هينة والغول👹مكتملة👹

👹الجزء 4👹

#هينة_والغول
#بقلم : #سناء_الصنهاجي
4- دازت ليام كان نهار الأحد السوق عامر مخلط نسا ورجال كولشي كيتقدى شي يتقدا زاد وشي ثواب وشي عند العطار مشات تقدا لكحل وسواك...ناس ماعليهم مابيهم حتى بداو يسمعو البراح كيبرح جايب ليهم خبار جديدة بلي مولاي سلطان يوسف داير وليمة لتجار ولي عجباتو فهامتو وعجباتو كلستو ايخطب بنتو...البنات فرحو كل وحدة ولات تجري عند مول ثواب او وحدة تجري عند العطار باش تشري وتسوق باش نهار الموعود تزوق وتكون فأحسن حلة وتبهر مولاي السلطان..
#فدار_هينة
حليمة(خارجة كشكوشتها) :
- علال واش باغي تسطيني وتخرج ليا العقل جاتنا خبار زينة ومكاينش بحال هاد الفرصة لي نزوجو بنتنا هينة وانت داير ليا العصة فالبرويطة
علال : الالة السلطان عارض على تجار الكبار وانا غير تاجر صغيير مامنهم مامن سهمهم وبنتي رزقها أيجيها ولاو تكون ورا البحار
حليمة : ياربي صبر من عندك ياربي..نقزات هينة
هينة : انا ماشي للبيع ولا لشرا وماشي هبيلة غشيمة باش ندل راسي ونمشي نحضر لوليمة باش نعجب السلطان لهلا يحييه ولا يطول زمان عليه حتى نكون ليه وبا عندو الحق حنا غير ناس دراوش ماعندناش وماخصناش الحمد لله وزايدون انا مابغياش نتزوج اغير تهناو ونعسو على جنب الراحة
حليمة(خرجات فيها عينيها) :
- ياك الالة عندك الحق هذا هو سري انا فهمو ندادي وهو كيقطع فوتادي واخا يالالة انت وباك شغلكم هذاك انا انخرج من باب واسع ضبرو راسكم..مشات تكمل شغالها وخلات هينة وباها
هينة : با مادير والو فخاطرك راك عارف مي مسكينة
علال : لالا أبنتي انا لي خفت نخرج على سعدك بيدي
هينة(تبسمات) :
- شفتي أبا كون بغيت سلطان كون خديتو وكون بغيت نحضر لهاد الوجيبة كون حضرت ولكن راه انا لي مابغيتش وكون قبلتي كان أيبقى فيا الحال حيت ابا انا مكنتباع مكنتشرا بمال
علال(ضحك) :
- الله يكملك بعقلك ابنتي الله يرضي عليك ياصافية الوافية..
- دازت أيام وكانت هينة جنب الواد...ناشرة رجليها تكب عليهم الما ومخلية شميسة ضرب فيها حتى كتسمع وراها كلام بنات القبيلة
- ياختي شحال فيه ديال النفخة والفهامة تكول أهو لي سلطان فهاد الدنيا يشويني فيه..جاوباتها لوخرا
- أسكتي دروك يسمعوك ويغبرونا أختي علاما سمعت كاليك واخا كيكون التاجر حكيم وفهيم كتكون بنتو الراس خاوي ودراع كاضي داكشي باش معجبو حال وفض المجمع قبل مايسالي وقتو
- إيوا لاواه زاد فيه هانا اختي شنو خاصني ولكن هو كيتعلق فين يتفلق بغا بنات تجار الكبار
- واش انت هبيلة مولاي سلطان ياخود بنت الخادم وراه باين اياخود وحدة من سهمو بنت شيخ لقبيلة ولا بنت تاجر كبير...هينة طالقة ودنيها وجاتها الضحكة البنات بقاو على الهضرة حتى غبرو بين شجر..ناضت هينة هبطات سروالها لبيض المطروز لبسات بلغاتها وطلقات قفطانها دارت عليها حايكها وتمات راجعة لدار...فطريقها وقفاتها مي رقية مرا كبيرة فالعمر وعزيزة على هينة كتقطر ليها من العين..
رقية(بصوت مبحوح) :
- هينة لحلوة لبنينة فين غبرتي علينا ازينت البنات
هينة(ضحكات) :
- والو امي رقية غير فدنيا وفحالها حتى انا توحشتك وتوحشت جماعتك
رقية : ودخلي شربي معايا كاس دتاي
هينة : والله امي رقية مانصيب تعطلت وانت عارفة مي دير علامي فوق جامع
رقية : غير كولي ليها كنت عند رقية ومتكولبك والو راه كتخاف مني
هينة(كضحك) :
- واخا امي رقية ولكن غير كاس ونرجع فحالي..دخلات عند رقية كلسو على تقرقيب ناب والمحاجي وكاس دتاي صدق كيسان تفكرات هينة دار جمعات الوقفة ودعات مي رقية وزادت خلفة لدار...مع وصلات وحلات الباب غير جات حليمة تغوت كاتليها كنت عند مي رقية حليمة سكتات ومكالت والو كتخاف منها حيت ماشي مرة ماشي جوج خدات دقة من عكازها..
حطات لغدا هيا ومها تغداو دارت الحايك ونكاب وهزات طبك فيه الخبز وطجين صغير تديه لباها لحانوت...خرجات من دار غادية يد شادة بيها نكابها ويد شادة بيها الطبك ماوقفات حتى لعند باها..
هينة : سلامو عليكم با وابا فينك..طل براسو بين ثواب وتبسم
علال : فين أنكون أبنتي غير بين ثواب الله يرضي عليك جبتي لغدا فوقتو
هينة(كتحط ليه غداتو) :
- ممالفاش ليك أبا تغدا فالحانوت ياكما مخاصم مع مي تاني؟
علال : لاواه أبنتي غير جمالة وصلو يفرقو سلعة وكان خاصني نوقف على سلعتي بيدي داكشي باش بقيت فالمحال
هينة : ودخلات شي سلعة مزيانة بعدا؟
علال : علاه لا وثوب زين المخير لبنتي ضو عويناتي هاكي..مد ليها ثوب من الحرير فلون الخضر شافتو عجبها تحنات على راس باها وباستو
هينة : لهلا يخطيك عليا أبا وهاني مشيت
علال : طريق سلامة أبنتي..علات نقابها ورجعات من طريق لي جات منها فطريق كاتبان ليها واحد الكروصة زينة وكبيرة سايكينها جوج عودان جايا قاصداها وقفات عند رجليها هزات عينيها كاتشوف فيها مافهمات والو..حتى تحيد رواق لي كان مغطيها وهبطات منها وحدة من لباسها باينة لاباس عليها قفطان من الحرير والعقيق ديال الجوهر وجها مباينش بنقاب الخفيف لي دايرة حتى وقفات مقابلة مع هينة..
#يتبع