"اسيرة_لعبة_الماضي "باللهجة الجزائرية

الفصل16

وقف معاهم ونطق عبارتو بكل برود حاكم يدها ويحكي

ماهر:اهلا شركائي وش رايكم فالمفاجأة صدقتو اني رايح نفوت الغدا معاكم؟؟ نوو كنت مدايرلكم مفاجأة بش نعرفكم على (وحكم البنت اللي معاه من خصرها)حبيبي

ماهر هدر كلام والباقي سمعوه بوذنيهم اما ايلين فكان كلامو مووس طعنها وباقي يتغوص كثر فذاك القلب المكوي اللي تلمو عليه كامل الهموم

حست بخنقة من بشاعة المنظر طبعا الانسان اللي عشقتو وعطيتو كامل وش عندك معا اكثر انسان كرهك وأذاك والفايدة انو هوا بذاتو وعدك بالحماية منو ميي الله غالب حكات فقلبها وابتسامة انكسار مالية وجهها

ايلين:هههه هانت عليه بنتو حتى متهونيش عليه نتي اصلا نتي كنت بعيدة طول 5سنين اكيد كان كل يوم معا وحدة

سيليا وجان يشوفو مصدومين وعينيهم تهرب من ايلين لماهر شايفين النظرات المتبادلة بيناتهم نظرات عاشق مكسور من طرف ايليلن ونظرات اسى والم على الطرف الثاني مغطيهم لمعة تكبر من قبل ماهر اييه غايضتو حالتها مي الكبرياء سيد الموقف

مازن مشوكي من الهم اللي طاح عليهم ماهر اللي الصباح كان مكسور وحاب يرجعها ضك وفي نص نهار كسر الخيط الرقيق اللي كان ممكن يصلح الاحوال بقدومو المفاجئ معا حبيبتو اللي بالرغم من انها عاشت معاهم نص عمرهم مكانش عارف طبيعة علاقتهم اييه ليوم ماهر جاا ومعا اكثر انسانة يكرها وتكره بنتو و مرتو ميييرال مييرال بنت خالتهم نفسها بشحمها ودمها وشرها (متتشوكاوش بزاف محيطيتش ميرال فالكرو باطل annaba هاني سخنت بلاصتها ههههههه)

تتبسم بنظرات شر وانتصار تشوف فالبنت اللي طول عمرها تغير منها ليوم مكسورة بسبتها مكفاهمش وش دارو فيها زايدين جايين يكملو وش بقا في ذاك القلب من مشاعر يصلحو نطقت بصوتها المسموم تتعيوج فالكلام ويدها مرصوصة على يدو تقول رايح يهرب اكيد متا منش عليه وهوا قدام حبيبة قلبو

ميرال:مااهر حبي وش رايحين نبقاو واقفين عرفنا على بعض وزيد هاذو رايحين يكونو شركاء حبيبي لازم نعرفهم

ماهر حكم يدها بين يديه وحكى وهو يشوف فعينيها :اكيد حبي رايح نعرفك بيهم وقرب لايلين اللي كانت واقفة وتتفرج عليهم قلبها نار ماو داري بيها غير اللي خلقها

ماهر:حبي هاذي ايلين مرت جان شريكي

ميرال مدت يدها لايلين ووجهها عليه ابتسامة شر وانتصار :اهلا ايلين متشرفين

ايلين باقية ساكتة وتشوف فيه وفيها وشمن جرأة عندهم هاذ الزوج مي معرفوش معامن راهم يلعبو هاذي ماشي ايلين اللي كانو يعرفوها هوما الزوج هاذي ايلين رمز القوة المتولدة من اشد جروح وألام الدنيا خلات يد ميرال معلقة فالهوا وحكات بصوت هادئ عكس النيران اللي راها شاعلة وسطها