Lina
جازت سمانة على الخطبة تاع احلام ماصرا فيها والو. عادي بين الخدمة و الدار المهم كنت نغسل في لماعن تاع لعشا بعد حرب طويلة عريضة مع احلام و في التالي حصلو في راسي 😒😑 و كي كملت رحت للصالون كانو كامل قاعدين حتى نطق بابا
- محمد : لينة
- لينة : وي بابا
- محمد : بلاما نطول الهدرة خطبوني فيك و الحق انا الطفل عاجبني ناس ملاح و وليد فاميلية.
يا ربي ولينا لنفس لحكاية مارانيش حابة نزوج ريلاكس لينة ليكيديه كيما العادة
- نادية: ايه مليح خلي يجيو نتعرفو عليهم و نشوفو
- محمد : مانحتاجوش نتعرفو عليهم لجماعة نعرفوهم اصلا و يسماو من العايلة .
ماتقوليش راهو يهدر على محمود وليد بنت خال بابا شحال من مرة قتلو خطيني و مزال حاصل في جدي ديجا امبوسيبل نروح نسكن في الدوار تاعهم هداك
- نادية : شكون هذا ؟؟؟
هذا الشي كامل و انا ساكتة كيشغول الموضوع مايخصنيش بصح لجواب تاع بابا شوكاني
- محمد : خوه لكبير تاع آدم إسمو حسام
كيفاه وايت يا جماعة افهم بس حسام خطبني من عند بابا 😵 واش من وجه عندو كنت عارفة بلي رخيس و خداع بصح اكتشاف جديد انو وجهو صحيح و مايحشمش😡 في الوقت لي كنت نغلي وحدي للداخل كنت غايسة و بابا يهدر معايا و انا خارج نطاق التغطية.
محمد : لينة لينة وين رحتي يا بنتي
- لينة : انعم بابا
- محمد : واش رايك
- لينة : نخمم و نقولك
نضت و خليتهم قاعدين رحت لبيتي غلقت عليا الباب و قعدت نخمم و نسب في حسام الحق كنت ندور في البيت و نهدر وحدي كيما لمهابل حسيت روحي راح نطرطق لازم نهدر مع كاش واحد سينو نموت رفدت تلفوني بعت ميساج لسيرين
لينة: سيرين مازلتي نايضة؟؟
شوية لقيتها عيطتلي
- سيرين: غير الخير لينة واش كاين خلعتيني مساج على 11 تاع الليل و بديتي بأسمي نتي تعيطيلي بأسمي غير كي تكون كاينة كارثةانطقي واش كاين
- ونتي خليتيني نهدر 😒
الله غالب صحبتي كالية فلاش ديسك كي تقلع تهدر متعرفش تسكت
- اهدري خير مانخرجلك من التلفون
- خطبوني
- وينو لجديد في الحكاية نتي راح تحطمي الرقم القياسي في رفض الخطابين
- اوووف خليني نكمل هدرتي
- خلاص سكت 😌
- لي مايتسماش خطبني هدر معا بابا اليوم و بابا راهو عاجبو 😞
أنت تقرأ
احببتها بعد فوات الاوان
Romanceقسوة الواقع و بشاعة الخذلان في النهاية تنسينا جمال البدايات. لكن مهلا هل هذه النهاية؟! قصة باللهجة الجزائرية ممنوع النقل او الاقتباس اعادة نشر لرواية كتبت بتاريخ 30/06/2020
