هينة والغول👹مكتملة👹

👹الجزء 8👹

#هينة_والغول
#بقلم : #سناء_الصنهاجي
8- رجعات هينة بخطوات اللور هزات على قفطانها مضرقة رحمة لي ولات كترعد بالخوف..
هينة(زاعمة ومادة جبهة) :
- شكون انتونا واش بغيتو منا حنى اوليات ماهزين لا ذهب لا مال حنى غير من عامة الناس...نباها واحد فيهم ملتم
- أسكتي اديك الخادم لغشيمة عند بالك حنى عميين ولا مبهلين ولكن غراضنا ماشي بيك انت بهاديك لولية لي وراك نديوها هدية لمولاي سلطان
هينة : شش شكون هاد السلطان واش انتزما هبال والله وماتمشيو حتى نهز هاد الحجرة نعطيها ليكم لراس وحربوش شي واحد فيكم يقرب ويأدينا ويلاه او الله حتى نغوت وندير صباعي فودنيا ونخلي أهل القبيلة يتجمعو عليا وديك ساعة تشوفو..أشر واحد فيهم لاخور دغية طار على هينة هزها وشد ليها إيديها وثالت شد رحمة من إيديها ودار إيدو على فمها..
هينة(كتركل وتغوت) :
- أطلق اطلق اداك عيفة الرجال اجيفة طلق حكرتي علينا حيت حنا غير عيالات شكون انتوما واش عارفين شكون هاديك هاديك خت سلطان يوسف مولاي لقبيلة...شاف واحد فتاني وضحكو..
- وهادي همزة زينة مولاي سلطان غادي يعجبو الحال يلاه لوح عليا هاديك الفلفة الحارة فالواد ولا شوف اشمن جايحة ديهة ويلاه خلاص راه طولنا لجلسة فهاد القبيلة..
هينة(كتركل) :
- انا فلفلة حارة اداك مسمارة الخشبة ماتعرف وجهك من قفاك داير بحال ديك الخنشة ليابسة اطلق واكواك عتقو الروح واكواك اعيباد الله عتقو الروح...ماحسات براسها حتى جاتها روسية لراس من تما مابقات عقلات..
- إيه كالوها لي معندو زهر واخا يغطس راسو فذهب زهرو زهر منحوس مخبل..
****
فواحد البيت مظلم مافيه فراش مافيه حصير من غير شمع شاعل البرودة طالعة منو كيجيب الخوف...كانت مغيبة حاطة راسها على الحيط وإيديها مشدودين بسناسل من الحديد شوية بشوية بدات كترجع لوعي ديالها وتفيق كتحس براسها كيضرها من ضربة لي ضربات كلها كانت فازكة وخانزة وجها كلو موسخ بالغيس دالواد لي ترمات فيه...فتحات عينيها وهيا كتوجع بدات دور راسها وتشوف فين هيا كيبانو ليها رجال لابسين لباس غريب بحال الحراس واقفين بحال الى متلجين دورات راسها حتى كيبانو ليها إيديها مكبلين غوبشات وماعرفات باش تبلات..
هينة(كتجر فيديها) :
- طلقوني فين أنا فين جبتوني واكواك الحق عتقو روح...جا عندها واحد فدوك الحراس وبصوت يجمد الما دوا
- اتسكتي فمك اديك الخادم قطعي الحس ولا داك لسان انقطعو ليك ونشويوه قدامك
هينة : تشويوه ولا قديد واش اتخلعني زعمة وطلق اوا طلق بعدو مني واشكون انتوما شكون...مجات فين تكمل كلامها حتى تسمع صوت باب تفتح وطل منو ضو شوية رجع تسد كتسمع غير صوت المشية لي مولاها مزال حتى مبان...من غير صوتو لي تسمع بحال البركان..
- أش هاد الصداع والغوات...نقز الحارس لي كان كيهضر مع هينة..
- والو أمولاي غير الخادم لي جبنا اسيدي فاقت ودايرة لينا روينة بغواتها..طل وجه رجولي جميل فيه حسن البهى سبحان من صورو فأبهى حلة بلبسة بيضة وخنجر مدهب فجنب وجهو ممحي من ضحكة من غير تغوبيشة وشوفات كيخلعو كيشوف بيهم هينة..تم داخل لعندها وكيطلعها ويهبطها
يوسف : منين جبتوها من شي مجرة ولا من شي حفرة
الحارس : لا أسيدي كانت فالواد مليوحة بحال شي بهيمة مدبوحة...هينة سكتات حتى عيات ونطقات..
هينة : أيوا لزم حدك وانت داير بحال داك الفروج لي يظل يقاقي فسطوحة..
يوسف(بالغوات) :
- انت اتسكتي وتصرطي لسانك ولا مايعجبك حال..شاف فالحارس ونطق
يوسف : طلعها لفوق والى بدات فالغوات سد ليها فمها...رجع شاف فيها دار إيديه وراه وخرج من عندها...تم جاي جيهتها الحارس وقفها حيد فك ليها إيديها شدها من دراع وشد الحارس تاني من دراع وهزوها بحال شي خنشة...هيا ماهضرات ماتكلمات كتشاور مع راسها بلي حسن ليها تسكت حيت سكات حكمة من الحكايم لوكان ماكركر ولد الحمامة مايجيش الحنش هايم...حسن ليها تسكت وتشوف بعويناتنا حتى تعرف راسها من رجليها..
طلعوها الفوق وهنا عينها حوالت من المنظر لي شافت واش هذا حلم ولا علم يمكن لوحة لي لاحوها فالواد ماتت ودابا كاينة فسما داكشي باش كتشوف هادشي لا ويلي اشنو كتكولي أهينة بغاو يحمقوك كالتها ليا مي كانليا طريق لبنات راها كحلة زحلة...هوما هازينها وهيا كدور فراسها وتمتع عيانها حتى دخلوها لواحد البيت كبييير فيه جوج كراسة مطليين بلون ذهبي ومنقوشين زرابي طوال من عند الباب حطوها فداك البيت ورجعو بلور وقفو عند الباب دارو يد على يد وهزو راسهم لسما بحال الى غير مرسومين هينة حتى لدابا مازال مافهمات والو...وهيا دور فعينيها وتحط فيديها لي ضراتها تفتح باب خور ودخل منو نفس الشخص لي شافت التحت..دخل كيشوف فيها هاز حاجب ومهبط تاني كلس على واحد فدوك جوج كراسة دار إيدو على رجلو وزgا فيها الشوفة
يوسف(بصوت رجولي تقيل) :
- فين درتي ختي رحمة؟
#يتبع