هينة والغول👹مكتملة👹

👹الجزء 2👹

#هينة_والغول
#بقلم: #سناء_الصنهاجي
2- شدو طريق الغابة بضحك ولعب والحتيت كل وحدة وهمة وحدة همها العطار مول الحمار ولوخرا همها الخراز وتانية همها مول ثواب وكل وحدة وشنو همها من غير هينة لي دور وضحك عليهم وحدة بوحدة حيت هيا أخر همها هو رجال بنسبة ليها ماشي هوما محور الكون ودنيا...وصلو لبين شجر فرشو ربيع وكلسو يغنيو وحتى وحدة مدارية بالوقت حتى نبهاتهم او وكضاتهم هينة بنت حليمة..
هينة : واشتكم توسدتو الأرض وعجباتكم الكلسة واش انتوما جايين تجمعو الحطب ولا تغنيو هادو هوما لي كانو زربانات
ياقوت : والله أهينة حتى لكلسة معاك كتونس حتى كنساو راسنا وخيمتنا
هينة : وبراكة من الهضرة ويلاه كفضو على كمامكم وزيدو نجمعو الحطب قبل مايبرد ويطيح عليه الندى ومنلقاو مانشعلو فيه..ناضو البنات نوضة وحدة وكل وحدة تحنات وكفضات ولحطب جمعات كل وحدة فين داتها إيديها وهينة متلية لور وعينيها تبقشش على كل خشبة زينة ومتينة عينها لمعات بانت ليها حديدة من الفضة كلها منقوشة لي شافها مايقدرش يزول عينو عليها عين عينة لمعات وتعجبات هزات ديك الحديدة ودارت بين الحطب وكملات...سلاو البنات جميع الحطب وشدو طريق الرجع وفكل خطوة كتخطيها هينة كطيح ليها الحديدة تحنى وتعاود تهزها وتكمل طريقها ولكن فكل مرة كانت كتعطل حتى نباتها ياقوت :
- وهينة سربي خلاص الشمس غربات راه تعطلنا وعارفة با
هينة(شيرات ليها بيديها) :
- صافي غير سبقوني انتوما وانا نخلط عليكم..حركات ياقوت كتافها وكملات طريقها...الشمس غربات وبلاصاها القمر لي نورو ضوا المكان...هينة عيات وكل مرة كتكول تحط الحديدة وتكمل طريقها كتعز عليها بشكل ديالها حطات الحطب من إيديها باش ترتاح كلسات جنب شجرة كتشوف فديك الحديدة حتى بدا واحد الضو فالخضر كيعطي منها وسخونيتها كتحرق لاحتها هينة من إيديها وتغوبيشة على وجها والحيرة خرج من الحديدة دخاان كحل كيخنق خلى هينة تغمض عينيها ودير إيديها على فمها وتكح...شوية بشوية بدات ريحة الدخان كتمشي والهوى كيطلع ويهبط فروح هينة بدات تحل فعينيها شوية بشوية كيبانو ليها رجلين كحلين موسخين غير صباع لي باينين والمباقي مغطي بدربالة كحلة مقطعة لدات طلع عينيها حتى بان ليها وجه يخلع حجبان مزديين وسنان كحلين بحال الفاخر يدين طوال وظفارهم طول منهم موسخين شادين فعمود راسو بيض ونصو كحل شعر طويييل مخبل لي شافة ايعرفو سنين مشاف الما هينة ماعرفات باش تبلات ماعرفات هاد الخلقة لي قدامها واش من الإنس ولا من الجان تعودات من شيطان الرجيم ومابيناتش خوفها ليه..
هينة(من بعد سكاتها نطقات) :
- شكون انت واشنو بغيتي مني؟...مجاوبهاش فالحين من غير شوفاتو لي ممفهومين مستقرين على وجها..وبصوت خشين وتقيل جاوب..
- أنا الغول لي قطعت جبال وبحور انا مول جبال لي دزت عليها نخليها تهضر سوا كانت بهيمة ولا غنم
هينة : وشنو بغيتي مني اسي لغول لي قاطع لجبال والبحور؟
الغول : بغيتك تكوني عمارة داري بليل تحكي ليا راسي وبنهار تغزلي ليا كساتي
هينة : كتحلم عمري ليك لانكون ومخايفاش منك الخوف من الله سبحانه ولي فجهدك ديرو ولمخير فعودانك ركبو..غوبش الغول وزفر زفرة وحدة وشاف فيها شوفة طويييلة..
الغول : عندك الزهر أهينة بنت حليمة جيتيني فنهار طالعة فيه الكمرة ولكن طوال زمان ولا قصار غادي تكوني فغاري ولكن كوني على بال أهينة نهار حليمة دير السمن مالح ويكون نهار سوق وتكون سما غايمة وسحاب هايمة وشتا هايجة انجي نديك كوني على بال أهينة كوني على بال...فلحظة طار وطاحت الحديدة من سما هينة بقات لحظة كتشوف مصدومة معارفة مادير حتى وقفات عليها مها تعيط بسميتها وتقلب..
حليمة : اويلي على البنت من صباح بلحوحي خرج بالغوات ماخليت فين قلبت عليك وانت كالسة ليا هنا كاع بنات دوار رجعو لخيامهم حتى ليك انت..عاد نتابهات هينة لمها وفاقت من سهوتها..
هينة : الا أمي راه غير عييت شوية وكلست نرتاح
حليمة : انت رتاحي وانا خرجيها مني خلعة يلاه زيدي كدامي راه باك كيقلب عليك..هزات هينة الحطب وتبعات مها من اللور وهي كدور وتشوف فديك الحديدة لي خلات حتى غيرات على عبنيها ولدارهم وصلات...
#يتبع