"اسيرة_لعبة_الماضي "باللهجة الجزائرية

الفصل 22

فالحياة هاذي تلقى بزااااف أصناف تاع بشر , تلقى بزاف عقليات و وجهات نظر , و كذلك تلقى إختلاف في طريقة إحساس كل واحد , و برغم كل هاذ الإختلاف كاينة حاجة وحدة مشتركة بيناتنا كامل , و هي الإنسانية , كوننا حنا إنس كاينة حاجة لا تتجزأ مننا و هي الإنسانية تاعنا , و لكن .. , فالزمان هذا كاين اللي ألغى هاذ الإنسانية في قلبو و تخلى عليها حتى و لاو ناس بدون رحمة , بدون ضمير , و بدون قلب , و وسط هاذي اللعبة القاسية اللي دارها الماضي و خلى بزاف أبرياء يلعبوها رغما عنهم و يسلكو ثمن أخطاء ماعندهم حتى ذنب فيهم , نلقاو نسيمة وحدة من هاذوك الناس اللي نساو حاجة إسمها الإنسانية و تخلاو عليها , بسبب حقدها و كرهها الشديد لإيلين اللي ماعندو حتى مبرر , راهي درك حاقدة على بنتها لينار و هاذيك البريئة ماعندها حتى ذنب , ضميرها الميت خلاها تكره طفلة صغيرة عاشت يتيمة و أمها حية و هوما السبب في هاذ الشي , و ماعوضتهاش حنان الأم اللي فقدتو بسبب طمع و جشع عماهم كامل من كبيرهم لصغيرهم , كانت نسيمة قاعدة فالشومبرة تاعها تتفرج فالتيلي و حاطة قدامها فاكهة من مختلف الأنواع , لا هي مقدرة هاذ النعمة اللي راهي عايشة فيها و لا هي حامدة ربي عليها في عمر كيما هذا , كانت لاهية حتى تلقى الباب تفتح بلا إذن , و شافت سليمة جاية داخلة عندها . نسيمة تهدر بينها بين روحها : يا الرحمة على الأقل طبطبي مابقاش إحترام فهاذ الدار خلاص نسيمة عدلت من تعابير وجهها زعما و دارت بروحها مهتمة بسليمة و مقادرتها , لأنها تعرف ملييييح مكانتها فالعايلة و مهما كانت نسيمة لاعلاقة بالمعاملة الحسنة فهي ماتقدرش تطيح من قيمة سليمة و تقلل معاها إحترام , في هاذيك الدار سليمة يقادرها الصغير و الكبير بدون إستثناء , و لكن هاذي كامل بعد موت راجلها

. نسيمة : واش كاين كاش ما إستحقيتي مني يما سليمة ? الحاجة سليمة بقات تشوف معاها بنظرات باردين و فيهم بزاف اللوم و العتاب , مايش حاملتها خلاص بسبب لي جاست الخايبين تاعها ديما و تصرفاتها اللي ماعندهم حتى مبرر مع طفلة بريئة فالحاضر , و أمها المظلومة فالماضي . دخلت للبيت بخطوات ثابتة و خلات نسيمة تحس بالخوف و التوتر منها . الحاجة سليمة : ماتبدايش تتغاباي عليا , علابالك ملييييح علاه راني جاية و واش رايحة نهدرلك نسيمة فهمتها طايرة علاجال لينار , و عرفت باللي سليمة مستحيل تخليها تفوتلها على خير , و لكن مع ذلك دارت النية فالهبال و كملت التمثيلية الفاشلة تاعها , مناه هاذو العباد مستحيل يتبدلو و يعترفو بأخطاءهم

نسيمة : واش قصدك علاواه راكي تحكي مافهمتش ?

الحاجة سليمة : لا حول و لا قوة إلا بالله , نتي مستحيل تتبدلي مهما يصرا , علابالي باللي راكي تتغاباي , عشتي معايا السنين هاذو كامل و تعرفي عقليتي و علابالك جاية علاجال لي الجاست الخايبين تاعك مع لينار , مانفوتهالكش بالساهل . نسيمة : أنا مانبقاش نعاود كلامي , الطفلة هاذيك مستحيل نتقبلها و مستحيل نستعرف بيها , صح بنت ماهر , بصح ثاني هي بنت هاذيك الهم اللي دخلت للدار و خربت كلشي و خلات ماهر يعادي جدة و يوقف في وجهو , يا بن عمي مولات 05 سنين ماعندها لا قدر لا والو , نهدرو معاها كلمة ترد عشرة , خارجة لأمها واش نتوقع , و لأنها نسخة من هاذيك اللفعة راني مستحيل نعتبرها من عايلتنا سليمة بنبرة عالية : بلعي عليا مانحبش نزيد نسمع هاذ الكلام , ماتنسايش باللي راكي تهدري هاذ الكلام قدامي أنا , إيلين مانسمح لحتى واحد يهدر فيها قدامي فهمتي , هاذيك الطفلة ماعندها حتى ذنب , ذنبها الوحيد هي أنها حبت ماهر و تعلقت بيه , و هاذي كامل ماشي هي اللي جرات وراه , هو اللي تعلق بيها و حب يكمل حياتو معاها , زوج حبو بعضاهم ماراح يكون عندهم حتى ذنب