احببتها بعد فوات الاوان

1

Lina

نضت الصباح بسبت التلفون كي العادة😩

-الو (بصوت ناعس)😅

-ماتقوليليش مازلتي مانضتيش

-لالا راني نايضة ني نلبس 😶

-بركاي بلا كذب و نوضي رانا روطار 😒

-مارانا روطار ما والو نتي لي ديما مبكرا ماعلابليش علاه

-شوفي انا رايحة نلبس عماد و نديه لماما نتلاقاو في السبيطار و مانلقاكش لتم و نتفاهمو

-يا عمري حبيب خالتو بوسيهولي 😍

-خفي بركاي بلا سماطة

-خلاص نضت ماما 😌 ماتضربينيش برك

-باي

كوباتلي في وجهي وجه النحس 😒😒

هههه علابالي ماراكم فاهمين والو انا لينة في عمري 30 سنة نخدم طبيبة جراحة مازال مازوجتش بعبارة اخرى منيش حابة نزوج حياتي فيها خدمتي لي هي حلم طفولتي و الحمد لله حققتوو عايلتي ربي يخليهالي ماما (نادية) و بابا (محمد) و ختي الصغيرة لي نخاف عليها كي بنتي (احلام) و بلاما ننسا صحبتي و ختي لي ماولدتهاش ماما (سيرين ) لي كانت تبهدل فيا درك 😂😂 .

نضت صليت لبست بالخف و درت خيماري و هبطت نجري الله غالب ديما روطار 😅

ركبت طونوبيلتي و رحت للسبيطار الحمد لله سيرين مازال ماجاتش كون كلاتني .

سرين صحبتي من يامات الليسي تعرف كلش عليا و اكتر وحدة تفهمني قرينا ميدسين كيفكيف ودرك نخدمو في نفس السبيطار هي مزوجة عندها ربع سنين زواج وعندها طفل اسمو عماد في عمرو عامين حلو سكر 😍 ربي يخليهولها.

لحقت سيرين جوزنا النهار تاع الخدمة كي العادة و رجعت للدار

-ماما اني جيييييت

-و نتي درك ماتكبريش لي قدك راهم بولادهم و نتي مازلتي تتبهللي على راسي

-تقول ضرتها ماشي بنتها الناس تقول تواحشتك

-ايه هديك نهار تحطي مخك في راسك و تقبلي بواحد من العرسان لي يجوك

-عاودنا ولينا لنفس لحكاية يا ماما قتلك مارتحتلهمش ما يوالمونيش

-يا بنتي راني على مصلحتك مبعد تندمي على هاذ العرسان لي راهم يجوك و مكيش صغيرة درك

-ايه ماما علابالي نخمم و نردلك خبر

- دايما تقولي هكا و مبعد نفس النتيجة و زيد ختك تان راهم يجوها عرسان و باباك يرد فيهم قال مانزوجش الصغيره قبل لكبيرة

- ماما شحال من مرة قلت ماتربطوش احلام بيا اذا قبلت بكاش واحد و كان يوالمها علاه لالا

-يا بنتي حابين نفرحو بيك

-ايه ماما انشاء الله .انا عيانه نروح نرقد

- ماتتعشايش

- منيش جيعانة تصبحي على خير

دخلت للبيت بدلت حوايجي صليت و حكمت بلاصتي و بديت نخمم كي عادتي في الخمس سنين التاليين الضحكة لي نخبي بيها وجعي كل يوم و دموعي لي تعرفهم غير مخدتي .سييت نقبل بواحد ملي خطبوني ما قدرتش قلبي مات من زمان و منيش حابة نضلم واحد معايا و انا مانقدرش نحبو ولا نفرحو ,قلبي لي كسرو و راح ماقدرتش نداويه و ماقدرتش ننسا مازلت حاسة روحي حابسة عند الدقيقة لي قالي فيها بلي راح يخطب وحدة خلاف النهار لي ماقدرتش ننساه نهار قررت نعيش لروحي و عايلتي و قرايتي و مالغري فاتو 5 سنين مازال مانسيتش الجرح لي سببتهولي ماحبش يبرا.

          ****************************

Houssem

نضت الصباح نخمم فيها كي العادة منيش قادر نحيها من راسي خرجت درت السبور وعاودت وليت للدار شربت قهوتي و ركبت الطونوبيل ديركسيون الشركة

انا حسام 34 سنة عايش وحدي في نيويورك عندي شركة تاع مواد تجميل الفرع الرئيسي في الجزائر لي خدمو بابا وتعب عليه و انا فتحت فرع جديد في نيويورك و وسعت الخدمة في الخارج عندي 3 سنين عايش هنا نروح للدزاير غير في المناسبات خطيني لبنات و التخلاط انسان بارد و بلا مشاعر كيما يقولو مادخلت حتى مرا لحياتي ملي طلقت قبل 3 سنين لاهي بخدمتي لي عطيتها كامل وقتي باش لحقت وين راني درك رجل اعمال الناس كامل تحسبلو الف حساب .

دخلت للشركة لقيت صاحبي و يدي ليمنا ايمن اكتر واحد نتيق فيه و بأر اسراري مالغري عندي 3 سنين برك ملي عرفتو بصح قلبي رتاحلو و كان قد الثقة لي مديتهالو في عمرو 30 سنة دايما يفكرني في خويا الصغير آدم بسك شخصيتو عكسي يضحك و يقصر بزاف و ديما يتبع في البنات هههه الحق كيما كنت انا بكري .

-صباح الخير boss

- ماتبركاش بلا جياحة راك كبير 😒

-ديما مزير وجهك الناس كامل تخاف منك شوف انا كيفاه كامل لبنات يحبوني 😜

-خليتلك التحلاب ليك 😑

-ايه علابالي ماتعمرلك عينك غير هي .

-😠😠😠😠😠

-خلاص ما قلت والو 😌😌

-شحال من مرة قتلك متزيدش تجبد عليها سور تكون مزوجة درك.

مالغري علابالو بلي قادر تكون تاع واحد خلاف درك بصح قلبو ما قدرش ينساها دايما يتعذب وهي بعيدة عليه راهو يخلص واش دار بعدها عليه و حرقلها قلبها بصح ماكانش علابالو بلي راح يحرق قلبو معاها .

             *******************

وصلنا للنهاية تاع البارتي الاول من حكاية لينة و حسام يادرا القدر يجمعهم مرة خلاف و واش من ضروف قادر يتلاقاو فيها و واش لي صرا بيناتهم بكري .
شكرا لكل من شجعني لنشرها 🥰💜