هينة والغول👹مكتملة👹

👹الجزء 27👹

#هينة_والغول
#سناء_الصنهاجي
27- فواحد الغار طوييل وعريض بارد وكيبعت الخوف فنفس قدام بابو كولو حدبد مشعولة فيه العافية ومضوية على جنابو الفروج ناعس برات الغار بحال الى مقابل شي حد لا يدخل ليه..اما الداخل مأتت ومفرش بفراش كلو كحولية فكحولية الحاجة لي متلقاها كحلة تلقاها غامقة او واحد الريحة مجهدة متقدرش عليها فوسط هاد الجو كيتسمع غير توشويش ديال مالين هاد الغار ولا بغيت نكون من سكان هاد الغار ناس غير الناس ماشي ناس هادو جماد ماتعرفهم إنس ولا جن..
- هضر واحد فيهم بالهمس وهذا لي هضر كان المهراز بو هزاز
المهراز(بصوت رقيق) :
- هاء هاء وا واش شفتي لي شفت اداك الكاس
الكاس : شنو شفتي تاني أهزاز خلينا نعسو قبل لا ينوض لينا سيد الناس مقادين على هضرة ولا تهراس
المهراز : مالك ديما مخلوع سيد الناس ناعس ولكن شفتو مابقاش كيف كان مكايخرج مكايضرج مايحل بيبان مايهرز كيسان
الكاس : مالقيتي فاش تهضر غير فتهراس ماقدكش خوتي او ولادي لي ماتو مساكن بقيت غير انا وحيد وسط هاد الغار لا حنين لا رحيم...تم جاي عندهم المش..
المش(بصوت رقيق وخفيف) :
- واش انتوما مابغيتو تسكتونا وتهنيونا غير لي خلاه الفروج فصباح تكملوه لينا مابقى والو وبنوض يقاقي علينا تاني ويفيقنا من نعاس
المهراز : انا لي بغيت نعرف غير سيد الناس إيمتا ايدخل لهاد الغار مولات السالف لي مدوخة الشارف دازت سنين وسنين وحنا مزال مسنيين بغيت غير نشوف لالة مرات سيدي لي خطفات ليه قلبو ودات ليه عقلو...نباهم صوت غلييييض.. خلاهم يتخبعو ويسكتو ويقطعو الحس
- واش مابقا حد يرتاح فهاد الغار واش بغيتوني نبدا ندكدك ونهرس قطعو الحس ومانسمعش حسكم مزال ولا مغايعجبكم حال..تنهد تنهيدة طوييييلة بحال الى هاز على كتافو جبال وجبال
الغول : مولات دار مرات سيدكم الغول قربات تشرفنا وبهلالها تنورنا خاصها غير تغلط الغلطة وبحضورها أتكون هنا غير نساي أهينة وزيدي فنسيان لسيدك الغول أتكوني ولغارو أتسكني ولولادو اتولدي أ هاهاهاهاهاهاهاها...ضحكتو ترددات فجبال خافو منها طيور وتخبا منها الأرنب فالغيران...
****
هينة تحزمات وترزمات وعلى ريوس صباعها تمشات طلات على الباهية او ولداها لقاتهم ناعسين ومجايبين لدنيا خبار...دخلات لبيت الباهية قلباتها ودوراتها ولا هيا جايبة لدنيا خبار..مشات لتحت الخدية ديالها لقات سوارت الدار...رجعات عند يوسف لي كيتسناها فتحات باب الدار ورجعات سوارت لبلاصتها وخرجات هيا وياه نوضو حميرهم وزادو مع طريق...مارتاحو وهنا ليهم البال حتى بعدو على هاد القبيلة وناسها والباهية او ولدها..
يوسف : بغيت نسولك وكنتمنى ترديلي جواب
هينة : عارفاك شنو اتسول بغيتي تكول ليا كان بيديا نهز ليها مالها وذهبها وماتسيق خبار انا امولاي سلطان مامالفة بحرام وهاد المال لي معانا مكفينا الحمد لله وحلال حيت بعنا سلعتنا ليها حنا ماشي غراضنا نسرقوها لي جينا عليه راه ديناه خلاوها ماليها الرزق الحلال صافي بحال الهلال
يوسف(تبسم) :
- الله يكرم من رباك...تبسمات حيت اول مرة يكولها فيها زينة...سكتات ورجعات شافت فيه ونطقات
هينة : بغيت نسولك ومديرهاش مني قلت صواب ولا عتاب
يوسف : كنسمعك
هينة : انت تبارك الله مولاي سلطان حاكم البلاد بقدك وقامتك ذكي ولبيب والحكمة فيديك كيفاش وعلاش حتى خليتي أمر زواجك لختك رحمة زعمة انت لي خاص تختار انت لي اتعرف شكون لي تصلح ليك وتكون معاك فالفرح والقرح ولالا؟
يوسف(شاف قدامو وتبسم) :
- هادي لي بغاها خاطري ساروت قفل قلبي معاها مزال ماصبتها مزال مشافوها عينين مالمسوها يدين مانبغيش لي تحني ليا الراس ولي كلت ليه تكون واخا امولاي نبغي لي نلجأ ليها وتعاوني بحكمتها وشطارتها متكونش لغاية بزاف كلمة وحدة فيها حكمة كثيرة تشوفني غالط تفيقني بعيبي حيت اتكون مرات مولاي السلطان اندير معاه الولاد والوتاد مكايهمش الزين فاش ينفع زين الى كان دماغ قد حبة العدس ولكن بين البنات لي شافت عيني مالقيت لي تواتيني هادشي باش درت الخاطر لرحمة وخليتها هيا تكلف
هينة : عندك الحق كانت جدة الله يرحمها كتكولها الله يرحمها عليها كلمة ماتقطع الواد حتى تبان حجارو وماتمشي فليل حتى يطلع النهارو  وماتصحب صديق حتى تعرف خبارو خاصك تعرف فين تحط رجليك ومعامن تحط يديك ولا يغرك الزين والمظهر كيكوليك الله يلعن كاس البلار لي نشرب فيه المرار إيه كلها وحالو وحوال الناس شلااا واحد بغا المعقول وشي باغي يتفلى
يوسف(ضحك) :
- باش كتقتليني غير بهاد القوافي ديالك الزايدة لي خلاتنا تاني ليبة لينا انباتوها فالعرا وظلمة عاجبك الحال دابا
هينة : اللهم النعاس فالبرد ولا ضيافة القرد...مافيها باس كيف درنا المرة الفايتة نعاودوها ولكن بلاتي نزيدو نبعدو شوية باش نأمنو على راسنا من ديك الحجلة الخفيفة لي بلاما بيها الله خلاتها جدة كاتليك كالو للحمقة زغرتي كالت ليهم الدار ضيقة
يوسف(ضحك) :
- اما ولدها لهبيل كاليك ولد الضبع عير ضبع الى سخرتو يشري لخميرة يشري الشمع...ضحكو بجوجهم..وكملو طريقهم..
#يتبع