صدقه جاريه ( لعلهم يتفكرون )

٤٠ : من اعظم سبل الطمأنينه : سوره الضحي

من أعظم سبل الطمأنينه .. قراءة سورة الضحى ❤️
لأنها من اكتر السور ال تخليك ايجابي و بتثق في الله عز وجل .. اكيد انت عارف قصة سورة الضحى .. انها نزلت على النبي صلى الله عليه وسلم بعد ما انقطع الوحي عنه ٦ شهور .. لا جبريل نزل عليه .. ولا في وحي .. ولا بيشوف رؤيا .. عارف .. انت بتحس الاحساس ده ازاي ؟؟

اما الدنيا تاخدك .. و المشاغل اوي .. صلاتك مفيش فيها خشوع خالص .. مفيش لذة للعباده .. ولا للذكر .. دعوات مش بتستجاب .. ضيق .. شده .. تحس ان ربك مش عايزك .. حياتك في النازل في حاجات كتير اوي .. تحس انك منقطع عن الله .. طبعاً الرسول اما انقطع عنه الوحي مكنش بانشغاله عن الله طبعاً زينا .. بس كان حاسس احساس وحش .. لدرجة يقال ان حد قاله : قلاك ربك .. يعني ربنا هجره .. النبي افتكر ان الله لا يريده .. انه ممكن مش عايزه يبقى نبي تاني .. كل الافكار دي جت في باله !!..

انت نفسك بتيجي ع بالك افكار من دي .. ربنا مش عايزني .. حياتي وحشه .. دعواتي بتروح فين ..انا مظلوم .. شقي و تعيس .. النبي كان حاسس احاسيس برضه مش حلوه لحد نزول السوره دي .. و بعدين نزلت السوره دي .. علشان
تبقى دواه .. و دواك .. و دوا كل واحد حاسس ان ربنا مش بيسمعه و مش عايزه :)) ..

دلوقتي تخيل نفسك بالحاله دي ..
و السوره نزلت عليك ..

ربنا بدأها بـ " و الضحى " :

بدأها بالشمس ، و نور الشمس ، و الايجابيه ، و الجانب المشرق ، اي حد حزين تيجي تكلمه لازم تبدأ كلامك بانك تصحيه ، استيقظ ، الدنيا فيها حاجات حلوه مش دايماً حزن بس ، ربنا بيقولك كده ،
بيذكرك بالنور ، نور الشمس ال ظلمة الليل لا طاقة لها به ، زي نور الفرج و الكرم ال هيجي يغطي على المك و حزنك ،

" و الليلِ اذا سجى "

الليل لما يسدل استاره ، اما النوم يطير من عينيك بسبب همك و حزنك ،

" ما ودعك ربُك و ما قلى "

انت حبيبه .. الله لا يكرهك يا محمد .. لا يكرهك يا فلان .. لا يكرهك يا فلانه .. الله يحبك ..

" و للآخرةُ خيرُُ لك من الأولى "

انت متخيل ان ال انت فيه الوقتي دايم ؟
لا كله هيتغير ، حالك ده كله هيبقى حال
أخر ، و هيبقى خير من حال الوقتي :) ،
و حتى لو ملحقتش تعيش للحظه دي فـ الجنه
خير لك من الدنيا ، انت كسبان مع ربنا ، هنا
ولا هناك ، انت الخير جاي لك جاي لك ،
مش هيضيع تعبك ابداً ، في حال تاني
هيجي يغلب الحال ده .

" و لسوف يعطيك ربك فترضى "

قريب اوي .. هتسعد .. و هينكشف غمك ده .. و هتفرج .. و هتثبت .. قريب اوي هتلاقي املك ..
هتلاقي نفسك .. قريب اوي .. هتعُطى حتى ترضى ..

" ألم يجدك يتيماً فأوى "

مش كان من غير ام و اب ، ماتوا و هو صغير ، مين رعاه غيره ؟ مين حفظه غيره ؟ انت و انت صغير مين حفظك و حماك غيره لحد ما توصل لل وصلت له ؟ مين ؟ إنهُ الله .

" ووجدك ضالاً فهدى "

كم مره كنت ماشي في سكك غلط ، و هو نورلك الطريق ، كم مره بعدت و ردك ، كم مره مكنش حيلتك الا نيتك الصادقه و اكرمك علشانها ، ده خلاك تتولد مسلم ، من بيت مسلم ، علشان رايد لك الهدى ، و كل ما تضل ، و تلجأله ، يبعتلك النور ال يطلعك من ضلمه كانت هتدمرك .

" ووجدك عائلاً فأغني "

وسع عليك .. اغناك عن الناس .. عن الفقر ليهم .. عن سؤالهم .. وسع في رزقك .. اعزك .. عد كم مره حسيت انك غني بيه .

- العلاج -

" فأما اليتيم فلا تقهر "

ربنا علشان رايد لك دواء صح ، بيقولك شوف الاكتر تعب منك ، اليتيم فقد واحد من ابويه او الاتنين ، ساعده ، و خليك جمبه ، و اوعى تكسره ، متقهروش ، تولاه علشان ربك يتولاك .

" و أما السائل فلا تنهر "

متلفش ضهرك .. متديلوش جمبك .. متبصلوش من فوق لتحت .. حتى لو مش مصدقه .. انت ال محتاج الفقير اكتر .. انت بتنام شبعان و هو لأ..
انت بتنام في بيت و هو لأ .. رفقاً بالسائلين لا اذاقك الله مُر السؤال .

" و أما بنعمة ربك فحدث "

عد نعمه .. الكتير اوي.. اولهم عين قرأت كل الكلام ده .. و اشكره .. متكدبش عشان خايف من الحسد .. هو قالك حدث !! .. هو كفيل يحفظ عبد بيعد نعمه و بيشكره .. هو خيرُُ حافظاً .

- سورة الضحى ، رحمه و علاج و نور -

#تدبر_القرآن
منقول