Fatima_Al-juboory
آكملت دربي بآئساً ..في خطوتي بآن الجفى
حقاً كفى !!
جم دوب أكآبر وآنتظر ؟
سنه المضت مو كآفيه !!
منقذي من الظلام.
جمان:
مرت الاشهر واني اشتغل بالمطعم كدرت اصرف ع بان وع نفسي كدرت ادفع ايجار واجيب مسواك ماخليت بان تحس بالتقصير ابد
مرت الايام بين التعب وبين الراحه بين الشغل وبين بان الي احسها مجرد اشوفها كل هم عليه ينزاح من صدري صرت احسها هيه راحتي
واكفه كدام المرايه والتعب ماليني وين جنت وين صرت جان الهوى اذ طخني ادير وجهي عنه واكله وخر جنت بالعز هسه هاي حالتي درت وجهي ع اختي الي نايمه ع السرير بكل برائه تحسرت ع وضعنه الي احنه بي تالي عمرنه الوادم تتفضل علينه بعد ماجنه احنه نتفضل ع العالم صدك لو كالو الدنيا دواره
سحبت المكياج من الجرار وسمرت بشرتي البيضه سحبت الكاسكيته الي ع الميز ولبستها احاول اغطي بيها ملامحي الانوثيه علمود لاتثير شك الاخرين بيه اني بنيه احاول انزلها ع عيوني باوعت لنفسي بالمرايه
بنطروني الاسود الولادي وبلوزتي السوده الفضفاضيه البسها علمود تخفي معالم جسمي الانوثيه والكاسكيته السوده
صرت اهرب عن العالم واحاول اوهمهم اني ولد بلبسي وتصرفاتي الولاديه ومظهري الرجولي علمود اكدر اشتغل ومااتعرض للتحرش
تقربت من اختي الي نايمه طبعت بوسه سريعه ع خدها غطيتها زين وسحبت الجاكيت من التعلاكه لان الجو هل ايام كلش بارد واتجهت للباب قفلته اخاف عليها كلش قفلته وطلعت للشغل المتعب
واكفه اقدم الطلب للي اجو سمعت صوت معتصم وهو يحاجيني
.. رافد
.. ها
... روح لذيج الطاوله اجو توهم شوفهم شيطلبون
.. دقايق
عافني وراح كملت الي بيدي ومشيت لاتجاه الطاوله الي كال عليها معتصم جانت عباره عن اربع شباب بس مانتبهت لشكلهم مشيت لاتجاهم وحجيت5
... تفضلو شنو تطلبون
مجرد حجيت هل كلمات رفع راسه الي جان كاعد مقابيلي من بعده الي بصفه رفع راسه كأنو يعرفون هل صوت
مجرد شفتهم رجف گلبي ورجعت لوره حسيت الدنيا افترت بيه من شفت صعب كدامي وابو خنجر الي جنه محبوسين يمه بايام داعش
رجعت بخطواتي لوره وهمه صافنين عليه كأنو يردون يميزون ملامحي يتأكدون مني طخيت بشخص وراي درت وجهي بساع اشوف معتصم وراي عاكد حواجبه
... رافد خيرك خويه
.. ها لا لا ماكو شي شوف الولد شيطلبون
عفته مستغرب ومشيت للمطبخ كعدت ع الكرسي احس رجليه بعد مايشيلني يرجفن خليت راسي بين اديه خوف احتل گلبي اسمع طيبه ومحمد وهمه يحاجوني بس ماالي طاقه اجاوبهم
محمد: رافد حاجينه شبيك
طب معتصم وهو يسئل شبيه بس ماجنت اجاوب كل الي ببالي صعب وابو خنجر شجابهم لهنا حسيت باديه نسحبن عن راسي رفعت عيوني اباوع لمعتصم وهو كامشهن حيل يحاول يهدء رجفتهن ويحجي بخوف وقلق
.. رافد شصارلك شبيك حاجيني
.. ما ماكو شي ماكو شي عوفوني ضغطي هبط
ركض محمد جابلي عصير انطانيا جبرني اشرب شربته واحس عقلي ضرب ع كد الاضطرابات الي صارت بي ماجاي اربط
شوصلهم لهنا وشجابهم لهنا ليس ياربي ليش ماجاي ارتاح من جها صعب شلون اكدر اواجها من جها ابو خنجر الي زرع بگلبي خوف وحقد منه
اخاف منه واخاف ع اختي منه احسه سفاح قاتل منضره وهو جان يجي واديه ملطخات دم وملابسه مايروح من بالي
مجرد اذكر الي سوا بريناس احس رعب يسير بكل جسمي ماحسيت ع نفسي الى واني بحضن معتصم وهو يذب ع وجهي ماي
معتصم: شبييك شبييك فهمنيي
... ماكو شي
.. كوم كووم ارجع للبيت اليوم ماكو شغل اني استلمه بمكانك الولد موجودين كوم
هزيت راسي بلا اي نقاش اخذت الكاسكيته من الكاع وكمت وكفت اريد اطلع وكفت ع صوت محمد
... رافد اجي اوصلك
.. لا خويه اني امشي اريد اروح وحدي
طيبه: خاف توكع رافد خل يوصلك
.. لا خويه اني امشي وحدي اشكرك خويه محمد
عفتهم وطلعت اريد اطلع من المطعم صار بوجهي صعب يباوعلي بشك لا مو شاك وانما متأكد من الي شافه متأكد مني جمان
نزلت الكاسكيته ع وجهي اكثر وردت اطلع يربي ماريد التقي بي ماريد اتعذب خليني مرتاحه بشغلي
اول ماوصلت للباب اربد اطلع وقفني صوته غمضت عيوني بنفاض صبر واني احاول اقوي نفسي درت وجهي عليه واني اشجع بنفسي اكون قويه حجيت واني مدنكه راسي
... تفضل خويه
... اكدر اسئلك سؤال
... تفضل
.. منين انت
.. ليش
.. ها لا مو تشبه شخص شايفه يمكن تعودله بشي
.. لا خويه لا اشبه شخص ولا اعود لشخص بشي مع السلامه
درت وجهي اكمل طريقي بس حسيت گلبي رجف من كال
... بس نفس الصوت ونفس الشكل
رجعت الكاسكيته ع وجهي ومشيت من دون مااجاوبه ولا اديرله وجهي
