هينة والغول👹مكتملة👹

👹الجزء 48👹

#هينة_والغول
#سناء_الصنهاجي
48- من بعد مرور أربع أيام على رحلة ديال العودة..
   - حليمة كالسة كتنقزي فزرع يد فطبق والعقل سارح بعييد حتى دخل علال هاز واحد القفة فيها شوية ديال الخضرة حطها وكلس كال سلامو عليكم مارضها عليه حد..
علال : وهاد المرة أفين عقلك سارح وتالق؟..حليمة عاد وعات
حليمة : علال جيتي على سلامتك كاعما حسيت بيك
علال : كيفاش اتحسي بيا وانت يد فزرع كاع شتتيه وعقلك داك الريح
حليمة(تنهدات) :
- توحشت بنتي أعلال ماعرفتها واكلة ولا ناعية ولا علم الله بيها قلبي مهون من جيهتها
علال : حتى انا بحالك ولكن ديري يقينك فالله سبحانه مديريش بالك معاك وإن شاء الله يارحمان يارحيم ماتلقايها غير وهيا كتدق بابك ويلاه نوضي وجدي لينا شي طاجين من يديك اه راه جبت معايا شوي دسميد والملح باش ديري لينا شوية ديال السمن راه وصاني عليه واحد السيد بغاه لمرتو وماقديت نرضها فوجهو...حليمة لون تبدل فوجها صارت شافت فيه
حليمة : وانت عارف بلي شحال هذا مدرناه ولا دخل لدار وبلي بنتك ماتحملو ماتشم ريحتو
علال : الالة راه ماشي لينا راه لسيد والبنت مزال مجات السيد صافي عطيتو كلمة مغاديش نبان قدامو ناقص كلام يلاه انا اندخل نتوضى ونصلي بينما وجدتي لينا مايتكال...يلاه ناض وقف حتى تسمع دقان فالباب دقة لولة وتالية وتالتة
حليمة(بستغراب) :
- شكون أيكون؟
علال : الله علم حلي ياهاد المرة نعرفو شكون بعدا...حيدات حلبمة الطبg قدامها او وقفات حلات خلال لي كانت شادة بيه قفطانها دارت واحد الحايك على راسها ومشات لجبهة الباب دورات الزكروم وفتحات الباب مع فتحاتو تهز وجه بنتها وشافت فيها...حليمة لاحت الحايك وتلاحت على هينة كتعنق فيها وتبوس
حليمة : على سلامتك أبنتي على سلامتك أحبيبتي نورتينا ابنتي الله ياربي الله
هينة : حتى انا توحشتك امي وتوحشتك بزاااف ربي لي مطالع وعالم...هزات حلبمة رزمة ديال بنتها وجراتها مدخلاها لدار مسكينة يلاه بردات نار الشوق لي فقلبها...غير شاف علال بنتو عنقها وباس ليها راسها فرحان برجوعها ليهم سالمة غانمة...من بعدما كلسو..
حليمة : كولي ليا ابنيتي عاودي ليا كي داز سفر ديالكم أمضرا لقيتو خت سلطان؟
علال : أيشوية على البنت لا زربة على صلاح خليها ترتاح وتشرب ميها بعدا وعاد سقسيها
حليمة : انت ديما هكا فينما نهضر مع بنتي تدخل تكول بنتك انت بوحدك باااز ليك
هينة : كولشي داز مزياان أمي ورحمة رجعات مع خوها لقصر
حليمة : إيوا مزياان مزيااان بنتي اسخط هارضى عمرك مزاال توصلي داك القصر ولا ماليه الى مزال شفتي ديك خت سلطان رحمة قلبي طريق ماهوم من سهمنا ولا حنا من سهمهم خلاوها ماليها الله يلعن كاس البلار لي نشرب فيه المرار هادي هيا قلة تقرقيب وقوة النقيب مالنا عليها عمر داود مايعاود مزال هاد المرة فاتت المرة جايا علم الله شنو ايكولو اللولة عسيلة وتانية سمينة وتالتة حصيلة وبنتي انا تمشي فرجلين لالالا
علال : لا حول ولا قوة الا بالله جات تاني
حليمة(خرجات فيه عينيها) :
- انا هضرت والى مزال دقات بابي انكوليها بنتي رحلات ومشات لمكان بعيييد يخطيونا عليهم ماحنا من سهمهم ماهوما من سهمنا والباب لي يجيك منو الريح سدو وستاريح..
هينة(وهيا ساهية  طايح عليها الضيم) :
- عندك الصح أمي غييير تهناي ونعسي على جنب الراحة عمرنا نشوفو وجهم مزال ولا يشوفو وجهنا انا غادي نوض نرتاح واحد الشوية عييت
حليمة : واخا ابنتي نوضي تريحي عضامك انا ايوجد الغدا ونفيقك...ناضت هينة لبيت ردات بابو عليها اما علال بقا كيشوف فحليمة شوفات فشكل
حليمة : مالك كتشوف فيا؟
علال : الله يحفظ من داك اللسان ديالك الطويل السليط ماخليتي البنت حتى ترتاح وهانتي نوضتيها بلا ميجال عجبك الحال دابا؟
حليمة : هاديك بنتي وبنت كرشي ومكاين لي ايبغي ليها الخير قدي وانا لي عارف لي يصلاح ليها ولي لا...وقفات هزات ديك القفة ودخلات لكوزينة
علال : لا حول ولا قوة إلا بالله الله يهديك أهاد المرة وخلاص..
#فالبيت
عند هينة لي دخلات وزولات الحايك وبقات اب قفطانها الخفيف كلسات الأرض سرحات رجليها وعينيها على الخاتم لي فيديها وتفكرات يوسف ونهار لي تزوجات بيه تفكرات كاع لي داز وكيفاش تسيفطات معاهم وكيفاش شكراتها رحمة على وقفتها مع خوها أما يوسف خسر عليها كلمة وحدة..
- نشوفوك على خير وبيخير بسلامة أهينة...هادشي لي كاين وعلاش شنو كانت متوقة منو ولا شنو كانت كاتسنى لي بغاه راه لقاه ولمورادو راه وصل ومابقا عندو بيها غراض...تنهدات تنهيدة طويلة حطات راسها على الخدية وهيا كتفكر حتى ماحسات براسها حتى داتها عينها ويديها على الخاتم لي فصبعها...
#يتبع