هينة والغول👹مكتملة👹

👹الجزء 37👹

#هينة_والغول
#سناء_الصنهاجي
37- دار السلطان لقمان دورة كاملة عليها وهو كيشوف فيها بهتمام من عينيها لحادين وفنفس الوقت زوينين بحال شكل دلوزة وفمها خدودها الموردة وشعرها المتموج..
لقمان : بغيت نعرف علاش هاد العناد من نهار دخلتي لهاد القصر وانت معاندة رافضة تاكلي وتشربي ورافضة حتى تكوني مع البنات؟
رحمة(كتهضر بحال الما المثلج) :
- انا ماشي جارية ولا عبدة وعمري كنت هكا انا بنت الفاع والباع بنت الدار الكبيرة بنت القصر وأخت سلطان مولاي يوسف ونزيدك خويا مغاديش يسكت على هادشي وانا متيقنة بلي هو فطريقو لهنا غير تسنى والبمهل.
لقمان : هممم أخت سلطان مولاي يوسف فضيافتنا مرحبا ومرحبا شفتك كتهضري وانت تايقة فراسك معارفاش بلي صعيب على شي واحد يدخل لهاد القصر
رحمة(شافت فيه بنص عين) :
- القصر لي حاكمو مكايعرف لا يحكم لا يعدل وكيهمو غير النسا يكونو مجموعين عليه بحال جبح ديال النحل وكل نهار يختار وحدة بحال هارون الراشيد ماتسنى منو والو وساهل واحد شجيع وقابو من حديد كينصر المظلوم ويبيت الظالم فقاع البير يدخل لقصر ديالو😏
لقمان(غوبش وصغر عينيه) :
- كايبان ليا ماشي غير لسانك لي طويل وخاصو لقطيع عرفي معامن كتهضري وقدامن واقفة ولا انرجعك لقفز لي جيتي فيه انت دابا فقصري أنا وفقبيلتي انا ماشي فقبيلتك فهمتي
رحمة(ضحكات كرام دالخوف مافيهاش) :
- عند بالك انخاف الخوف من لي خلقني وخلقك نحشم وندير الغمام على عيني ونحني الراس من سلطان غير سلاطين سلطان كيعرف لي ليه ولي عليه يحتارم لكبير وصغير يدير قيمة لناسو ويكبر بالمرا لي مدكورة فالقرآن او وصى عليها الرحمان مدايرش بيت جامع فيه صغيرة والكبيرة السمرة وشهبة لي شعرها قصير ولي طويل ويختار ويتخير كل ليلة يوقف 20وحدة ويتباها بزينها وطولتها ندير قيمة لسلطان أخلاقو وهيبتو تخليه يميل لغير وحدة لاخلاقها وحكمتها ودينها عاد يشوف زينها سلطان مكاسيفطش رجالو يدخلو لكل قبيلة ويجيبو ليه بناتها يخطفوهم من قدام بيبان دارهم ويخليو والديهم مشوية كبدتهم عليهم هذا هو سلطان لي يستاهل الراس يتحدر قدامو ولعمامة تنزل من فوق راس قدام إحترامو وأخلاقو...لقمان مصاب مايكول سكت هضرتها سكتاتو بهضرتها لي نولات عليه بحال الخنجر...صغر عينيه كيشوف فيها ولسانو مربوط
لقمان : أنت أشنو كتخرفي وشنو كتكولي شكون كاليك كنسيفط رجالي يهجمو على كل قبيلة ويجيبوليا بناتها اي وحدة كدخل لهاد القصر كدخل بخاطرها حد مابزز عليها بغات هيا تكون ملك للسلطان
رحمة(هزات حاجب وهبطات الثاني) :
- بلاما تحاول تضحك على راسك بهاد الكلام هيا انا كدابة وعلاش انا منين جابوني غادية مابية ماعليا حتى تجمعو عليا رجالك من كل قنت وخطفوني غير جاو ودارو هكا كون ماشي انت لي أمرتيهم بهادشي..
لقمان غوبش وكيدور فجنابو...مشا جيهت قنديل مشعول هز واحد الجرس من نحاس حركو وهو يدخل واحد من الحراس
لقمان : خود هادي رجعها لبيتها وعيط ليا على الوالي هو والشيخ يكونو عندي دابا هنا؟وعيط ليا حتى على قايد ديال الأمن يكون عندي حتى هو يلاه...شد الحارس يد رحمة وتم جارها وهيا كتشوف فسلطان بستهزاء وحتى هو بدورو كيشوف فيها حتى غبرات تم غادي بيها الحارس حتى قرب لبيتها تلقات ليه الخدامة لكبيرة يامنة وقفاتو
يامنة : صافي انت سير انا غادي نتكلف بيها...شداتها من يدها وجراتها معاها دخلاتها لبيت وسدات الباب وراهم..
يامنة(مخرجة عينيها فرحمة) :
- أمضرا شنو طرا شنو وقع شفت الحارس جايبك ياكما درتي لينا شي فضيحة؟...رحمة شافت فيها وهيا كتزول لبلغتها وفداك جوهر
رحمة : مادرت مدار ليا يمكن سي سلطان ماعجبتوش ومكنتش من مقامو ماعمرتش ليه العين جيتو مافيا زين لا يدينولا رجلين خلاوها ناس زمان لي حب الخدم لابد يندم لا سيفة زينة لا قلب مسلم
يامنة : لالالالا القضية ماشي هكا السلطان مامالفاش ليه عاودي ليا بتفصيل شنو وقع انا عارفة لسانك مبري منك ماتكون هادي غير شي مصيبة صبتينا بيها
رحمة : وانت مالك خايفة وكلك كترعدي ماتخافي من والو هذاك سلطانك مافيدو مايدير حاضي غير العيالات براكة عليه خلاتها مولاتها فولة مادير بيصار وفارس ماينوض غبار
يامنة(كتندب حناكها) :
- عنداك تكوني كلتي ليه هاد الكلام؟
رحمة : وإلى كنت كلتها كاع اشنو غادي يوقع انا كدامك مانقصة يد مانقصة راس
يامنة : الله يهديك الله يهديك انت معارفة والو..خلاتها يامنة وخرجات سادة عليها البيت بساروت...حركات رحمة راسها وتبسمات مكملة تبدال حوايجها..
#يتبع