احببتها بعد فوات الاوان

24

Ahlem:

رانا في الطيارة راجعين لدزاير جاز شهر العسل خير ملي تخيلتو لدرجة منيش حابة نرجع بصح لازم. و متأكدة بلي حياتي مع آدم راح تكون دايما حلوة هكا .

آدم: مرتي فاش راهي تخمم؟🙄
احلام: فيك
آدم: ربي يخليك ليا
احلام: زعمة لينا و حسام يكونو تفاهمو ؟
آدم : ماشكيتش لينا تسامحو باللخف هكا
احلام: نتمنالهم لهنا و خلاص ٫ حقا نروحو لدارنا قبل ياك؟
آدم : ايه ننزلو القش و نريحو شوية مبعد نروحو نزوروهم .

لحقنا للدار ريحنا مبعد رحنا لدار العايلة و تما آدم سمع واش صرا و زعف كي خباو عليه علابالي نيتهم مليحة ماحبوش يخسرو علينا الفواياج بصح آدم ماحبش كي خلا حسام حاصل وحدو ...... خلاني عندهم و راح للشركة باش يعاونهم .

            ~~~~~~~~~~~~~~~~~~~~~~~

Lina:

جازو سمانتين و انا في دار العايلة حسام كان يجي مامبا 3 سوايع في الليل و يرجع للخدمة و مرات يبات تم علابالي بلي ضغط كبير عليه و داخلي علابالي بلي تواحشتو بصح مانقدرش نبينلو و خصوصا انه بالي مشغول بمراد رجعلي تأنيب الضمير على واش صرا و الكوابيس مافارقونيش هذو ليامات كامل .

كانت فاتت 12 تاع الليل و حسام مزال ماجاش نضت نطفي الضو حتى سمعت الباب تحفتح .... كان يبان عيان لابس شوميزي و فاتحها شعرو مخسر و لحيتو طوالت قرب مني و حط راسو على كتفي كنت راح نبعدو حتى شدلي يديا و قالي: 

- لينة خليني هك شوية برك راني عيان و محتاجك .

الضعف و الاحتياج لي كان في صوتو خلاني رفدت يديا و عنقتو و خليت راسو على كتفي ... قعدنا مدة واقفين هكاك و ساكتين نفسو على رقبتي دوخني بصح  كي حسيت بشواربو على  رقبتي فطنت لوااش راني ندير ٫ يا الحمارة هكا راح تخليه يستغلك مرة خلاف ماتعلمتي والو من المرة لي فاتت ٫ طبعتو بعدتو عليا و قتلو :
- بلاك تمسني مرة خلاف و مانسمحلكش تقرب مني .
حسام: لينة راكي تعيطي و ماتنسايش مناش وحدنا و مانحبش صوتك يطلع مرة خلاف .

كنت راح نرد عليه بصح الخزرة لي كانت في عينيه و صوتو البارد خلاني نعرف انه نسكت خير في هذا الوضع خصوصا اني مشي حابة العايلة تعرف بمشاكلنا ٫ جاز قدامي رفد منشفة و دخل للدوش ٫ كيما سييت نرقد قبلما يخرج ماقدرتش ٫ كي سمعت الباب تاع الدوش لعبتها راقدة بقا ساكت و جا تكسل قدامي و رقد ٫ بعد مدة من التفكير داتني عيني انا تان .

ليامات لوخرين كانو عاديين بصح قلبي ماكانش مرتاح ٫ رجعنا انا و حسام لدارنا و من هذاك النهار ماعاودش سيا يمسني ولا يقرب مني و نتي علاه تحوسي يمسك 😑 .

خلاص الكونجي تاعي و جا النهار لي نرجع فيه للخدمة حسام ليام لي فاتو ماكانش يخليني نخرج وحدي و عيا يقنع فيا باش مانروحش نخدم بصح مانقدرش نقعد حياتي كامل خايفة لازم نتغلب على مخاوفي كي لقاني مصرة نرجع نخدم  قالي انا  نوصلك ونجيبك من الخدمة كل يوم و انا ماعارضتوش خير ملي مانخدمش كامل اصلا لقعاد في الدار راه يزيدلي كنت نسيي نخبي على حسام بصح الكوابيس مافارقونيش و هكا ينقص خوفي شوية بسك كي يكون حسام معايا نحس بالامان مهما نحاول نرفض ولا نكذب بصح بديت نتقبل وجود حسام في حياتي من جديد .

لحقني حسام للسبيطار و كي جيت نازلة قالي :
-  حسام :لينة بالاكي على روحك و اي حاجة تصرا عيطيلي .
-لينة : راك تخوف فيا هكا ٫ كاشما صرا و ماقتليش ؟
- حسام: مكان والو علاه ماعنديش الحق نخاف على مرتي😏
-لينة : 😑 راني رايحة
- حسام : الناس تقول تبقى على خير راجلي لعزيز بالاك على روحك ماشي راني رايحة 😒.
مارديتش عليه و نزلت من الطونوبيل حتى سمعتو يعيطلي درت قالي بين شواربو بلا صوت : نحبك .

مالغري زعافي منو و كامل واش صرا و مالغري قالهالي من قبل كذب شحال من مرة كي كنا كيفكيف بصح دك راني حاستها من قلبو و هذا الشي خلى قلبي راح يخرج من بلاصتو .

                    ~~~~~~~~~~~~~~~~~~~

Houssem :

و اخيرا كملت الخدمة و قدرنا نعوضو السلعة لي تحرقت جازو ليامات طوال و صعاب تواحشت فيهم لينة بزاف و خوفي عليها كان غير يزيد مالغري الضغط تاع الخدمة كنت دايما نروح في الليل نشوفها مرات تكون فاطنة بصح اغلب الاحيان مافاقتليش كنت نشم ريحتها لي تحسسني بالراحة و تنسيني التعب و نبوسها من جبهتها و نخرج و طبعا هي مافاقتش كون تعرف تدير حالة .

كنت نخمم غير وينتا نلحق للدار و نعنقها حضنها يكفيني و فرحت كي خلاتني نحط راسي على كتفها و نعنقها بصح ماقدرتش نتحكم في روحي ريحتها و رقبتها البيضة شهاتني بستها بلاما ننتبه و كان رد الفعل كيما توقعتو و تما وعدت نفسي مانزيدش نقرب ليها كامل حتى تكون راضية منيش حاب نضغط عليها و لا نخليها تكرهني كتر .

رقدت قدامها هذيك الليلة و كي العادة صبحت معنقتني مكاش حاجة نحبها هذو ليامات قد حركتها في الرقاد 🤣❤️٫ الصباح رجعنا لدارنا.

لينة كانت في البيت و انا قاعد نتفرج حتى لحقني ميساج في التلفون  كان فيه :0 . قلت بلاك كاش واحد غلط ولا بصح هذا كان الميساج الاول و في اليامات لي وراه كان كل يوم يلحقني مساج و كان في كل واحد منهم رقم على الترتيب 2 0 0 1 6 0 8 2 0 2 و كل ميساج من نيميرو جديد و كي سييت نعيطلهم نلقاه مغلوق  و كي قلت لبلال لقا بلي النوامر بأسماء اشخاص عشوائيين مايڨزيزتيوش اصلا.

القلق و الضغط كان يزيد كل يوم كتر ملي قبلو و انا خايف على لينة روحي ماتهمنيش خبيت عليها حكاية ليميساج منيش حاب نخوفها كتر  اصلا مسكينة الليل كامل و هي تنام و خايفة كانت تفطني نعنقها حتى تروحلها و عييت نقتعها ماتخدمش هذه الفترة بصح والو راسها حجر بصح من حيهة مناش عارفين لوينتا راح يبقا هذا لي قاصدنا يتبع فينا يسما مانقدروش نحبسو حياتنا علاجالو و كي خلاتني نوصلها و نجيبها تطمنت شوية .

وصلت لينة للسبيطار و رحت للشركة كان عندي اجتماع مهم تلهيت معاه كي خرجت رفدت التلفون لقيت 2 ليزابال من عند لينة و مساج جديد من رقم مجهول مكتوب فيه : 2

             ~~~~~~~~~~~~~~~~~~~~

لحقنا للنهاية تاع هذا الفصل من الرواية 🥰 الاحداث راح تدي منعرج جديد و راح تكون حماسية ❤️ ترقبو الفصل القادم عن قريب .
يادرا الرسائل واش موراهم ؟؟ خلولي اراءكم في التعليقات 🥰💜.
فوت للأجزاء و خلولي تعليقاتكم تدعمني و تشجعني باش نكتب 🥰