هينة والغول👹مكتملة👹

👹الجزء 22👹

#هينة_والغول
#سناء_الصنهاجي
22- دار لي كانت قبالت عبنيهم مكانتش كبيرة بزااف ولكن غير فتحات الباهية الباب الدار من الظاخل حين من برا بالف درجة..
الباهية(مبسمة) :
- مرحبا مرحبا زيدو تفضلو النهار كبير هذا
هينة : الله يبارك فيك الالة الباهية لهلا يخطيك
الباهية : بلا ديك لالة غير الباهية بوحدها تكفي وتوفي إيوا ماكلتيش ليا بعدا أش سماك الله؟
هينة : أنا سميتي مربوحة وهذا خويا الغالي...شاف فيها يوسف بستغراب ضحكات فوجها بمعنى ويااك تكدبني
الباهية(عينيها كطلع وتهبط فيوسف) :
- ااااه هذا خوك والله مايحسابلي غير راجلك😁
هينة : لاواه راه كلتها ليك عند العطار غير يمكن مارديتيش بالك
الباهية : إيوا لي شاف داك الخير لي عندك مايتلفش أمربوحة ويلي دخلو انا دابا انجيب ليكم واحد البراد ديال أتاي دايزو الكلام ومتخافوش على بهايمك راهم فالأمان
هينة : ربي يخليك عارفين لي كاين...مشات لباهية توجد أتاي وهينة ويوسف دخلو لواحد البيت مفرش بسدادر والمخاد منبتين بالموزون..
يوسف(طالع ليه دم) :
- داخلت عليك بوجه الله أش هادشي كديري فيه بغيت غير نفهم واش حنا جايين نضايفو فهاد المكان ولا نقلبو على ختي رحمة وزيداها بالكذوب والبهتان
هينة : هذاك الكذوب والبهتان أمولاي سلطان هو لي أيخلينا نباتو تحت سقف مسلس ونتغطاو من البرد ومن عرا طرقان وهو لي أيخلينا نعرفو مكان سلطانة انا ماخليتش خيمتي ودواري باش ندور معاك فالبلدان..
يوسف : ولكن علاش لكذوب فسميات بغيت أنفهم؟
هينة : الواحد مافيه أمان وثقة مابقاتش اللهم الواحد يكذب ويعرف باش هو محزم وزيدها هاد خيتي ماشي حتى لتم وانا مأمنتش ليها فهمتي دابا إيوا سكت راه سيدة قربات تجي
يوسف : باش عرفتيها..شوية سمعو صوت خطاها وهيا جايا هازة صينية من نحاس فيها كيسان وبراد كبير منقوش
الباهية : والله الى نهار كبير هذا منين عمرتو داري وكلستو فيفراشي حتى انا مكايجي عندي حد
هينة(كتبحت فيها) :
- علاش انت ساكنة بوحدك فهاد الدار؟
الباهية(كتخوي فأتاي) :
- لاواه ساكنة انا او ولدي زهر غير دابا هو خارج من صباح لصباح كيخرج لجبل وكيرجع وقيت الغدا خلاه ليا المرحوم الله يرحمو ويواليه برحمة الله من نهار تزاد وانا فالخير داكشي باش سميتو زهر هههه هاكو شربو مرحبا دار داركم...فرقات عليهم كيسان أتاي وكل مرة ترمق السلطان بنظرة...بقات ساكتة شحال وحتى هينة ساكنة وتشوف فدار حتى نطقات الباهية :
- أحم شفت خوك الغالي كاعما كيهضر
هينة(ضحكات) :
- هو هكاك داير حشومي بزااف وهضرتو قليلة فاش كانو الوالدين كنا نتمناو غير نسمعو صوتو كيبقى بوحدو داكشي باش تعلم لهاد الصنعة هادي
الباهية : ااااه إيوا مزيان واش مزوج؟😄
هينة(عاقت وتبسمات) :
- لالا كون كان مزوج اتبان ليك مراتو معانا مزال مالقيت ليه بنت الناس لي توالمو وتعرف بحقو
الباهية(نشطات وحشمات وتبسمات واخا هيا كبرات) :
- أاااه إيوا مزيان الله يجيب ليه شي نقرة فين يغبر النحاسو
هينة : أمين ياربي
الباهية : أحيانة الوحدانية صعيبة سوليني انا فاش تزوجت بالمرحوم كنت مزال صغييرة مكنعرف حتى شنو زواج وفاش مات خلاني صغيرة دابا لي يشوف ولدي زهر يكول غير خويا هههه
هينة(ضحكاتها) :
- راه باين تبارك الله عليك مزال سنان الحليب مزال يجيب ليك الله المخير فرجال
الباهية(شافت فيوسف وحدرات راسها حشمانة) :
- ههههه لهلا يخطيك اختي مربوحة كلامك بحال الشهد على القلب كيتقطر...شربو أتاي دار داركم انا انوض نوجد الغدا ايكون فيكم جوع
هينة : بلاكا تعذبي راسك
الباهية : الله أودي عذابكم الراحة والى ماهزكم هاد الكتف يهزكم خوه...ناضت الباهية وهيا عند بالها لقات همزة صحيحة راجل صغير وزين وعندو صنعة يخرج منها ذهب..
هينة(كضحك على يوسف) :
- وهانتا بقيتي دور حتى لقاك الله مع مكتوبك فهاد البلاد😂😂
يوسف(خنزر فيها) :
- جمعي راسك بلاما تخليني ندير فيك شرع يديا
هينة : ابشوية عليك رخف على راسك مابقى حد يضحك معاك تبقي ستر😂😂
#يتبع