بقاو واقفين فالجاردان يستناو ميرال تنوض ونسيمة قاتلة روحها بالندابات على بنت ختها
نسيمة:ياويلي قتلو الطفلة..ياويلي غدوة يسمعو الناس يقولك تقتلت فدار خالتها ايمااا طاحت الروح فداري
ماهر جابد ليه ايلين اللي كانت تشوف مشوكية مسكينة هي علابالها باللي الطفلة مزالت عايشة مي نداب نسيمة تقول ماتت صح على آخر عمرها تولي قتالة هي وبنتها؟؟
ماهر:يما بركايك النداب راهي حية
سليمة:نسيمة بركايك الدراما هاي حية وانا ليا كن ماتت أحسن بيسك تستاهل الموت
نسيمة:اسكتو عليا اسكتووو..اهئ وش نقول لختي وش نقووولهاااا
ماهر:ا الرب ختتك راهي تبرات من بنتها كي غاضها الحال على ولد ختها هاديك الطفلة اللي فيدك شيطانة وأمها تخلات عليها بيسك خدايمها شوتر مالا اسكتي نتي ولوكان تنوض هنا فداري نزيد نرخسها ونضربها ونرميها برا وسط هاد الليل فااااهمة؟؟؟
نسيمة مسحت دموع التماسيح من على وجها وسكتت:خلاص خليها تبات هنا وغدوة تروح انا مربيتكش هك ربيتك راجل تخاف على حرمتك مش ترميها برا وسط الليل
ماهر:هههه شابة هادي علابالك؟؟..بااباها الطحااان(همستلو ايلين فوذنو خلات تبسيمة تهرب لوجهو)
ايلين:زيدلو كلمة خنثى
ماهر:ههه اسكتي نتي (همسلها بالخفيف بيناتهم وشاف للجماعة مكمل):ايه باباها الطحان الخن..منيش حاب نكملها بنتي تسمع مخافش عليها ومخليها تهمل فالليل فالنهار فالقايلة وتجري مور رجاجيل متزوجة تحوسيني نخاف عليها ونديرها حرمتي؟..ماا بركايك الأحلام تاع العصر ونوضي ادخلي ترقدي ضك نطيش جدها ونجيكم
نسيمة:ماهر ولدي على وجهي تعيييش
مازن قرب لمو مقلق:يما خلاص الطفلة هادي متستاهلش الخير وتستاهل الموت على خدايمها الشترة فعايلتنا
نسيمة:مسكينة الحب ومدار فيها هي حبت ماهر ولخرا داتهولها سي نورمال تهبل
سيليا خلص صبرها قربت ليها وحكمت ميرال من الشعر نوضتها من حجرها
سيليا:بنت القح...دايرة روحك متغااشية؟؟..فطنتي يا هجولة ومزالك تسمعيلهم؟؟
تشوكاو كامل كي لقاو ميرال فتحت عينيها ظهرت فطنت وبقات تسيتت باه يسمحولها
نسيمة وقفت تفك ميرال من يدين سيليا
نسيمة:اطلقي الطفلة يا عبرية اطلقيييها
سيليا:علابالك باللي بنت ختتك هادي مهما درت باه نربيها مترباتش؟؟....ضربتها فالشركة لحقتلها جنية فالغابة سحالي مقتولة وحشرات وخرجتلها بهيئة جنية وهي وحدها وسط الغابات مي هكاك ومبغاتش توب من أعمالها مالا خليني نقتلها ونهنيكم منها
YOU ARE READING
"اسيرة_لعبة_الماضي "باللهجة الجزائرية
Romanceاول كرو ليا بقلمي وافكاري وتعبي ممنوع النقل الا باذني "الدنيا خيبات...تعطيك الأرخص وتأخذ منك الأغلى ......تجعلك تثق وتخونك ......تجعل جميع الظروف جامعة لك بما ستحب وتتعلق ....لتتأكد من شدة المك عندما تاخذه منك ويصبح الماضي هاجسا بينك وبين ال...
