احببتها بعد فوات الاوان

11

Houssem

وجدت روحي و رايح نتلاقا بلينة لحقت للسبيطار سقسيت عليها قالولي راهي في البيرو الفوق طلعت دقدت دخلت كانت قاعدة في الكرسي و حاطة راسها على يدها و تخزر لتحت باينة عيانة طلعت راسها تشوف فيا كانت اول مرة نشوفها مليح هاك من 5 سنين بسك آخر مرة شفتها من بعيد قعدت غايس فيها حتى سمعتها .

- تفضل اقعد

كانت تحكي بالبارد و باين من وجهها بلي ماشي حاملتني النضرة لي كانت في عينها جامي شفتها من قبل ااه يا حسام واش كنت متوقع تقابلك بالاحضان و تقولك توحشتك

- واشراكي لاباس

- الحمد لله و نتا صفا ؟

- لباس الحمد لله

- المهم عيطتلك باش نقولك تبطل حكاية الخطبة هذه

- علاه

- خليني نكمل هدرتي ماتقاطعنيش من فضلك . عندي واحد في حياتي و نحبو و ماراحش نزوج غيرو .

انا مور الهدرة هذه حسيت قلبي نقسم صح توقعت انو عيطتلي باش تقولي مهيش قابلة بصح ماجاتش في بالي بلي تحب وحدوخر هههه علاه ماجاتش في بالك نتا تزوجت و طلقت و هي حابها ماتحبش موراك علابالي بلي ماشي من حقي نزعف بصح وليت نغلي الفكرة تاع تحب واحد خلاف دمرتني .وليت نهدر وخلاص .

- و كي تحبيه و يحبك علاه مازوجتوش لدرك

- حاجة ماتخصكش المهم بعدني و ماتخسرليش حياتي

- اذا ماكيش حابة ماتقبليش ساهلة و شوفي حبيب القلب يجي يخطب

- اوووووف انا قلت لي عندي و مانضنش تقبل على روحك تزوج وحدة في قلبها وحدوخر

الطريقة لي تهدر بيها استفزتني بزاف و زادت ناضت و فتحت الباب و قاتلي

- تقدر تروح درك .

و تحاوز فيا تان .نضت غلقت الباب بالخف و حصرتها معاه درت يديا من و من باش ماتقدرش تهرب و قلتلها :

- كي تحبي تهدري مع كاش واحد شوفي معاه .

كي قلتهلها هكا خزرت في عينيا اول مرة ملي بدينا نحكيو و ياريتها ماشافت زدت غرقت فيهم كتر مع شفرتيها لي يهبلو .

- بعدني خير ملي نعيط نلم عليك السبيطار

- لينة بين زوج علابالنا بلي ماتعيطيش نعرفك ماتحبيش لفضايح .

- هههه هذه بكري .

شفتها راح تعيط صح غلقتلها فمها بيدي حسيتها تطبع فيا بيديها بصح قوتها ماتدير والو قدامي شعرة ماتحركتهاش .

- راح نحي يدي بصح كون تعيطي ندير حاجة ماراحش تعجبك .

دارتلي براسها ايه

- بعد عليا واش تسحق مني مانيش قابلة نتزوج بيك و نحب وحدوخر

- ماتزيديش تقولي لكلمة هذه قدامي

- ههههه نقول واش نحب و اصلا هذه الحقيقة و نتا ماعندك مادخلك

ما كنتش مأمن بلي هذه لينة لي راهي تهدر معايا حبيبتي العاقلة الساكتة ولات هكا وعلابالي انا السبة و زيد نضرات الكره لي كانت تشوف فيا بيهم قتلوني فقت مع راسي انا مانستاهلهاش و مالازمش نخسرلها حياتها كتر من هاك مادامها حبت واحد خلاف اااه الكلمة و ماشي قادر نتقبلها بصح لازم المهم تكون فرحانة و مرتاحة تم قررت نبطل حكاية الخطبة هذه و نرجع للماريكان و مانوليش حياتي كامل قراري هذا علابالي بلي راح يقتلني و عادي وقتاه قررت حاجة و ماخليتش الدنيا بسبتها المهم المرة هذه تكون لينة فرحانة هذا الشي يكفيني ...بعدت عليها وهي جات تفتح الباب

- استناي ...غدوا نهدر مع باباك و نقولو بلي بطلت ربي يوفقك في حياتك اتهلاي في روحك ماراحش نزيد نديرونجيك كتر من هك و اسمحيلي بزاف .

شديتها من يدها عنقتها قريب كسرتلها عضامها كانت تسيي تبعد فيا حبيت نعنقها آخر مرةقبلما نختفي من حياتها قلتلها في ودنها

- نحبك ... تبقاي على خير .

و خرجت و خليتها راجع للدار مدمر مور ما خليت قلبي عندها و علابالي بلي نستاهل بصح هذا الوجع ماشي نورمال اني حاس كلي روحي فارقتني مور ما كان عندي أمل صغير انو نرجعو كيما بكري كلش ضاع درك .

                 *****************

Lina

كملت الخدمة ليوم و كنت ميتة بالعيا كان عندي بزاف les opérations كمت قاعدة في البيرو و حاطة يدي على راسي خزرت فيه ماتبدل فيه والو تقريب حسيت كيشغول البارح شفتو ماشي من سنين و زدت تفكرت كيفاه خلاني جاتني لبكية بصح ماحبيتش نبينلو هدرت معاه عادي زعما ماهمنيش و هو بقا يسقسي علاه مازوجتوش يا خويا واش دخل جدك فيا قلتلو لي عندي هدرتو و حاوزتو من البيرو ماحسيتش حتى لقيت الباب مغلوق و ضهري عليه و هو قدامي قريب لاسق فيا و غالقلي بيديه باش منقدرش نهرب قعدت مشوكية و قلبي يضرب في الألف من قربو و ريحتو لي دوختني يا المهبولة واش راكي تخممي آه وقت مراهقتك المتأخرة درك قالي كي تحبي تحكي مع واحد شوفي فيه و انا صح كنت نهدر و مبعدا عينيا منو باش ماتغلبنيش البكية طلعت راسي و شفت فيه بكره مالغري كنت دايبة قبل ثانية بصح مالزمش نبينلو بلي يأثر فيا لازم نحرقلو قلبو كيما حرقلي قلبي قتلو بعد ولا نعيط غلقلي فمي بيدو سييت نبعدو ماقدرت تقول حجرة بعد يدو و لا هو يهدر و انا نردلو ماعيطتش بسك خفت يبوسني عرفتو بلي قصدها مع الطريقة لي كان يخزر بيها لشفايفي فضحتو حتى لقيتو بعد جيت نفتح الباب و نخرج حتى قالي بلي خلاص راح يبعد عليا و يخليني نكمل حياتي كيما نحب و ميزيدش يديرونجيني فرحت لي تهنيت من هذه لحكاية درك نقدر نكمل حياتي كيما كنت شوية حسيتو جبدني ليه و عنقني سييت نبعد مقدرتش قلبي بدا يخبط بالفور و زاد كمل عليا كي قالي نحبك حسيتها بلي من قلبو بصح كذبت روحي منقدرش نأمنو مور كلش صرا قالي تبقاي على خير و راح معلابليش علاه حسيت بنفس الشي لي حسيتو قبل 5 سنين بداو دموعي يهبطو و هذه المرة سور آخر مرة نشوفو حكايتنا خلاصت هنا مكاش نهاية خلاف ليها مكتوبلنا الفراق بسك الشي لي تكسر بيناتنا امبوسيبل يتصلح .

               ****************
Bon l7a9na lnihaya ta3 lpartie hadi tfa3ol ta3kom ychaj3ni w ykhalini naktab blkhaf mrc ❤😊 lkaml li yda3mouni .
Li 3ajbato l7kaya vote w commentaires l les partie ❤❤