Fatima_Al-juboory
هلي متعوب كلش حيل
هلي ولاچني بعمر عشرين...
ريناس، حسيت بعيوني بدت تغوش كمت اشوف الواحد ثنين دخت حيل ونسطرت طحت بحضن امي جثه هامده
بعد مفتحت عيني لكيت نفسي بسياره ادهم ديسوق تلفونه يرن وشكله متوتر وامي شابكتني
وبـ الصدر كاعد ابويه كل هلاحداث اني صافنه واباوع لكل واحد بيهم شوكت وصلت وشلون صرت بـ السياره واني بحضن امي افكر وعيوني مغوشه شنو صارلي وشنو ذنبي هيج يصير بيه
بقيت بحاله صدمه استرجع ذكرياتي واكول شنو صار مو اني حاولت اتقبل محمد وقررت اكمل حياتي وياه ليش كل هذا الشي صار بحياتي شنو المكتوب وشنو مصيري بـ الدنيا
فرحتي ليش متكتمل معي زمرد ليش هلكثر حاقده عليه ومتتركني بحالي ضليت بحاله صدمه وبس صافنه
بثناء انغماسي بـ التفكير سمعت صوت امي تحاجيني وابوي يحاول وياي واني منفصله عنهم بالي مو وياهم مجرد دافكر بـ الصار واحاول استوعب شنو بعد وليش ديصير هيج وياي
ليش كل هذا العذاب جاي اتعذبه شنو ذنبي اتعذب هيج عذاب صدمه وره صدمه حدث وره حدث اخذاني ذاكرتي
لايام خطفي ورعبي بيد داعش عذابي بيد جهاد صريخي عذابي المي حقدي خوفي فقداني للامل فقداني للشغف بالحيا كل هذي الاحداث جاي ترجع شريط كدامي
الامل الحاوطني بدخول جمان وبان وتمسكي بيهن خوف جمان عليه وتعلقها بيه واختفي هذا الامل بحرماني منهن وماعرف وين صفئ الدهر بيهن رجعت وحيده ضعيفه بلا سند ورجع الخوف يتمالكني وعذابي بيد جهاد رجع
تحررت من جهاد وعذابه ورجعت لبيتي وعائلتي الي سندتني وتلكتني بكل حب واحترام كل حب ولهفه
بعدما الامور الصادفتني بمعرفتي بـ زمرد واليوم اليوم هذا الكسره من محمد كفيله تخليني اقلع ثقتي بـ الناس من جذورها وصعب عليه ارجع ريناس الاوليه
بثناء محاولتهم بالحديث معي اشوفهم ديحاولون ينزلوني واني ببدلتي هذة البدله اللي رحت بيها وراجعه بيها واني متهنيت ولافرحت رجعت مكسوره وشايله حمل جبير ويايه كبل طحت خواتي ركضلي سندني ودخلني للبيت
كعدت بـ الصاله محاوطيني ابوي وادهم وظافر وامي واخواتي محاوطيني من كل الاتجاهات يحاولون يحجوني يحاولون ويايه واني مازلت بحاله الصدمه ماجاي استوعب الي دا يصير الي صارلي كله احس بي حلم
طلعتي بالبدله ورجوعي بيها طلعتي بفرحه ورجوعي بانكسار
ابوي مقابيلي مثني ركبه ويحجي وياي والدمعه مطاحت من عيني اباوعله شلون دموعه علئ خده ويحاجيني بهدوء واني بس صافنه عليهم احس نفسي بغير عالم
... باباتي احجي وياي جاوبيني بنيتي والله اخذلج حقج منه بس جاوبيني برديلي گلبي لاتضلين هيج ابجي صرخي بابا احجي كليلي شنو اليوجعج
بس صافنه عليه ماكدر ارد احس الصدمه الي تعرضتله حسيتها دخلتني بغيبوبه اريد احجي ماكدر احس شي كامش لساني يمنعني بس صافنه
خله ايده ع گلبي ودموعه ع خده يحجي بالم
.. بابا بنيتي رنوسه يروح ابوج جاوبيني گلبج يوجعج كليلي بابا گلبي يأذيني لاتضلين صافنه ابجي تعاي لحضني ابجي بحضني صرخي يروح ابوج
سحبني لحضنه صوت بجيه عاليه وصوت بجي ونحيب امي واخواتي شنو ذنبي انكسر هيج كسره
اجو خواتي يكوموني سندني دخلوني لغرفتي نزعوني البدله لبسني تراك نرجس حاولت معي واني ممستوعبه الصار ضلت تحجي بس ايد ماجاوبت
فتحلي التسريحه وهنه دموعهن علئ خدهن ،وصلن للمكياج مسحلياه، كعدت ع الجربايه لفيت روحي بـ اللحاف حاولت انام مكدرت
نرجس اجت كعدت يمي وتمسد علئ راسي
جود تمرغلي رجلي
دانيا ورهف اسمع بجيهم علئ
ضلو يمي لحد مغفيت
فزيت من نومي مخترعه لكيت ادهم مقابيلي كاعد علئ الكرسي مخلي راسه بين اديه اول مسمع حركتي كعدت رفع راسه اجه بـ اتجاهي حضني واول ماحطيت راسي بحضنه
بجيت بقهر وحقد بجيت بالم وانكسار الى ان حسبت طاقتي خلصت تعبت من البجي هو يمسد علئ شعري لحد ماطاقتي نتهت من البجي
مسح دموعي وهو يباوعلي بانكسار
.. ماريدج تنكسرين ووعد من عندي اخذلج حقج مربع بس اوكفي علئ رجلج ماريدج تضعفين ريناس كومي علئ حيلج اتخطي الصار انتي قويه اتذكري اتخطيتي الاصعب وكدرتي توكفين وتستمرين. صدكيني صدكيني حترجعين ريناستي القويه كومي انتي قويه كومي واجهي كلشي بـ اراده لاتضعفين ماريدج تنكسرين وانتي بضهرج اخوانج وابوج تخطيتي ايام داعش وايام العذاب ماتتخطين هذا الاختبار ريناس حبيبتي اضعفي وابجي بحضنه بس بره صيري قويه لاتبينين انكسارج
ضليت ساكته واني خاله راسي بحضنه رجعت انام اريد اهرب من الي دايصيرلي اريد اهرب من مواجه هذا العذاب
مرت الايام واني صرت عباره عن جثه هامده جسد بلا روح ضعفت وانكسرت تحطمت وتلاشيت
