Fatima_Al-juboory
مرت الايام جان وضع بيتنه هدوء اخواتي رجعن لبيتهن ادهم صار مايتواجد بالبيت يكضيها بالدوام يبقه ايام كلش هواي صار شغله مضاعف بده يتعب بسبب الترقيه مالته بعد كم شهر لهذا السبب ادهم بعد مايتواجد ودوامه صار مضاعف
وظافر وابوي رجعو لدواماتهم وامي تكضي اليوم يااما يم الجوارين يااما تطلع للسوك او صولون كاضيه حياتها بالصولون امي من النوع الي تعتني بنفسها او يم اخواتي ماتكعد بالبيت تحس البيت يخنكها
ظافر اعتزل تماما صار قليل يتواجد بلبيت واذ تواجد بالبيت يكضيها بس صفنات يااما بغرفته ظافر اختلف اخلاف جذري عن السابق كأن الحادث الصارله بقه اثر جبير بداخله
احس الندم بعيونه ندم ع خوف ماعرف شنو احساسه جان البيت صار كأيب وموحش اشتاقيت لايام من جان صوت ظافر مالي البيت بشقا وسوالفه شتاقيت من يصعد ع الكرويتات ويعلك اغاني بصوت عالي ويركص
الهدوء الي صار بالبيت بده يخنكني يوم عن يوم احس نفسي بديت ارجع لاسوء ايامي صوت الرمي الي صار قبل ايام هذا الصوت كان وحده كفيل انو يرجعني لايام داعش واصوات الرمي والانفجارات الي اسمعهن
كل مااجنت اكعد وحدي ترجع ذاكرتي لليوم الي دكو بيتنه بالرمي صوره رهف مستحيل تروح عن بالي وهيه مغطايه بالدم ابوي وحسام من ركضو بيها ورجليهم كلها دم اني كاعده بنص الكزار ومحاوطيني كرار وابو جاسم يحاولون يسحبوني يحاولون يهدوني
هذا اليوم مستحيل انسا مستحيل يروح عن مخيلتي صوره كرار من ركض عليه وشالني من الكزاز حسيت نفسي بديت افقد بعقلي كعدت ع الجربابه ارجف احاول اهدء نفسي ماجاي اكدر
باوعت للساعه 11 بليل فتحت باب البلكون وطلعت
للبالكونه اريد ارتاح اريد الهوه يدخل رئاتي ضليت بالنص ساعه واكفه ماعرف شريد
اباوع ع امل يجي ذاك الشخص الغريب الي ماعرفه منو ولا اعرف شريد منه بس احس نفسي اريده يجي مر الوقت واني ع وكفتي بس مااجه ولا شفته حسيت نفسي تغبت كلش دخلت وسديت باب البلكونه تمددت ع السرير ونمت حته التلفون نعزلت عنه صارلي فتره ماكامشته اصلا
كعدت ثاني يوم احس بكسل وارهاق احس جسمي متحطم نزلت البيت نفس ماهو هدوئه القاتل نزلت بكسل للمطبخ محد بي طلعت للحمام فتحت الدوش وطبيت جوا بملابسي بس اريد شي يخفف عن الي بداخلي
احس الماي من ينزل عليه احسه يزيح كل هم بداخلي طلعت من الحمام بملابسي الي ينكطن ماي صعدت لغرفتي بدلت ونزلت اتريك طبت امي
.. صباح الخير
.. صباح النور
... البوم عرس، بت ام نور
تستمر القصة أدناه
.. اممم ع الخير
.. يمه ليش ماتجين وياي لعرس بت ام نور عازمتنه اطلعي اختلطي بالناس اتعرفي ع ناس يايمه ليش حابسه نفسج
.. مالي خلك ماروح
.. ليش ياامي شوفي نفسج شلون صايره لا تطلعين ولا تطبين حته وجهج شوفي شلون صاير اصفر ليش هيج تسوين بنفسج حته مدرسه كلولج اخوانج رجعي ماقبلتي
دنكت راسي اكمل اكل ماجاوبتها لان مالي خلك لا اطلع ولا اطب مااحب اختلط بس من ادهم او ظافر يطلعوني اطلع وياهم وهم صارلهم فوك التلث اشهر مامطلعيني بسبب شغلهم
من شافتني ماجاوبتها سكتت واجت تطبخ غده كملت ريوك كمت كعدت بالصاله مر الوقت اجه ابوي وظافر
طب ظافر من الباب يصيح
.. يمعوووودييين وييين الاچل الاچل وييين
.. عزززا ظاافر منيلك هاي
.. سكتي انتي ولج يمااااااا الاچل ويييين
ابو ادهم: ومررررض صوووتك
ام ادهم: هااي اليوم منين سامعها وجايني راح تخبصني بيها ولك ظويفرررر
... هسه تنطوني اچل لو اروح الجوارين اكللهم اهلي ماينطوني اچل ذاليني
ابو ادهم: هو انت اكو واحد يكدر للسانك علمود ماننطيك
ام ادهم: اصبر خل اصبه يمه رنوس كومي تعاي وياي حضري
.. ههه كايمه
.. ي ي عفيه كون خوش اجل
امي جانت بالمطبخ طلعت بيدها الجفجير هو جان كاعد ع الكرويته ويصيح اريد اچل مدري منين سامعها وجاينه شاف امي اجته بالجفجير طفر صار وره ابوي يحامي نفسه
... ولكككك يبو ادهم دخيل عندك اني
... عابت هل وجه كممم مره كتلك لاتكول ولك
واكفه بباب المطبخ وميته ضحك ع شكلهم ظافر وره ابوي يطفر ع الكرويته وامي تريد تلوحه بس ابوي مانعها وكف ابوي وضحك دفعها ع كيف
... ههههههه لا لا دخل دخيل عندي بعد مايطيح بيدج تكتلي وهو بحمايتي
.. انطينيا انطينيا خبصنيييي
.... هههههه يمعووده خيولي
... منين ستمعها ولكككك
.. والعباس ابو فاضل هسه افضحكم اكللهم ماينطوني اچل ياااانااااااس يااعالممم اهللليييي ماينطوووني اچللل مجوعيييني يخلونيي انام جوعااان
