Houssem
بعد مرور 6 ايام :
غدوا الفاتحة تاع آدم نضت الصباح فطرت و خرجت ههههه الحق هربت من نانا يلي كلما تشوف وجهي تقولي نخطبلك خت لعروسة مافهمتش واش دارتلها هذه الطفلة باش عاجبتها لهذه الدرجة ( كون تعرف شكون 😂😂)و انا كلما تجبدلي عليها نلقا سبة و نهرب منها لدرجة معلابليش كيفاه سمها و مايهمنيش الدوسي تاع الزواج غلقتو خلاص مور الشي لي جوزتو المهم خرجت ندور تلاقيت صحابي لقدم .
كي كنت راجع لدار دراري صغار كانو يلعبو في وحد لحومة مافقتش حتى حسيت روحي قستو مالغري كنت نسوق بلعقل نزلت نجري و خرجت يماه من الدار الطفل الحمد لله ماصرالو والو بصح تخلع و انا اصريت نديه للسبيطار خفت الضربة كاش مادارتلو و مبانش برك درك لبست يماه و عيطت لراجلها و جا معاها واحد من دارهم يجي بلاك 18 سنة بسك ماتجيش تاع تركب معايا وحدها لحقنا للسبيطار دخلو يجوزولو و انا نستنا في الكولوار حتى شفتها فايتة باينة بلي ماشفتنيش ماتبدلتش بزاف زادت زيانت برك كانت واقفة تحكي مع وحد لمرا كانت تبكي وهي باينة تصبر فيها كي شفتها حسيت بجرح كبير في قلبي لي كان سبابو انا ندمت لي خليتها بصح واش يفيد الندم درك سور راهي بولادها وحدة كيما لينة امبوسيبل تقعد بلا زواج ديجا كي كانت تقرا وكانت معايا كانو يجو يخطبوها كل شهر تقريب و الحمار برك لي يخلي وحدة كيما هي تضيع من يدو و هذا لحمار هو انا .
كنت نشوف فيها نشبع في عيني منها بلخف فاتو 5 سنين من آخر مرة شفتها نهار خليتها و الدموع في عينيها و كون اوموا غلطت ولا كان غلطها الوحيد انها حبت و دارت كونفيونس في واحد مايستاهلهاش .
خرجت هذيك لمرا قاتلي بلي لازم يديرولو راديو قلتها نستناهم برا قدام السبيطار هما راحو و انا لحقت لينا لقيتها راحت عند طبيبة معاها شفت مليح لقيتها سيرين شحال ماكنتش نحملها الطفلة هذه كانت صحبت لينة من بكري بصح العكس تاعها في كلش كانت قبيحة و تهدر بزاف ههههه الحق مام هي ماكنتش تحملني اني سور بلي كي حبست مع لينة خممتتقتلني .مالغري راني نحس روحي نموت كل يوم تأنيب الضمير راح يقتلني بسك ضلمتها معايا كي تعلقت بيا رحت و خليتها و زيد لفكرة تاع انو راهي مرت وحدوخر حلالو تاعو تكمل على لي بيا الحاجة الوحيدة لي مصبرتني انو هيا انشاء الله تكون فرحانة و مرتاحة .كي شفتها تضحك مع صحبتها تبسمت بلاما نحس ضحتها سحرتني قادر تقولو علاه خليتها مادامني نحبها لهذه الدرجة لبروبلام ماكننش عارف بلي نحبها حتى خسرتها باش فقت " احببتها بعد فوات الاوان " علاه يا حسام مافقتش بكري علاه ضيعتها من يدك علاه قعدت نتفرج فيها حتى راحت .خرجت انا ستنيت هذيك لمرا برا كي جاو الحمد لله الطفل مابيه والو وصلتهم لدار و عاودت طلبت منهم السماح و قلعت للدار فتحتلي ماما لباب .
- جميلة: مرحبا بيك علاه طولت هكا قلتلي شوية و نجي
- حسام : و الله يا ماما كنت جاي قست طفل بالطونوبيل ساع ديتهم لسبيطار .
أنت تقرأ
احببتها بعد فوات الاوان
Romanceقسوة الواقع و بشاعة الخذلان في النهاية تنسينا جمال البدايات. لكن مهلا هل هذه النهاية؟! قصة باللهجة الجزائرية ممنوع النقل او الاقتباس اعادة نشر لرواية كتبت بتاريخ 30/06/2020
