هينة والغول👹مكتملة👹

👹الجزء 23👹

#هينة_والغول
#سناء_الصنهاجي
23- دارت هينة رجل على رجل كتنش على راسها حيت عيات...تمات جايا الباهية مبسمة
الباهية : ختي مربوحة وجدت ليك الما راه سخن باش دخلب تغسلي وتحيدي عليك عذاب السفر او وراها يدخل سي الغالي كولشي كاين الداخل الغاسول والحنة والورد وريحان وصابون البلدي
هينة(كانت محتاجة لهاد العومة) :
- لهلا يخطيك اختي الباهية منرضهاش فوجهك...هزات رزمتها وتبعات الباهية مماسوقاش ليوسف لي كيغمز فيها حيت خلاتو بوحدو...دخلات هينة لواحد الحمام صغير فيه طاسة من النحاس وكاع لي يحتاج الحمام من قباب باين هاد الباهية مسك عليها الله خلى ليها الراجل المال داكشي باش عايشة فنعيم...
غسلات هينة حالتها بالورد وصابون البلدي ودارتها لشعرها الغاسول شلالات ومسحات ولبسات قفطان مطروز ولوات شعرها فواحد التوب بغات حتى تخرج تنشفو مزيان وتشقو بزيت العود وظفرو كيفما مالفة..
- غير هيا خرجات تمات جايا الباهية
الباهية : بصحة وراحة نورتي وخدودك ولاو بحال تفاح
هينة : الله يكبر بيك...على يوسف عينو فهينة صغر عينيه كيشوف فيها وفوجها لي داير بحال البدر المنور...مافيقاتو من سهوتو غير الباهية
الباهية : توبتك أسي الغالي
يوسف : لا انا بلاش مكاين لاش
الباهية : ولاواه يلاه ترتاح وتحيد العيا ديال السفر وانا سخنت ليك الما حشومة تحشمني وتردهالي فوجهي
يوسف(مع راسو) :
- مالقيتي لي يكب ليك داك الما على وجهك وتزيدي تكماش على تكماش خلاوها ناس زمان وجه شارفة مايخفى واخا تحكو بالحلفة
الباهية : شنو كلتي اسي الغالي؟
يوسف(تنهد) :
- واخا مايكون اخاطرك الالة...تبسمات الباهية وسبقاتو اوهو وراها يدور ويشوف فهينة حتى وصلاتو لقدام الحمام مدات ليه الما السخون ومشات وهيا كتبسم عند بالها مزال ضفرتها مشابت وسنتها مطاحت..دخل ليوسف لحمام وسد عليه حيت هاد المرة مافيها تقة تقدر تدخل عليه..
- جبدات عينة من رزمتها مشطة ديال العظم قلبات على قرعتها ديال زيت وعيات ماتقلب مالقات والو...جمعات الوقفة ومشات كتعيط على الباهية..
هينة : سمحيليا اختي الباهية انصدعك نسيت قرعتي ديال زيت لشعري بغيت انكوليك واش ماعندك شي زبت ديال الشعر مع جبت معايا غير ديال الماكلة وديال شعري خليتها
الباهية : الله أودي عندي زيت حرة غرة مافيها لا زيادة لا ملحة وراه مخلطة معاها نيت شوية ديال القرنفل والخزامة انا انمشي نجيبها ليك...مشات الباهية ورجعات وهيا فيديها قرعة ديال الزاج وغطايتها من نحاس
الباهية : هاهيا الالة زيتي ليا داك الشعر مزيان وظفريه على حقو وطريقو ازينت البنات
هينة(كضحك ليها ضحكة صفرا) :
- لهلا يخطيك راه الزين ولحلى ديتيه كلو...تبسمات الباهية وحدرات الراس خلاتها هينة ورجعات لبيت لكلاس فين كانو سرحات شعرها قدامها ونشفاتو خصلة بخصلة تبارك الله قوي وطويل وماتعرف واش فيه لون ولا لونين فير فليل يكون كحل وبنهار يولي بحال لون ديال زبيب...فرقات رجليها وفرقات شعرها من نص كل جهة لاحتها على رجل وكلسات كتمشط وتسرح تبارك الله زغبة وحدة مطاحت دهنات جهة لولة مزيان وبدات كظفر يدها عيات وهذا حالها فكل مرة كتغسل...مسلات جهة لولة حتى يديها مابقاتش حاسة بيهم منها ودازت لجهة تانية سرحاتها مزيان ودهناتها على حقها وطريقها وبدات كتظفر فيها حتى سلاتها...دورات الظفاير ورا راسها جوج دورات وعقداتهم القدام...مع اتهز زيفها وتعكف بيه راسها كيبان ليها سلطان يوسف واقف قبالتها وعينيه سارحة فيها...بالخف دارت زيفها وجمعات الوقفة..
هينة(مخرجة فيه عينيها) :
- من إيمتا وانت تما امولاي سلطان؟
يوسف(وعى على راسو وبلا مبالاة جاوب) :
- وفاش كيهمك هادشي؟
هينة : مكتعرفش دق الباب ومكتعرفش تحدر عينيك وبلي لمرا سترة وشعرها سترة ليها مايشزفو غير راجلها ولا خوها ولا باها
يوسف : وشكون كاليك انا شفت شعرك ولا ريتو الشعر زين ماشي غير عندك راه عند العودة وكاعما مسوقة ليه ولا يغرك زينك ولا بهاك راه زين فدفلة وعروقها حارين..
هينة(هزات يدها فوجها السلطان) :
- واش كضحك عليا اجاب كعو لبعو انا فين كنعضر وانت فاش كتهضر هادي هيا انا نشكيلو بالعكر وهو كيكوليا أش خبار دراري
يوسف : كنكول غير لي كاين انتوما النسا عند بالكم همة وشان وكاع رجال يتمناو كلمة منكم ولا شوفة فيكم نسيتو بلي كونما حوايج العطار مافنسا ماتختار
هينة : وحتى انتوما نسيتو بلي الهمة ورجلة ماشي فطولة وفسيف وفالحية كون جات غير على لحية راها حتى عند العتروس...قاطع كلامها صوت الباهية كتهضر مع شي حد حتى وقفات عندهم وهيا شادة فيد واحد السيد لابس جلابة قهوية وشعرو طالع لسما وكيهز فحجبانو ويضحك
الباهية : هذا هو ولدي زهر
زهر(كيهز حجبانو ويضحك) :
- مي مي مي واش هادي هيا عروستي صافي امي اتزوجيني ياكي هادي هيا عروستي ياكي...هينة حلات فمها فيه اما يوسف غلباتو الضحكة ودور وجهو لهيه..
أشمن مشكيل طاحو فيه ؟؟واشمن بير هذا غرقو فيه؟؟

#أرائكم