هينة والغول👹مكتملة👹

👹الجزء 15👹

#هينة_والغول
#بقلم : #سناء_الصنهاجي
15- وصلات هينة لقصر غير شافوها الحراس فتحو الباب ودخلات دافعة جبهة كيبان ليها موسى واقف مغوبش وكيشوف فيها..
هينة : سيدك كاين؟
موسى : كتهضري بحال الى من قرانك حتارمي راسك
هينة : بقى لينا الخدم يوريونا كيفاش كنهضرو عند بالك اتخلعني ماخلعوني حتى شخوشة بقاو ادحوشة
موسى : أديك الفلفة الحارة غير جيتني ولية أما نقطع ليك لسانك ونعلقو لفوق فلكدية
هينة(ضحكات) :
- هاكيني هكاوة على تعلقو فوق الكدية الى مشي فالكديد مانلقاو طول وطرا من لسانك...موسى جمع فمو مافيه لي يتقابح معاها
موسى : مغاديش ندير راسي فهبيلة زيدي قدامي مولاي كيتسناك
هينة : معلوم انزيد قدامك علاش العين كتعلى على الحاجب😄
موسى : لاحول ولاقوة إلا بالله...تم داخل بيها لقصر لداخل وقفها جنب سارية خلاها تم بينما جا سلطان..مشا موسى ولكن مابعدش بزااف باش يحضيها لاتمشي دير شي فضيحة هيا بقات واقفة هازة رزمتها حتى بان سلطان دار واحد الرزمة معلقها فجنبو السيف فجنب لاخور عمامة على راسو وجامع غوباشتو..
يوسف : معندي مانسالك الوقت هو الوقت
هينة : المرة هيا الكلمة كيشتي فهاد الوقت قليل فرجال لي ولات عندو كلمة ياك امولاي
يوسف : بديتي تاني ولامزال براكة من كترت اللغط والهضرة لي معندها فايدة وغير زايدة
هينة(أشرات ليه بصبعها) :
- سمعني مزياااان وحل ودنيك انا ماسميتيش سكت وسكت هيا موت ومدام انا وانت فهاد الخابية الغارقة اتسمع كلامي ولي نكوليك عليها ديرها حيت انت الى جينا نتبعوك غير انطيحو فشي زوبية خاوية ونصدقو لا حنا لا ختك ومشات على عينى ضبابة اللهم تبع ريي حسن ليك خلاوها ناس زمان تبع راي لي يبكيك ولاتبع راي لي يضحكك باش نتفاهمو من دابا..
يوسف : تبارك الله دابا انت بغيتي تسوكيني أنا؟
هينة : حاشة حنا كنسوكو غير لبهايم وحاشة واش يكون سلطان بهيمة انا كنكول غير لي كاين مدام طلبتي شورتي وبغيتينا نسوكو بجوج هاد سفينة غمض عينيك ولي كلت ليك تبعني فريي ومايكون الخير اوجه الخير..
يوسف(على راسو لسما وتنهد تنهيدة طويلة ورجع شافيها) :
- زيدي قدامي ماعندنا وقت مانضيعيو لمزاح سلا وقتو...سبقها وخلاها وراه كتشوف فيه شوف طويلة
هينة : ياودي ياودي على سلطان الحاكم ماقدر حتى يكوليا نهز ليك قشك وزعمة انا غير ولية مسكينة..
يوسف(دار شاف فيها) :
- واش ناوية تنبتي تما...دار وعيط على موسى
يوسف : موسى خرج ليا العود..قاطعاتو هينة
هينة : أشمن عود يكما ناوي دخل لقبايل بسميتك وبشكون انت واش بغيتيهم يسجنونا ويدبحونا؟
يوسف : وعلاش الالة بغيتينى نمشيو على رجلينا؟؟..مداتهاش فيه وشاف فموسى كتآمر فيه بحال الى هيا سلطانة
هينة : جيب جوج حمير وجيب معاهم جوج قفاف عمرهم بزاد من حليب وخبز وزبدة بلدية وزيت وتمر وشوية من لحم لمكدد باش نعمرو كرشنا راه سفر طويل
يوسف : زيدي مزال انت غادة تخيمي كيبان ليا
هينة : ومالك تسحابني بهيمة اتوكلني العلف وتهنا ولا بغيتي تقتلني بجوع شنو اناكلو وشنو انفرشو فكرتي فيها ولا عند بالك انلقاو لقصور كيتسناونا..رجعات شافت فموسى
هينة : وجيب شي لحوفة وشي خيمة لا جوج جوج خيام لي وشي حصيرة وشي توب باش نتغطاو...شاف موسى فيوسف لي كون صاب يشدها يغزها ولكن مزال محتاجها..أشر يوسف لموسى براسو ومشى...رجع من بعد شوية معاه جوج حمير كاملين مكمولين بداكشي لي طلبات هينة..
يوسف(شاف فيها) :
- ودابا مزال شيحاجة الالاهم هينة؟
هينة : جبتي الما؟
موسى(بنفاد صبر) :
- كولشي لي أتحتاجو تما حتى من لكرابي ديال الما وشمع كولشي تم
هينة : ودابا مزيان دابا نقدرو نمشيو
موسى(موجه كلامو لسلطان) :
- مولاي كون غير خليتيني نمشي معاك
يوسف : والقصر شكون أيقابلو والميمة انت هنا بحال الى انا كاين القصر وسلطانة فعينيك نعول عليك
موسى : كون هاني أمولاي تمشي وترجع لينا بسلامة الله يعونك أسيدي...طبطب السلطان على كتف موسى جر حمارو وخلا هينة ضبر لسواقها خرجو من باب القصر وشدو طريق لأول قبيلة..
#يتبع..