Fatima_Al-juboory
شَسولف والسِوالف تَجَرح البَلعوم ياهلي
......... ♡♡.........
جان يوم من اجمل ايامي اشوفهم مسطرين بالكاع بحيث اذ ردت تمشي ماتكدر اله تسحك ع واحد منهم دحسو روحهم دحس اله ينامون بالغرفه الي اني بيها شكد شعور جان حلو من شفت فرحتهم بيه بذاك اليوم
جنت انام دقائق وافز تعودت ع هذا الشي بسبب الخوف والرعب الي جان مسيطر عليه انام دقائق وافز اباوع باركان الغرفه واباوع لاهلي الي محاوطيني اضم روحي بحضن امي ماريد اعوفها ماريد اخسرها من جديد
اخاف اكعد من النوم والكه نفسي بحلم اخاف افز من نومي والكه كل هذا حلم واني بعدني بيد داعش ومالتقيت باهلي اخاف من هل لحضه اضم روحي بحضنها حيل ماريد اعوفها
كعدت الصبح ع اصواتهم البعيده فتحت عيوني ضوه خفيف يصدر من وره البرده واصواتهم بعيده شويه باوعت جانت الغرفه مرتبه وشايلين فراشاتهم
كمت اتجهت لبره اريد اطلع وقفني كلامهم
ظافر: يمه سوي مخلمه ع بيض ريناس تحبها ع الريوك
ادهم: بس اني اريد اسويلها طماطه وبيض جانت تحبها من اسويها
ظافر: تسكت يخوي حشه نعمة الله تحركها انت تلعب النفس
ادهم: شبيك مضغوط
دانيا: كااافي لاتتعاركون
ادهم: ليش حبيبتي نتعارك قابل كدامج جهال
ام ادهم: اكول سكتوا لاتكعد اختكم تنرعب ع صوتكم
سكتو شويه واجه صوت نرجس
نرجس: ماما نكعد ريناس لو لا
ابو ادهم: لا بابا خطيه عوفيها بين ماتكملن الريوك نكعدها
اسمعهم وابجي حنيتهم نفسها ماتغيرت بالعكس زادت خوفهم وحنيتهم عليه زايده ماناقصه مسحت دموعي وطلع توجهت للمطبخ جانو كلها كاعدين من شافوني داروا وجهم عليه ابتسمت بوجهم مجامله واتجهت لميز الطعام اكعد بجانبهم
كام ظافر من مكانه واتوجه للكرسي الي ردت اكعد بي سحبه واشرلي اكعد وهو مبتسم
ظافر: تفضلي يااميرتي الصغيره
ابتسمت من شفته هيج كبل شمرت نفسي بحضنه وبجيت بصوت عالي بادلني الشبكه مرت دقائق واني بحضنه وابجي بصوت عالي رفعت راسي لتقت عيوني بعيونه الي مدمعه حجيت بصوت مخنوك
ريناس: ربي لا يحرمني منك ولا يحرمني منكم كلكم ماجنت ادري هيج راح تستقبلوني توقعت ماراح ترحبون بيه او ناسيني بعد مرور هاي السنتين
خله ايده ع خدي يتلمسه مسح دموعي وحجه
ظافر: وشلون ننساج شمتوقعه نكدر ننساج
رهف: لو تمر الف سنه ذكراج يبقه موشوم بگلبنه وبروحنه انتي اختنه الصغيره وبتنه وكل دنيتنه انتي
ادهم: ماتتوقعين شنو حياتنه من بعدج ضيم وقهر صدكيني
مسحت دموعي وكعدت ع الميز اكل ع كيف وكل ماارفع عيوني الكاهم يترقبوني كل ساع واحد منهم خله شي كدامي ويتوسل بيه اكل منه
مرت الايام واهلي محتضنيني بكل حنيه وامان خلوني احس بشعور الامان يغمرني من جديد صح مانسيت ايام داعش والعذاب بس احاول اتناسى
ماكول نسيته لان هل ايام مستحيل تنسه وبكل وقت تلاحقني بكوابيسها ورعبها ودائما احاول ابتعد عن اهلي بس جانوا همه يجون يمي ويحتضنوني ويحاولون ينسوني بسوالفهم وشقاهم
مر اسبوعين ع انقاذي واخراجي من تحت ايادي داعش ومن الخوف الى الامان الى حضن عائلتي
بيوم قرر ابوي يسوي عزيمه ويعزم اهله الى متطشرين كل شخص بمحافظه قرر يعزمهم بمناسبه طلعتي ورجعتي الهم بالسلامه
ياريت جان ماعازمهم ولا مستقبلهم بيوم من قرر يعزمهم جان البيت مكلوب من الهوسه اخواتي واخواني والجهال وازواج اخواتي كل ساع واحد منهم جاي شمحتاجين وشنو نقصكم الذبايح الي سواهن ابوي وعزم المنطقة كلها وخوالي وعمامي عزمهم
اخاف من هيج هوسه وضوضاء مانزلت بقيت بغرفتي الي صارلي يومين من انتقلتلها بقيت بيها ساده البرده والضويات مظلمتها اخاف من الضوه اصواتهم العاليه ترعبني بالزايد نفس الرعب الي جنت عايشته احس اصواتهم نفس اصوات الرمي والانفجارات الي جنت اسمعهم
كاعده بالزاويه ومحتضنه نفسي واديه ع اذاناتي احاول امنع اصواتهم ماريد اسمعها بعد ماكدر اتحمل اكثر وابقه وياهم شعور غريب يغمرني شعور الخوف والرعب ماجاي يفاركني
محتضنه نفسي ومدنكه راسي وارجف واحجي بصوت خافت
.... كاافي كااافي لاتصيحووون لا تحجووون سكتو سكتووووو اخااف اخااففف صوتكم يزعجنييي صوتكم يضايقني الضوه يزعجني كااافي
كمت ارجف بالزايد وابجي من تذكرت ايام داعش والاصوات تخيلت نفس الاصوات والانفجارات تخيلت شي خانكني حيل وشي اسود خطف من كبالي خليت اديه ع ركبتي ارجف واصيح بصوت عالي فقدت ماعرف شكمت اسوي
... لااااااا لاااا وخرررررر ايدكككك وخررررر ايدك لاتخنكنيييي لاتكتلللنيييييييي بااااااابااااااا ولجججججج دااانيااااااااااا لحكووووونييييييييي
