صدقه جاريه ( لعلهم يتفكرون )

١٠٣ : كيف احارب الشيطان ؟

ازاي أقاوم الشيطان💪؟!

سؤال بديهي بس كتير مننا ميعرفش ايه أساليب الشيطان وازاي بيوسوس لبنى آدم وايه المفروض نعمله علشان نقاومه؟..
مع ان دي قضيتنا ومعركتنا الكبرى في الحياه!

في البدايه نحب نفكركم بأن عدوك الأول في الحياه هو إبليس وأعوانه..
اللي توعدك انت وكل ذريه سيدنا آدم بالاستيلاء والسيطره علينا واتخاذ كل الطرق علشان يبعدنا عن طريق ربنا..
وهو ده شغله الشاغل بعد ما بقى ملعون.. يعني بيشتغل معانا بكل ما أوتي من قوه ووسوسه..
لازم كل شويه تفتكر الكلام ده..✋
قال الله تعالى؛
{إِنَّ الشَّيْطَانَ لَكُمْ عَدُوٌّ فَاتَّخِذُوهُ عَدُوًّا إِنَّمَا يَدْعُو حِزْبَهُ لِيَكُونُوا مِنْ أَصْحَابِ السَّعِيرِ} (6) سورة فاطر
{قَالَ أَرَأَيْتَكَ هَٰذَا الَّذِي كَرَّمْتَ عَلَيَّ لَئِنْ أَخَّرْتَنِ إِلَىٰ يَوْمِ الْقِيَامَةِ لَأَحْتَنِكَنَّ ذُرِّيَّتَهُ إِلَّا قَلِيلًا} (62) سوره الإسراء
﴿ قَالَ فَبِعِزَّتِكَ لَأُغْوِيَنَّهُمْ أَجْمَعِينَ * إِلَّا عِبَادَكَ مِنْهُمُ الْمُخْلَصِينَ * قَالَ فَالْحَقُّ وَالْحَقَّ أَقُولُ * لَأَمْلَأَنَّ جَهَنَّمَ مِنْكَ وَمِمَّنْ تَبِعَكَ مِنْهُمْ أَجْمَعِينَ ﴾ (ص: 82 - 85)

بعد الايات دي لازم كل واحد مننا يترصد لعدوه ويعرف أساليبه وازاي بيستخدمها ضدنا وازاي نعرف نقاومه..
وده درسنا النهارده بإذن الله تعالى.👍

نبدأ باول أسلوب أو مدخل من مداخل الشيطان.. وهو ؛

✍️ تعطيل العمل الصالح :🤚

طبعا هيجيلك وسوسه بعدم اداء اي عمل صالح في صوره خاطر شر
(زي ما شرحنا من قبل في درس خواطر الشر) .
وهنتكلم عن الصلاه كمثال لينا.. 👇
ييجي الشيطان يقولك مثلا نام بلاش صلاه..
وده بيحصل مع كتير مننا.. خاصا في صلاه الفجر.. يقولك انت عندك شغل بدري.. علشان تصحى فايق.. مع ان باقي نص ساعه على الفجر.. او يقولك انت تعبان ومجهد ابقى صليه الصبح عادي..
المهم انه هجيبلك ١٠٠٠ مبرر علشان تنام ومتظبطش المنبه علشان تصحى..😔

👈طريقه المقاومه..💪
في ٣ ثوابت في المقاومه مع كل مدخل من مداخل الشيطان.. وهم 👈 الاستعاذه بالله من الشيطان الرجيم
👈وذكر الله 👈وأن دايما نفسك تبقى في حاله تأهب للعدو..
اول مايجيلك الخاطر ده...وانت في عقلك الباطن مترصد ليه.. تروح فورا مستعيذ بالله وتقول مثلا الله المعين واستغفر الله العظيم واتوب اليه..
💪(دي الطريقه الثابته معانا)💪

👈أما وسوسه الشيطان بتعطيل العمل الصالح..(خاصا)
بعد متستعيذ وتذكر الله ..
ممكن نفسك اللي تعاند..😔.. طبعا مش هتسكت ✋
هتقوم انت تفكرها بأهميه الصلاه في وقتها وان ده معاد من ربنا مينفعش اتأخر عليه وعلشان في موت وفي بعث وفي نار.. تقوم نفسك تلين هي كمان..وتعمل العمل الصالح بفضل الله عليك ❤️