Fatima_Al-juboory
"لم أتَعافى ..
لقد اُجبرتُ عَلى تَخطي كل شيء.
.... أتمنى أن نجد نهاية نستحقها بعد كل ما مررنا به.
....... ♡♡.....
حسيت بشي تخله ع خشمي خلاني افقد توازني طحت بيده ماحسيت بشي بعد
الم راسي موتني ضوضاء يمي صوتهم عالي اسمعه بس ماكدر افتح عيوني ولا اكدر ارد احس لساني ثكيل كلش اسمعهم كلش زين بس ماكدر اتحرك
احاول ارفع ايدي انطيهم اشاره انو اني صحيت واسمعكم بس ماكدر مالي طاقه احرك نفسي ضربات خفيفه ع خدي وصوته وهو يناديني بخوف
ادهم: ريناااس سمعييني رينااس شبيج
ام ادهم: يمه بنيتي شبيها ابو ادهم اخذها للمستشفى لاشو شيصير بيها ليش هيج ماجاي ترد علينه
ادهم: هسه غييررر، افهمممم شجاابهاا لهنا وشنووو بيهااا
ام ادهم: مادري مادري جنت نايمه يمها كعدت مالكيتها
ابو ادهم: ادهم شيلها طببها نرررجس ركضي ماي او عطر بساع جيبو
حسيت بي من شالني جان ودي اكللهم اسمعكم مابيه شي بس ماكدر احرك لساني ولا اكدر احرك جسمي ضوه قوي صار بعيوني نزعجت كلش منه عرفت نفسي طببوني بالصاله
رشات الماي الخفيفه ع خدي وضرباته الخفيفه صوتهم الخايف المتسائل عن حالتي يزيد من توترهم وقلقهم
مر الوقت واني بمحاولاتي احاول انطيهم اشاره اسمعهم خوفهم وقلقهم يزيد كل مايمر الوقت
جود: حررركت عيوونهااا والله حركت عيوونهاا
ابو ادهم: بابا ريناس تسمعينه بابا حبيبتي ردي علينه
رفعت ايدي بالكوه كدرت اشيلها حركتها بالكوه
أم ادهم: الحمدلله ياربييي
ادهم: دانيا حبيبتي روحي جيبي القرآن ركض
كدرت افتح عيوني كأنو تأثير المخدر بده يروح عني وبديت ارجع لقوتي الكل ملتم عليه والخوف باين ع عيونهم
ليش هيج سوه بيه شنو جانت غايته من هل شي معقوله هو اي هو كل الاحتمالات تدل عليه وكل الشكوك حوله ماكو غيره يسوي هل شي او ماكو شخص يشبه صوته اعرف صوته واميزه لو بعد مرور الف سنه صوته مايروح من مخيلتي اعرفه عشت ويا سنتين كامله اعرف صوته لو يهمس همسات والبارحه صوته رن باذني رن خوف وقلق اجتاح گلبي خايفه لا يرجع من جديد خايفه لا التقي بي من جديد
جابت دانيا القرآن انطته لادهم كام ماعرف وين راح شويه واجه ينزل باردانه عرفته مشه تجدد
كعد يم راسي وطلب منهم يرحون يرجعون ينامون بس محد قبل يروح بقو فتح القرآن وبده يتلو بايات القران صوته الحنين يزيد من اطمئنيتي يخليني اشعر بالراحه
كان يتلو بكل حب واحترام الكل جان واكف ع راسي عيوني تتجول بينهم ماحجيت اي حجايه بس صافنه بعيونهم والخوف مالي گلبي بالي مشوش تقربت نرجس عليه خلت ايدها ع راسي
كأنو ثارت غضبي دفعت ايدها بقسوه وخزرتها والخوف مالي كلبي رجعت لوره ودموعها ع خدها تقرب ظافر عليها حاوطها يحاول يهدئها ويطمئنها انو اني مابيه شي
خوفهم يزيد بالزايد وهمه يباوعولي واني بس صافنه عليهم مانطقت بحرف واحد
حسيت نفسي بديت اغفه حسيت صوت ادهم بث بداخلي الاطمئنينه والراحه ستسلمت للنوم بحضن عائلتي
كعدت ع صوت يمي فتحت عيوني بتعب ابتسمت واني اشوف جهال اخواتي قريبين عليه جانو كاعدين يلعبون وريناس الصغيره كاعده ع صفحه جانت زعلانه وادهم وابوي نايمين ع التخم المقابيلي محاوطيني
كمت من مكاني تقدمت ع ريناس بت نرجس دنكت لمستواها باوعتلي بعيون مدمعه وهيه مبرطمه مديت ايدي احاول المسها بس شي بداخلي يمنعني من الاقتراب لاي شخص ويمنعني من الاختلاط باي شخص مهما كان قريب مني اتنرفز اذ شخص تقرب مني كأنو بديت اصاب بوهواس قهري او ماشابه كأنو بديت اصاب بالاضطرابات النفسيه
بس مستحيل اسمح لهل شي يصيبني مستحيل اسمح بفقدان عقلي مستحيل اسمح بالجنون يصيبني
باوعت لايدي الي متردده غمضت عيوني وشديت قبضتي بغضب وحقد ليش هيج جاي يصير بيه
ادري جهاد هو الي سوه هيج بيه البارحه ادري بي هو محاوطني من كل جانب ادري بي رجع عليه يريد ينهش جسدي الضعيف من جديد اعرف جاي يخطط لشي والبارحه كان جزء من مخططه
نفضت الفكره من بالي فتحت عيوني باوعت جانت تباوعلي من فتحت عيوني ضحكت بصوت عالي ضحكه طفوليه كأنو صوت ضحكتها خلاني احب اتقربلها تجرئت وخليت ايدي ع خدها تلمست بشرتها الناعمه فتحت اديها الي وهيه تضحك
... دده ننو
كامت وكفت وشمرت روحها بحضني نتفضت بغضب غمضت عيوني حيل احاول اهدء نفسي واهدء رجفه جسمي خلت اديها ع عيوني وهيه تحاجيني بصوت وكلمات طفوليه غير مفهومه فتحت عيوني باوعت بوجها البريء الطفولي
ضحكت بصوت عالي كل الي ببالها اني العبها من جاي اغمض عيوني وافتحهن ماتدري بالتناقض الي بداخلي الي راح يخليني افقد عقلي
