هينة والغول👹مكتملة👹

👹الجزء 50👹

#هينة_والغول
#سناء_الصنهاجي
50- رجعات هينة لخطوة لور ونطقات :
- على أشمن مشهاب كتكلم؟
الغول : المشهاب لي بين حوايجك دخلي وجيبيه وياااك تفكري تهربي بين يدي معندك لين عليا ومعندك هروب مني...جرات هينة راضية لي مخلوعة وحالة فمها غير دخلات هينة لدار جات حليمة كتجري عندها قبل لا تهضر كالت هينة :
- درتيها أمي درتيها؟
حليمة : ماشي بيدي أبنتي باك لي بزز عليا
هينة : جا أمي جا وناوي يديني
حليمة : واخا يبقى عرق واحد فيا لا داك...دخلات هينة مخلية مها كتفكر وراضية حانية راس مخلوعة...بدات هينة تقلب فحوايجها حتى لقات لحديدة لي لقات نهار شافت الغول ستغربات وتعجبات أش جابها لهنا ياك كانت خلاتها وراها..هزاتها فيديها وخرجات
حليمة : فين غادية بديك الحديدة ومنين جاتك؟
هينة : هادي هيا سباب البلا بغاني نخرجها ليه
حليمة : واش انت حفى ليك القرشال تخرجيها ليه بيديك خلي راضية تخرجها ليه سايريه حتى يمشي مغاديش يقدر يدخل علينا الى مشا حتى بغا يدخل نشعل فيه العافية...مشات حليمة ومخلات هينة تكمل كلامها هزات شوية ديال الحطب بقى بغات تشعلو...هينة لي كانت واقفة فزعها صوت الغول لي جاي من ورا الباب..
الغول : هينة يا هينة خرجي ليا مشهابي...قربات هينة لجنب الباب كتحاول تفكر وتلقى شي حيلة لي تخرجها من هاد الحفرة لي طاحت فيها
هينة : تمدو ليك مي
الغول : يموميك ويموميها وينوض الشيب فودتيك او ودنيها هينة مدي ليا مشهابي
هينة : تمدو ليك عمتي
الغول : يعميك ويعميك وينوض الشيب فودنيك او ودنيها كتليك مدي ليا مشهابي
هينة : تمدو ليك خالتي
الغول : يخليك ويخليها وينوض الشيب فودتيك او ودنيها
هينة : يمدو ليك با
الغول : يبوبيك ويبوبيه وينوض الشيب فودنيك او ودنيه هييييينة مدي ليا مشهابي...سكتات هينة حيت حتى حيلة مانفعات معاه
حليمة(جاتها من لور) :
- بنتي طلعي فوق كتاف راضية ومدي ليه المشهاب من فوق الباب وراضية تحضي من تقلت الباب...مسكينة راضية قاتلاها غيرالخلعة ومعارفة مدير سلمت أمرها لله وحنات الراس هزات هينة على ضهرها مع كانت مرة طويلة وعريضة هزات هينة المشهاب فيديها وتمات غادية بيها راضية لقدام الباب...راضية دارت عينها على تقبة باش تشوف الغول واش قريب وهينة طلات من فوق الباب يلاه اتهضر راضية وتكوليها بلي مبان ليها والو حتى حسات بعود تغرس ليها فعينها...وهينة تهزات من فوق ظهرها وغبرات..
راضية(شادة على عينها وتغوت) :
- عيني مشات لالة هينة مشااات عيني مشااات الالة حليمة وهينة مشات هينة داها الغول الالة حليمة صافي داها...حليمة ماعرفات باش تبلات ماحيلتها لراضية لعينها عوارت ولا لبنتها لي تهزات قدامها حلات الباب كتجري مالقات غير الريح حس بنادم مكاين خارجة بلا حايك دور ودايعة وتقلب ولي لقاتو تسولو على هينة واش شافها او والو...رجعات لدار حانية راس ودموعها على خدها وضرب في فخاضها وترجع لومة لعلال حيت هو سبابها فمكتوبها...دازت العشية كحلة عليها شادة فراسها وحانياه وحداها راضية لي دايرة عشوب على عينها ورابطاها بزيف...حتى تدق الباب ناضت راضية بجرا فتحات الباب كان علال لي اشافها غوبش مافهم والو...وزاد كمل فاش شاف مرتو شادة فىاسها وحادراه
علال : يااك لاباس مالكم بحال الى ميت ليكم الميت وانت مالك فعينك؟،...شافت فيه حليمة وعينيها حمرين بدموع وبصوت تقيل :
- أنت سباب فهاد الميمون الصكع انت مول هاد الفعلة انت اعلال كونما أنت كون بنتي مزال معايا... مع كالت هاد الكلام عطاتها لبكا ونواح علال مافهم والو
علال : اش كتخربقي ياهاد المرة وفين هيا هينة اش طاري...حليمة ماعندها لسان لي تهضر بيه راضية هيا لي عاودات ليه كولشي من لول وشنو وقع...بقوة الصدمة كلس الأرض عقلو غاب
علال : حليمة عاودي ليا شنو وقع بغيت نفهم
حليمة (بصوت تقيل) :
- عرفتي علاش شحال هادي مابقيت درت سمن ولا دخل لدار ودرت العدر بهينة بنتي حيتاش...بدات كتعاود ليه من الأول من نهار هينة لقات الحديدة والغول لي خرج ليها فالغابة كلما زادت حليمة فحكايتها كتخلي علال مستغرب ومعجب...سلات هضرتها وهو يوقف علال
حليمة : فين غادي حتى أنت؟
علال : مالي انبقى كالس بحال الولية ندب أنخرج نقلب على بنتي فينما كانت انجيبها
حليمة(بدات تبكي) :
- والى داها ليا لشي تلت الخالي والى والى اعلال دبح ليا بنتي وقتلها ليا😭
علال : ربي حنين ومعانا ماتبقايش تفايلي بالخايب دعي معاها انا مشيت...خرج علال وخلى حليمة مسكينة غارقة فالأحزان وفالهم على هينة مسكينة لي ماعرفوها فين طارت ولا فين زاد بيها الغول مول الجبال...
#يتبع