضحك والسوالف
