بعد ماصلو رجعو لقهوتهم المغرب والكل يضحك ويسولف
الجد : ان شا الله بكره بنروح البيت نملكهم ونمسك خط الديره
ابو بندر : ماكانك يبه مستعجل
الجد الي باقي على طبع الاولين وكل شي يعجل به : لا ماني مستعجل ولا شي هذي عاداتنا ياوليدي ولا جيت المدينه ونسيت
ابو بندر : لا يايبه مانسيت
الجد : قم حط يابهاج حطب نارنا بدت تطيح
قام بهاج وهو يحط الحطب ويزين النار
ابو الواليد : الا يبه شصار على عمي ابو اديم باقي على حاله
الجد : اي والله باقي على حاله والله بنيته اديم ماتقصر بس هو راسه يابس
بهاج تذكر حب اديم له وضاق صدره
يزيد وهو يمسح على ظهره : هونها وتهون
بهاج : الله يسهلها
الجد : قولو لحريمكم الفجر بنمشي
الكل ابشر وبردود مختلفه
انتهى يومهم بخيره وبشره وكان بالنسبه لـ الريم يوم ممتع وبنفس الوقت شايله هم زواجها من يزيد
نامو كلهم بعد الساعه عشر الا يزيد الي جالس برا وعليه فروته ولاف شماغه على وجهه ويتامل القمر
حاولت الريم تنام ولا قدرت قامت واخذت كاشفها وطلعت لمحت الشخص الي جالس طلعت وجلست جمبه
يزيد : راضيه يابنت العم؟
الريم : الي كاتبه ربي راضيه فيه
يزيد : وشفيتس ضايقن خاطرس
الريم بلحن : يقول ابو نوره لا رفيق ولا حبيب ولا طريق اتبعه
يزيد : لا يغرس عصبيتي عليس
الريم : تحملت موت امي وابوي تبيني ماتحمل عصبيتك
يزيد : يقولس الميت رحمه الله عليه بس الحي يوم كان جافيني؟
الريم : ماجفيته بس لو كان فقلبه حب غير حبه لي
يزيد : القلب لمن انه حب مايقدر يجافي حبيبه
الريم لفت عليه : صدق تحبني؟
يزيد : حبيتس وانتِ جفيتيني
الريم : وليه كنت بتعرس على جود وكلامك لها
يزيد : عشانس تزيدين علي من الهم
الريم : الله يالدنيا صرت ازود الهم عليك
يزيد : الهم الي فيني من حبي لس
الريم سكتت وهي تشد جلالها عليها
يزيد : لايكون بردانه وساكته
الريم : لا ماعليك
يزيد قرب منها وحط الفروه عليها : جعل البرد بضلوعي ولا يجيس
الريم : بسم الله عليك
