صدقه جاريه ( لعلهم يتفكرون )

٩٨ : هل تحب الله ؟

عايز اقول حاجة لعلها تشفعلي يوم القيامة وتتكتبلي في ميزان حسناتي واي حد يهتدي بسببي... او بسبب حد منكم ينشرها ويشوفها حد ويتأثر بيها..
وتفضل تتناقل وتتوارث وناخد أجرها ليوم القيامة ❤️

الموضوع عن ازاي أعبد ربنا علشان بحبه؟
إزاي أبقى مستني الصلاه وابقى مش عايزها تخلص؟
إزاي أبقى بحب القرآن وكلام ربنا قوي؟
إزاي أحب ربنا فعلا؟

.. ممكن هتقول منا بحب ربنا دلوقتي من غير حاجه..
🤔طيب اللي بيحب حد ده مش بيكون في دليل على كده.. يعني مثلا لو في حياتنا العاديه واحد مرتبط بواحده.. اكيد بيخصصلها وقت كبير ويقعد يتكلم معاها.. لو تعبت يفضل جنبها.. يدفع علشانها اي فلوس لو تعبت مثلا او حتى بيجيبلها هدايا بالغالي كل شويه يفكر فيها ويجيب سيرتها..يقابل حد من الناس يقعد يحكي عنها.. وهكذا
👈 ده حب الإنسان للانسان من حياتنا الطبيعيه...اكيد كلنا شفنا ده..
طيب انت ياللي بتقول انك بتحب ربنا.. بتعمل ايه؟ ايه الدليل؟
... ربنا كتب عليك مواعيد تتكلم معاه فيها كل يوم اللي هي الصلاه (صله العبد بالرب) ..
💥بتروح لربنا في معاده في صلواتك وبتستني وقتها حبا فيها ولا مابتصدق تصليها وترتاح ؟ ..
💥 بتصحي بالليل مخصوص علشان ربنا مستنيك تقوم تصلي الفجر..؟
💥بتطلع صدقه مما تحب علشان تتاجر مع الله؟
💥ربنا مبيغيبش عن فكرك كل شويه تروح تذكره وتسبحه..
💥كل مقابل حد تقعد تحكيله عن نعم ربنا وحب ربنا.. ومع نفسك برضوا؟
👈 حب ربنا مش مجرد كلام.. فين فعلك في كده...؟🤚
تخيلت معايا..... 🌿
✍️ هتقولي فعلا كلامك صح.. بس عايز استشعر حب ربنا في قلبي علشان احبه كده.. تقدر تساعدني؟
... هقولك من عنينا.. بص كده 🤗
تعالوا نفكر من زاويه تانيه....إن قد ايه ربنا مالك الملك عز وجل... بيحبك.. وبيحبك حب مش هتصدقه ولاهتتخيله...علشان تعرف ازاي يكون حد بيحبك كده وانت بعيد عنه كده 😔
وأنا هوضحلك وبالأدلة.... 👇👇
.. هقولك حديث عن نبيك محمد صلى الله عليه وسلم هيعرفك ربنا بيحبك قد ايه...
👈حديث عمر بن الخطاب قال: قُدِم رسول الله ﷺ بسبي، فإذا امرأة من السبي تسعى، إذْ وجدت صبيًّا في السبي أخذته فألزقته ببطنها فأرضعته، فقال رسول الله ﷺ: أترون هذه المرأة طارحةً ولدها في النار؟، قلنا: لا والله، فقال: الله أرحم بعباده من هذه بولدها.
👌هوضحلك... يعني الصحابه شافوا امرأه تحتضن ولدها وترضعه بكل حنان وحب وتأثر الصحابه..
فقال لهم الرسول صلى الله عليه وسلم.. أم زي كده ممكن ترمي ابنها ده في النار... قالوا لا والله..
قالهم صلى الله عليه وسلم ان الله عز وجل ارحم بعباده من هذه الام بولدها... 🤚
👈مصدق حبيبك النبي ولا لأ
👈طيب نفسك اتحركت شويه لحب ربنا؟

✍️طيب هقولك أيات من القرآن الكريم ربنا بيخاطبنا بيها علشان تعرف قد ايه مفيش حد بيحبك اكتر من ربك..
﴿ قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ﴾
يعني لو انت ياعبد بعيد عني خالص ومسرف في حق نفسك ومقضيها معاصي.. انا برضوا هسامحك بس ترجعلي. انت بس ارجع وتوب ..
في عظمه وحب اكتر من كده....❤️
... طيب هقولك كمان.. 👇
✍️حديث عن حبيبك النبي صلى الله عليه وسلم
(ينزل ربنا إلى سماء الدنيا كل ليلة، حين يبقى ثلث الليل الآخر، فينادي، فيقول: من يدعوني فأستجيب له، من يسألني فأعطيه، من يستغفرني فأغفر له)
... تخيل كل يوم حد ييجي ينده عليك وانت قاعد نايم مش عايز تقوم ترد عليه..وعايز يساعدك ويفيدك.. أكيد هتقوم لو حبيبك فعلا..
💥💥💥💥المشكله الكبيره ان ده مش حد...
ده الله خالق السموات والأرض مالك الملك ذو الجلال والإكرام.. الملك.. القدوس.. المهيمن.. العزيز... الجبار..
كل يوم ينزل ينادي عليك.. يريد أن يغفرلك ويرحمك.. رحيم بيك.. عاطيك نعم لاتعد ولا تحصى.. وانت نايم وعايش في غفله .... تخيلت قد ايه انت عايش في غفله ومقصر مع ربك 😔😔
... قد ايه احنا مقصرين معاك يارب العالمين.. سبحانك ماقدرناك حق قدرك... بس منقصدش والله . سامحنا يارب عن غفلتنا واكتبنا مع عبادك الصالحين وحبب إلينا كل عمل يقربنا الي حبك سبحانك انا كنا من الظالمين 🤲
كم مره اذنبت وسترك سبحانه... 😔
كم مره عصيت وربنا قادر انه يهلكك.. ولكن تركك سبحانه وسايب ليك الفرصه تعود وترجع تاني..😔
... دنتا الانسان المخلوق الضعيف لو واحد بس غلط فيك وياسلام لو واحد غلبان ولا ضعيف.. هتقوم عليه تقوله انت مش عارف بتكلم مين..ومش هتصبر عليه
سبحان الله الودود العفو الرؤوف الحليم ❤️
بذمتك بعد كل ده متحبش ربنا... متحمدش ربنا... متذكرش ربنا... والله لو عايش بحب الله في دنيتك هتسعد دنيا وآخره.. تخيل انت بتحب مالك الملك..❤️
💥وياسلام كمان لو يحبك سبحانه وتعالى..
والله لذه عباده ربنا احسن ليك من الدنيا ومافيها..
بس يكفيك دمعه في الخشوع في الصلاه ولا متأثرا بكلام ربنا في القرآن...احسن شعور في الدنيا..
ربنا يرزقنا وإياكم حبه 🤲...
وهنقول حديث عن الرسول صلى الله عليه وسلم ازاي ربنا يحبك..
✍️عن الرسول صلى الله عليه وسلم
(وَمَا يَزالُ عَبْدِي يتقرَّبُ إِلى بالنَّوافِل حَتَّى أُحِبَّه، فَإِذا أَحبَبْتُه كُنْتُ سمعهُ الَّذي يسْمعُ بِهِ، وبَصره الَّذِي يُبصِرُ بِهِ، ويدَهُ الَّتي يَبْطِش بِهَا، ورِجلَهُ الَّتِي يمْشِي بِهَا، وَإِنْ سأَلنِي أَعْطيْتَه، ولَئِنِ اسْتَعَاذَنِي لأُعِيذَّنه).
يعني لو تقربت الي الله بنيه حبه عن طريق صلاه النوافل وهي السنن.. طبعا غير الفروض.. ربنا هيحبك ولو حبك ياسعدك ويابختك يعني مش هتسمع إلا اللي يرضي ربنا وماتشوفش غير اللي يحبه ربنا وتمشي في الخير وطبعا لو سألت ربنا حاجه مش هيتأخر عليك..
رزقنا الله وأياكم حب الله مفيش حاجه نختم بيها أجمل من كده.... 🌿 🌿
حبيت ربنا ولا لسه 🤚

اللهم ارزقنا حبك وحب كل عمل يقربنا الي حبك 🤲
سبحانك ماعبدناك حق عبادتك
فأغفر لنا وتوب علينا انك انت التواب الرحيم 🤲🤲

#فى_حب_الله ❤️