هينة والغول👹مكتملة👹

👹الجزء 40👹

#هينة_والغول
#سناء_الصنهاجي
40- فوسط سوق عامر بناس البياعة وشراية صحاب الدكاكن كبار وصغار ناس غاديين جايين بنات ورجال وعيالات كبار كةلشي باش ملهي...تمو داخلين جوج دناس من النظرة لولة لمالين لقبيلة ايبان بلي ماشي منها بلي جداد على وجها كولشي كيشوف بنص عين وحاضي وكيسول مع راسو شكون هاد العيالات وحدة مغنبرة بحايك بيض قصيرة شوية وثانية طويلة لابسة قفطان فالخضر وشربيل ودايرة الحايك على راسها ونكاب كيبانو غير عينيها الكحلين جارين معاهم جوج حمير وقاصدين السوق تمو دايزين من قدام دكان تاجر مول الحرير حتى نباهم :
  - مرحبا بيكم دخلو تخيرو ومتعو عينيكم مكاين ماحسن من دكاني وكاع لي تبغيوه تلاقاوه...وقفو العيالات قدام باب دكانو وتقمات مولات الحايك البيض القصيرة كتشوف فتواب وتمس فيهم وتشوف فلوان
التاجر : هاد اللون يواتيك الالة مولاتي راه حرير حر سلعة جايانا من بلاد الهند أما هاد اللون لحمر يجي مع ديك السيدة لي وراك....هنا نطقات مولات الحايك :
   - ربي يخليك أسيدي ولكن حنا يلاه دخلنا لهاد البلاد مزال ماحطينا رحال غير نقادو أمورنا وإن شاء الله يكون لينا معاك ميعاد عندك سلعة زينة تفتن العين ولكن خاصنا نسبقو المهم بعدا
التاجر(بفضول) :
  - راه كنكول نيييت هاد الوجوه جداد عليا بحال هاد زين ماعندناش فالقبيلة...طلعات حاجب وهبطات الثاني ونطقات :
  - علاش فين بان ليك هاد زين من غير الحاجب والعين لي باينين
التاجر : إيوا العمدة على الحاجب والعين لي مرسومين مقلمين مكلتيليش منين انتوما وأشمن ريح جابكم...تنهدات مولات الحايك تنهيدة طويلة شافت فالأرض ونطقات :
   - إيوا أسيدي حكاية طويييلة منين نبدا حنا جينا من قبيلة بعيدة كنت مزوجة وبخيمتي وبهايمي رزقني الله بهاد البنية لي كتشوفها قدامك زين والهمة وشان تفتن بزين ولكن خرجات ليا بكمة مكتهضرش حكم الله سبحانه إيوا راجل غير كبرت جمع ليا كاع الفليسات وباع البهيمات وجرا عليا أنا وهاد البنية مسكينة إيوا خرجنا يد اللور ويدام القدام كونماشي شي دهيبات كنت مخبياهم لدواير زمان وبعتهم ومن تم شدينا رحال حتى لقينا راسنا فهاد البلاد السعيدة...التاجر حدر راسو كيتأسف على حالهم
- إيوا أشنو انكوليكم والله حتى بقيتو فيا أشبان ليكم تقبلو ضيافتي فداري مع مرتي او وليداتي بينما لقيتو شي موضع فين تكونو أش سماك الله بعدا؟
هي : سميتي هينة وهادي بنتي فضيلة
التاجر : مرحبا بيكم تمشيو معايا الى قبلتو عليا
هينة : ربي يخليك بلاما نتقلو عليك حنا مقصودنا والى جات على خاطرك كالو لينا بلي لي كيبغي يخدم يمشي يقصد القصر واش بصح؟
التاجر(كيحك فلحيتو) :
- ياااه بصح ولكن صعيب شوية أشريفة دخلي لقصر حيت مجاتش وانتوما غراب يقدرو يشكو فيكم
هينة : أحياني أش عندهم مايشكو فوحطة شارفة او وحدة بكمة مكتهضر ماتكلم
التاجر : ولكن راه مايدخل لقصر غير لي كيتقن شي صنعة يقدر يفيد بيها مولاي السلطان ومانصحكش شاي علاما كيكولو الناس بلي السلطان الى تحطات عينو على شي بنت كايبغيها تولي ليه
هينة : أويلييي انا غير شويرفة هويرفة أما بنتي فضيلة ناقصة مسكينة سلطان يحط عينو على خادم مافيها لا زين سالف لا حاجب لا عين وزيد مقطوع لسانها واخا يديها راه تخرج منهم ذهب انت غير وربنا طريق الله يجازيك بيخير شوف المكتاب وملقانا معاك فهاد الطريق... التاجر سكت كيفكر عاد هضر :
- إيوا دوزو معايا بعدا تاكلو لي قسم الله وترتاحو بينما صليت حتى انا ظهر وديك ساع نوريكم الطريق بلاتي نسد دكاني
هينة : الله يجعلها فميزان حسناتك الله يجازيك بالخير والخمير وتيسير....شافت هينة فبنتها(لي هيا يوسف) وغمزاتو أما هو أكيخنزر فيها وماحاملش راسو على هاد تبهديل لي هو فيه عمرو لبس لبس النسا حتى لبساتو ليه هيا سوكات ليك وعطاتو قفطان والبلغة ودبالج دارهم فيديه والحايك حتى من نكاب لبساتو ليه كره راسو وماحملش هادشي لي هو فيه ولكن على قبل ختو يدير أي حاجة...
- إيوا خلاوها ناس الزمان سوق النسا سووق مطيار يا داخل حضي راسك يديولك راس مالك و يوريوك من الربح قنطاار...
#يتبع