هينة والغول👹مكتملة👹

👹الجزء 9👹

#هينة_والغول
#بقلم : #سناء_الصنهاجي
9- هينة خرجات فيه عينيها كترمش بعينيها شنو زعمة هيا فقصر السلطان يوسف...فيقها من سهوتها غير صوتو لي زعزعها
يوسف : راه سولتك فين هيا لالاك رحمة؟
هينة : وانا باش غادي نعرف فين هيا ختك وازوينة هادي تاني
يوسف : هضري مقاد ولا مايعجبك حال وجاوبي على قد سؤال وبراكة من الكذوب عندنا ناس شافوها معاك شوفي عندك جوج حلول ياتكولي فين هيا يا مغاديش تخرجي حية من هنا
هينة : وعلاش وعلاش امولاي مالي قاتلة روح شوف نكوليك اه انا كنت مع ختك ولكن وثفو علينا شي ناس هيا داوها وانا رماوني فالواد وضربوني وانت راه شفتي حالتي
يوسف : أبراكة من الكذوب وتنوعير راه جابو ليا خبارك دوك تحريميات ديالك مديريهمش عليا موصية وحدين يخطفوها باش طلبي المال وذهب والله لا كانت ليك
هينة(خرجات فيه عينيها) :
- أيوا أيوا يكما عند بالك كاع طامع فمالك وزايدون كون كنت انا من داك النوع كاعما تصيبني هنا ختك وا خطفوها القطاطعية وبودنية سمعتهم بغاو يديوها هدية والى ماتيقتيني لي جاب ليك خباري يجيب ليك الخبار الصحيحة...وقف سلطان مغوبش وتم جاي عندها اشافتو وقفات وتمات راجعة باللور ماتحشم ماترمش..
يوسف : شكون هادو لي داوها؟؟هضري تكلمي
هينة(كتمتم) :
- شي شي وحدين لابسين لكحل طوال وعراض ودايرين لتام كايبان فيهم العينين وهازين سيوفة قدك فطولة..(كترمش بعينيها وتحنزز فيه)
يوسف : وعلاش داوها هيا وانت لا شي حيلة هادي أفليفلة
هينة : بغاو يديو غنيمة مضخمة مشحمة أش عندهم مايديرو بدجاجة كتعرف اتصيح وتلعب برجليها حدهم ضربوني وفالواد لاحوني..
يوسف(مغدد) :
- أنت سباب بسبابك ختي رحمة مخطوفة مدوزاها من طريق خاوية مافيها حس بنادم وبغيتيهم يقيلوها دابا شنو اندير فيك شنو..
هينة(صغرات عينيها) :
- ومالي انا نهار ومطال وانا كندور فديك طريق عمر شي واحد قاسني ولا مسني وزايدون ياك انت حاكم هاد الدوار انت لي خاصك تعرف شكون داخل وشكون الخارج خلاوها ناس زمان اللي مايخيط كساتو يطيب غداتو ويحلب شاتو موتو خير من حياتو...نقز على دراعها يوسف لواها ليها حتى غوتات
يوسف : أسمعي اديك لكملة اتسدي عليا فمك ومانسمعش كلامك نسيتي راسك فين ومعامن كتهضري كبر ليك الشان والمرشان وعدتي حتى انت تهضري وطول ليك لسان
هينة(مغمضة عينيها) :
- انا ماكلت غير لي كان والخوف من الله سبحانه اما العبد بحالنا بحالو
يوسف(كيهضر من تحت لسانو) :
- حلي ودنيك مزيااان دابا انخليك تمشي فحالك ولكن بحال هاد الوقت غدا تكوني هنا تفكري فشي حيلة تحلي بيها حريرتك ومكاين قدك لي غادي يلقى ختي رحمة ولا انغبر لي الأثر كيما غبر ليها
هينة(كدور فعينيها) :
- كك كيفاش نلقى حيلة مافهمت واش انا لي خونتها وراه الباطل هذا بعينيه او ودنيه
يوسف : ماشي سوقي كيما توضرات بسبابك اتلقايها إنتهى الكلام
هينة : وياك انت سلطان زعمة علاش ماتلقاها انت نيت علاش انا ولا سلطان غير بالفم اما شان والمرشان والهمة مشات مع سيادنا اللوالة
يوسف(تحت سنانو) :
- هينة بنت تاجر علال والله وقسما بالله وماتلقاي حيلة لجرتك وترجعي ختي رحمة غير قراي على روحك الفاتحة قبرك انحفرو بيدي وكولي مولاي سلطان كال..بلاه خرجي عليا يلاه برا..رجعات هينة بخطوات اللور فتحو ليها الحري الباب غير شافت سلطان عطاها بظهر طلقات رجليها لريح تجري وتكول ماجرات ماتلفتاتش وراها حتى قربات لقدام الباب وقفات حطات إيد على شجرة وإيد على قلبها تحنات كترجع نفس حيات بروحها غادي تزهق عيات ورجليها فشلو عليها هاد نهار عمرو ليها لايتنسى بللات فمها وهزات راسها وكملات طريق لدارهم حطات إيدها على إبد دالباب لي من نحاس دقات جوج خطرات وراها تفتح الباب وطلات براسها حليمة لي غير شافتها تخلعات وماعرفات باش تبلات ولات تضرب فخاضها وتولول..
حليمة : اويلي ستغفرت الله خرجتي سالمة غانمة رجعتي ليا خنفوسة غاملة ياك لاباس شكون دار فيك هاد الحالة؟
هينة : وغير خليني امي ندخل بعدا نرتاح وانا نعاود ليك كولشي..دخلات هينة كلسات على سداري لي منو لزربية حسبي وتكات ومدات رجليها ترتاح..حاسة بمها واقفة عليها بحال قباض الرواح كتسنى فيها تعاود ليها شنو واقع..
حليمة : وراني سايرة نتسنى فيك تهضري
هينة : شريبة ديال الما امي على وقفتك..مسات حليمة خوات ليها كاس دالما وجابتو ليها نزلات عليه دقة وحدة بحال الى مشارباش شهر
حليمة : راحة ورتاحيتي والما وشربتي شنو بقى مزال؟
هينة : عارفاك امي مكتصبريش الأمر ومافيه...عاودات هينة لمها كاع لي وقع من الأول الأخير من غير شدة ظيالها فالقصر وكلام مولاي سلطان الغالي...خلات حليمة تولول وضرب فخاضها
حليمة : هالي كلت شفتي طريق خت سلطان كلتها ليك ولكن انت مكتصنطيش مكتحرميش الما سيفطيني لقبر ودخلي لحبس مغاترتاحيش..
#يتبع