هينة والغول👹مكتملة👹

👹الجزء 14👹

#هينة_والغول
#بقلم : #سناء_الصنهاجي
14- وقفات حليمة كتشوف فيه
حليمة : تا كيفاش لي بان ليك ديريه واش انت تخورجتي فعقلك اويلي بغيتي تسيفط البنت مع راجل ماهو خوها ما راجلها ما والو الراس فراس واش عندك شي عقل ولا متكسابوش أهاد الراجل
علال : سمعيني هاد الوقت راه تيقي فالبراني وماتيقي فلي من دمك ولحمك يغدرك وينهش لحمك وزايدون انا مربي وعارف شنو ربيت وشنو داير فكتافي وبيمن محزم وزايدون بغيتينى نكولو لا لسلطان بقدو وقامتو طرق باب بنتها وطلب منها العوين نوضو حنا نكولو ليه لا سمحلينا لالة حليمة مابغاتش اتي تركني أهاد المرة ودعاي مع بنتك وكولي كلمة زينة لا لفم لي يكول زمر يكول تمر
حليمة : انتوما خليتو فيها شي تمر ولا شي أبلوح انا هزيت يديا ولي بغيتو ديروها ديروها ومنهظر معاك حتى تجي تشكي عليا واديك ساعة نهضرو اسي علال...دخلات حليمة لبيت زعفانة وماعجبها حال عندها صح بنت وحدة لي عندها عوينة خايفة عليها ديما متبوعة من صغرها وكولشي عينو عليها من زينها وسالفها وشطارتها هادشي لي مخلي بنات دوار قرابين ليها ومامرة ماجوج دارت بيها غير ربي جا من جبهتها وصافي خلاوها ناس زمان الحجلة الخفيفة من سعد الصياد وهيا خايفة على بنتها من هاد الزعامة الزايدة..
- دازت الليلة طويلة على هينة مفرشة رجليها لضس ومقابلة مع الكمرة لمضوية سارحة بتفكيرها علاش وكيفاش علاش لي لجأ ليها مكتردوش معندهاش كلمة لا فمها بالعكس كتكون فرحانة منين تعاون وعلى حيلتها يعولو الناس...ولكن علاش بالها مهاني علاش تفكيرها غادي بعيد علاش حاسة بلي هاد المشية فيها إن ومغادوزش غير هكاك...حسات بيد على كتفها علات راسها بانت ليها مها تكات وكلسات حداها..
حليمة : شفتك مجاك نعاس!
هينة(تنهدات) :
- نعاسي هرب وشمسي غربات أمي
حليمة : شنو خالعك عاد كبيلة كنتي زاعمة ومخرجة عينيك
هينة(شافت فيها) :
- ماعرفتش أمي واخا كدار بيا مامرة ماجوج وعارفة بنات دوار قراب ليا غير على لمصلاحة ولكن مكنقدش نرد الواحد وانا عارفة انفعو بحيلتي وشطارتي معرفتش علاش مافياش سم لي يكول كلمت لا ويرد ناس؟
حليمة(ضحكات) :
- السم أبنتي مامعطي لا لهلنا لا لجدودنا جداك الله يرحمها كانت بحالك هكا كانت حكيمة كداوي بلعشوب داوي لمرا لعاكرة ولي فيه البهق والبرص ولي فيه بوصفير ولي فيها القمل متردش شي واحد جا دق بابها واخا كتعرفو طامع فيها إيييه شحال تعلمو من عندها شلا ناس وعمرهم ما جاو طلو عليها وهيا في فراش الموت وكانت تبسيمة ماتخطاش وجها وتكوليك الله يهدي ماخلق مادام ربي عاطيني هاد نعمة علاش نخبيها معندك مديري أبنتي واخا انا هاد المشية معاجبانيش ولكن الى كانت تنفع سلطان وترد ختو لقبيلة غير سيري وخلاوها ناس زمان دير لخير ونساه ومتعرفي هاد الخير لي درتي مع سلطان يرجعو ليك شي نهار انا مغاديش نوصيك حيت عارفة تربيت إيدي انكوليك غير الله ينجيك ويرضي عليك..
- تحنات هينة على إيد مها باستها عاد طمنات ورتاحت وناضت تنعس حيت غدا تابعاها طريق طويلة..
- ماتعرف العدو من الصديق غير فشدة وضيق..
- صبحات الشمس مكلكلة فاقت هينة مع صياح الديك دارت لي كدير كل صباح وراها جابت واحد التوب جمعات فيه حوايجها دبالجها وخواتمها..جمعات رزمتها وخرجات لقات مها كتعجن نزلات على راسها وباستو علات فيها مها راسها
حليمة : صافي نويتي؟
هينة : دعاي معايا أمي
حليمة : أنا فكل صلاتي كنداعا معاك ويلاه سيري سيري يلاه تلحقي على باك لحانوت...عطاتها حليمة بظهر مابغاتش تشوفها وهيا غادية واخا هكاك قلبها مامهنيش من جيهتها
هينة : ماغاديش تسيفطي معايا أمي؟
حليمة : مالكي غادية راحلة غير أيام وراجعة يلاه سربي ومتعطليش...شافت هينة حتى عيات وخرجات...تنهدات حليمة تنهيدة طويلة وعينها غرغرات بدموع هزات كفوفها لسما وداعات مع بنتها بتيسير الأمور ويبعد عليها شر الخلق وشر طريق..
مشات هينة لعند علال لحانوت تسيفطات معاه باس ليها راسها وعطاها واحد الثوب او واحد الحايك وشربيل داعا معاها مسكين عاد مشات...والدين هينة مكاينش بحالهم فناس زمان تايقين فبنتهم ولي دارتو على قلبهم سمن وعسل مكيرفضو ليها حاجة وليكالتها هيا لي كاينة بنسبة ليهم هيا كنز كنز هداه الله ليهم من بعد سينين وسينين بلا ولاد بلا وتاد حتى ربي فرجها وفتح حزام حليمة وجات لدنيا بنية عمرات عليهم الدار ماخصوها من حاجة ومامخصرين ليها حتى حاجة وحتى هيا بنت تابتة وتقيلة حكيمة ورزينة الله يعطيها لكل عزيز وعزيزة..
# يتبع..