في الجزائر فات نهار مليان تعب على ماهر ومازن اللي بسيف قبل صاحب الاوتال يدير الحفلة عندو وبداو التحضيرات ماهر ومازن كان لازم يبقاو ثم ويوقفو على كل خدام ويتأكدو من خدمتو في النهاية هاذ الحفلة رايحة تلم بزاف ناس مهمين من برا البلاد واذا نجحت الحفلة رايحين يخدمو معا ماهر وتتوسع آفاق شركتو عبر العالم وهذا هدف ماهر يبني شركة ناجحة ويكون عندو عملو الخاص بعيدا عن ممتلكات جدو
واقف وسط الحديقة تاع الاوتال كلشي موجد طوابل مغطيين باجدد تشكيلة ديكور و منصة إلقاء الخطاب حتى هيا واجدة كلشي بذوق عصري ومع لمسة ضوء الغروب اللي كان وصل اعطى منظر رائع, تبسم ابتسامة رضا
ماهر:واخيرا كلشي واجد...غدوة رايحة تكون الليلة الاسطورية.
مازن (كان واقف موراه):اييه حنا تعبنا بزاف وخدمنا بكل جهد بش تنجح حفلة غدوة وربي اكيد رايح يعاونا...قاطعو تيليفونو كي صونا
مازن:الو..اييه رانا في الاوتال..اوك رانا جايين .. وقطع
مازن:هيا خوو يما راها تعيط قالت نتعشو كيف كيف
ماهر تبسم ومشا درعو من كتفو:هياا لازم نريحو لغدوة....مازن حتى هواا تبسملو ومشاو
صوت فران تشد بالقاوي قدام باب الاوتال
ايلين:ياا بنتي شبيك قاريتي هكذا شوي وطفرتينا فعمرنا فلندن تسوقي عادي وش صرالك هنا
سيليا:ههههه شوي اثارة الحب انزلي انزلي متخافيش مزال بش نموتو وغمزتها وهبطت
ايلين:هههه هوا يعني من بكري مهبولة بصح ضك زادت ولكن معا قوة وهاذ القوة مطلوبة تبسمت ابتسامة رضا ونزلت تعاون فيها تهبط الفاليزات كل وحدة هبطت فاليزتها ومشات ديراكت لشوبرتهم اللي كانو ديجا ريزارفاو فيها من قبل ايلين دخلت للدوش تغسل وتلم شعرها
وسيليا بقات فالشومبرة فجأة تفكرت الكاسات(المسجلة)جرات لصاكها تحوس وتقعدت مخطوفة من فوق السرير وقت ملقاتهاش:ااا يماا لالا وخرجت تجري من الشومبرة
ايلين:خرجت لابسة بينوار وجهها لونو مخطوف تجري فالشومبرة وتعيط : سيليا .... سيليا .... وينك.....سيليا..... ياربي وينهي سيليا
سيليا نازلة فالدروج تجري محملتش تحكم السونسار شعرها كامل تحل وفي فمها كلمة وحدة:يمااا....يمااا
ماهر ومازن هبطو لقاراج الطاكسيات وين قاراو طاكسي تاع ماهراللي جاو فيها كانو يمشو حتى خبطت فيه وفاتت زي السحايرة شعرها داعب وجهو وعمالو عينيه
مازن يحك في وجهو و يعيط بيديه :يااا حماارة شوي قدامك دهمتيني يا زحح
ماهر:مازن بلع باينة مزروبة
مازن:ياااو عماتني هاه قاراج يهز فيلة(جمع فيل) مش فيل برك هيا اللي عمية
اما سيليا سمعتو وقت قال عليها حمارة وتوعدتلو تعطيه حقو ولكن حتى تلقى وش ضاعلها تمت تجري حتى لحقت للطونوبيل ديراكت فتحت باب جيهة الشيفور وين كانت قاعدة لقاتها طايحة ثم جبدت نفس من صميم قلبها
YOU ARE READING
"اسيرة_لعبة_الماضي "باللهجة الجزائرية
Romanceاول كرو ليا بقلمي وافكاري وتعبي ممنوع النقل الا باذني "الدنيا خيبات...تعطيك الأرخص وتأخذ منك الأغلى ......تجعلك تثق وتخونك ......تجعل جميع الظروف جامعة لك بما ستحب وتتعلق ....لتتأكد من شدة المك عندما تاخذه منك ويصبح الماضي هاجسا بينك وبين ال...
