احببتها بعد فوات الاوان

2

Ahlem

اسمي احلام في عمري 24 كملت قرايتي و درك راني نخدم استاذة رياضيات في الليسي واش داني نحصل روحي الحصلة هذه 😅😅 قريب نهبل من يلي يقراو عندي بصح نستاهل واش درت فلي بروف لي قراوني خرج فيا درك😌 المهم انا الصغيرة تاع الدار و المدللة حاجة ماخاصتني ختي الكبيرة لينة نحبها بزاف بصح هكاك و بعيدة عليا و على هذا لي خبيت عليها بلي عندي واحد نحبو و بيناتنا نعيطلها هتلر تتحكم فيا بزاف و ماتأمنش بحاجة اسمها حب لحقت ل 30 و ملتزوجتش الكونفيونس تاعها في الرجال 0 . نحكيلكم على حبيبي آدم في عمرو 29 عندنا عامين كيفكيف بصح هذو ليامات مناش متفاهمين و هذا الشي كامل بسك حب يجي يخطب و انا ماقبلتش 😩😩 علابالي بلي تبانلكم بيزار بصح انا عندي اسبابي المهم اليوم كي نخرج من الليسي نتلاقاه و انشاء الله نقدر نحيلو الزعاف بلاك نتفاهمو .

خرجت من الليسي لقيتو يستنا فيا مزال زعفان مزير وجهو عليا 😅😅 هكاك و شباب (آدم جاي سمر و طويل عينيه نواغ شعرو يهبل و ديما متهلي في روحو طويل لازم نطلع راسي باش نهدر معاه 😂 مع لي انا بينازة ) شفت لبنات يكحلو فيه مابقيتش نشوف قدامي بعدو هذا تاعي وحدي رحت عندو بقا يهدر معايا بالبارد 😶😶 رحنا وين موالفين بلاصة كالم تطل على البحر

-واش ديسيديتي 😒

-في واش 😌

-احلام مانيش نتمسخر تهدري مع داركم و لا لالا

قلتي نكمل قرايتي كملتي وراكي خدامة درك ماكان والو نأجلو علاجالو

- بصح

-بصح واش😑

-قتلك بابا ماشي قابل يزوج الصغيرة قبل لكبيرة

-و ختك هذه درك علاه ماشي حابة تتزوج

- منيش عارفة كل مرة دير سبة اني حابة نحكيلها عليك بصح خايفة

-مناش خايفة

-نتا ماشفتش هتلر كي تتحول تقطعني و ترميني للكلاب ياكلوني

-و هي ماحبتش جامي قلبها حجر . بلاك عندها واحد تحبو و مخبيا عليكم و علاجالو ماشي حابة تتزوج

-ماشكيتش هي جاية سيريو بزاف و الوقت كامل مع خدمتهاو تلفونها تقيسو وين جات و ماشي دايرتلو حتى كود كون جا عندها واحد تحبو كون كاين دي ابال ولا ميساجات اي حاجة بصح هي والو

-و درك كيفاه .راني حاب نزوج 😌

-هههه ايه حبي مام انا حابة نزوجو بصح زيد اصبر عليا شوية

-اووف دايما اصبر اصبر كرهت

-حبي ماتزعفش علابالك بلي نحبك

- اعطيني نيمرو تاعها انا نتفاهم معاها نضن كي تكون هي قابلة باباك ماعندو علاه يرفض .

-آدم اني خايفة تزعف مني