Fatima_Al-juboory
جبت كلشي وعفت كلشي!
ومدري شلون اجيت امشي؟
اجيتك ردت اكلك شوف!
ردنا نعوف كلشي وماعرفنه نعوف..
ريناس:
صعدت بالسياره ورجعت راسي ع الكشن سارحه بافكاري ومنتضرته يجي علمود ارجع للبيت مرت دقايق وقطع سلسله افكاري صوت طبكه الباب
درت وجهي اباوعله حرك الاستيرن من دون مايحجي حجايه اني هم ماحجيت ضليت ساكته
لفت نضري سلسله معلكها بالسياره مـديت ايدي كمشتها واني اتفحصها باوعتله لكيته مركز ع ايدي ويرجع يركز بطريقه
مديت ايدي الثانيه ردت اشلعها من مكانها بس لحضات حسيت ايدي رادت تنكسر بقبضه ايده باوعتله بعيون مدمعه متألمه من شده قبضه ايده همست بصوت متألم
.. جهاد اذيتني
.. جؤ مو نفس اذيتج الي
يحجي وهو عينه ع الطريق ويسوق بايد وحده والايد الثانيه كامش بيها ايدي بقوه
.. بس هد ايدي اذيتني ماريدها والله بس ردت اشوفها وخلاص بطلت
... عوفيها ريناس ليش لاحكتني ع راحتي
هد ايدي ورجع يسوق وهو عينه ع الطريق فركت ايدي بالم اجاني صوته الهادء
.. الشي الوحيد البريئ بحياتي هيه
رفعت عيني اباوعله وحجيت
.. مافهمت عليك
باوعلي ورجع يسوق وحجه بنفس نبره صوته
.. سـلسـلتج ريـنـاسـي.
عكدت حاجبي مافاهمه استرسل بالكلام وهو عينه ع الطريق
... السلسله الي اخذتها منج من اول ماحسيت عيونج رمن ع گلبي من وكعتي بيدي وانتي لابستها لهل كلاده وبقت بركبتج اشهر يوم عن يوم تصير عندي رغبه عارمه بهاي السلسله يوم عن يوم احس نفسي انجذب الج ولعيونج ماجان عندي غير اسحبها من ركبتج واخليها عندي
... كل هل سنين عندك؟
.. تبقه عندي للموت ريناسي نفس مانحفرتي بکلبي وتبقين للموت انتي محفوره بكلبي
... ليش ماخليتني افلتها
ماجاوب ضل ساكت من شفته هيج سكتت ماجاوبته وصلنه للبيت فتحت الباب ردت انزل
كمش ايدي باوعتله بتسائل ابتسم وحجه
... اخاف عليها تنشلع بيدج مستعز بيها بروحي
ابتسمت ونزلت بقيت واكفه بالباب انتضره يروح علمود ادخل بس السياره ماتحركت ضليت واكفه لدقائق وهم ماتحرك
السياره مظلله ماكدر اشوفه بس هو يشوفني عبالي بيها شي السياره تقربت فتحت الباب واني عاكده حواجبي لكيته مرتكي ع الجامه ويباوعلي مبتسم توترت كلش من نضراته حجيت بتلعثم
... شسمه ليش مارحت
... ليش بقيتي واكفه
.. نتضرتك تروح وادخل
.. واني انتضرتج تدخلين واروح
ابتسمت لكلامه وسديت الباب ودخلت للبيت لكيتهم كاعدين ع التلفزيون الحمدلله ادهم لسه مااجه لان تاخرت كلش
ابو ادهم: شو تاخرتي بابا
... نسيت الوقت
عفتهم وصعدت لغرفتي نمت واني افكر بكلام جهاد منضره مايروح عن بالي ضعفه معقوله لهل درجه يحبني
زين ليش ماانطي فرصه لنفسي ليش مااحاول اعيش حياتي جهاد مشاعره صادقه ليش ماتقرب منه ليش مانطي فرصه لكلبي يحب
نمت واني بوسط قوقعه من الافكار خوف من خطوه قلق من المستقبل شضاملي المستقبل بعد وسط افكاري وسط ضجيج عقلي استسلمت للنوم وتركت امري لله
مرت الاشهر وحياتي طبيعيه الشي الي اختلف صرت يوم عن يوم احس بنفسي اتعلق بجهاد رغم بعده ورغم ماحجي ويا
بس موقفه اخر مره كفيل يغير وجها نضري عنه منضره وهو دموعه ع خده مايروح عن بالي تعبه انهياره انكساره تعذيبه الي ضهرهن كدامي دليل ع مصداقيه حبه واخلاصه...
يوم عن يوم احس اكو نبته بداخل كلبي زرعها جهاد باخر مره شفته بيها يوم عن يوم تكبر بالزايد صرت اخلق حديث ويه منار في سبيل اوصل بالحديث لجهاد واعرف اخباره
ايقنت اني صرت احبه اي حبيته الانسان مو معصوم ولا مايخطه خطئ وعرف خطئه وين عذبني وعذبته
عذابي اله كبير خسارته لصحته كبيره اي فعلا اني خسرته صحته بسببي اني وسبب انتقامي سوه الحادث وصار بي هيج
راح يصير سنه وهو لسه ماتشافه من الحادث ولسه مايكدر يمشي من دون عكازه لاخر مره شفته هو ع عكازه بس ماعرف ان تركها او لا
كمت وكفت كدام المرايه واني اباوع لنفسي واضحك راح ندخل بسنه 2020 بقت يومين وندخل
يارب سنه خير علينه من سنين ماضايكه طعم الراحه وطعم السعاده ربي خلي هل سنه خير وسعاده ع الكل
غمضت عيوني باريحيه واني اتسائل شراح يصير بيه بهل سنه
فتحت الجرار وطلعت شمعه علكتها وخليتها ع الميز واسحبت المكص والمشط كصيت كذله لاول مره ردت اغير وردت ابدي هل سنه بتغيير
باوعت لنفسي وضحكت طلعت حلوه فزيت ع صوت التلفون يرن سحبته مجرد قريت الاسم احس گلبي فز شوق ع حب ع خوف ارتباك مشاعر متخربطه ماعرف اوصفهن
مجرد قريت الاسم «الباذنجانه المحتركه» ضحكت ع نفسي اطلقت هل اسم عليه من سنين تذكرت من سجلته هل اسم
