احببتها بعد فوات الاوان

12

Lina

البارح هدرت مع حسام الحمد لله لي امن بلي نحب واحد خلاف و خطاني بقا غير يهدر مع بابا باش تنغلق هذه لحكاية لي ماكانش لازم تنفتح من الاول كاين كتابات كي نغلقوهم مالازمش ينفتحو مرة خلاف و انا حكايتي معاه ولا مع الحب على العموم غلقتها خلاص المهم رحت خدمت جاز نهار عادي كيما كامل ليامات رجعت للدار دوشت لبست بيجامة و رحت للكوزينة نعاون ماما في العشا .انا مع ماما في الكوزينة و بابا عيطلي كان قاعد في الصالون رحت عندو

- وي بابا

- اقعدي بنتي نهدر معاك .

قعدت مقابلاتو

- عيطلي عبد الرحمن على الموضوع تاع الخطبة تاعك نتي و وليدو .

انا قاعدة نستنا فيه يقولي بلي بطلو و المكتوب مكاش و كالعادة بابا شوكاني بهدرتو كي قال .

- راهم حابين نردو عليهم بالخف بسك حسام حاب يفري كلش قبلما يرجع للماريكان .

- كيفاه نفريو كلش ؟؟؟

- قالي بلي حابين يديرو الخطبة و الفاتحة و العرس كي يرجع .

انا بقيت ساكتة كيفاه هذا درك يتمسخر بيا البارح بهدرة و اليوم بهدرة واقيلا حسباتلو انا لعبة عندو.

- لينة انا من جيهتي قابل الطفل ما شاء الله تربية و اخلاق و وليد فاميلية .

هههههه ايه اخلاقو انا لي نعرفهم 😑😑😑 .ايه يا سي حسام نتا دير لي في بالك و انا تان ندير واش نحب .

- بابا منيش قابلة.

- علاه يا بنتي انا راني حاب نتهنا عليك انا و ماماك مابقالناش في العمر كيما فات

- بعيد الشر عليكم بابا واش الهدرة هذه

- الاعمار بيد الله .خممي مليح و صلي استخارة و رديلي بلخبر هكا بنتي .

- حاضر بابا .

رحت ديراكت لبيتي بسك علابالي كون نروح للكوزينة تصرعني ماما بأقبلي و ماكيش صغيرة و لي قدك كامل زوجو المهم نفس الهدرة لي حافضتها .

غلقت عليا الباب وعيطت للكلب تاع حسام ... اوووف وزيد مايردش 😠😡😡. قعدت نعيط و نعاود والو كرهت رميت التلفون و تكيت في فراشي نخمم واش بدلو رايو البارح قالي نبطل و درك يقول ردو عليا بالخف و لا يكون يتمسخر بيا من الاول اووووف راح نهبل .اذا دخلت لسبيطار تاع لمهابل هذا هو سبابي .

                  *****************

Houssem

اليوم قلت لبابا باش يحكي مع عمي محمد على الخطبة و يردو علينا بالخف و درت السبة بالخدمه وبلي لازم نرجع للماريكان في اسرع وقت بصح في الحق خفت اذا هذه المرة كذبت وقالت بلي كاين واحد في حياتها قادر كون نزيد نخليلها وقت قادر تلقا واحد يجي يخطبها مكرة فيا باين بلي عندها معجبين بزاف و آدم قالي بلي خطبوها بزاف و ماقبلتش الحق كنت صح ناوي نخليها تعيش حياتها و عفست على قلبي قلت لابغة مع واحد خلاف المهم تكون فرحانة بسك صح مانستهلهاش بصح المكتوب كان عندو راي خلاف.