هينة والغول👹مكتملة👹

👹الجزء 16👹

#هينة_والغول
#بقلم_سناء_الصنهاجي
16- الشمس زادت ضوات وعلى راس هينة وسلطان بركات...دازو من طريق خاوية غير هوما وشجر والواد..كانو غاديين حانيين راس وساكتين حتى وصلو عند شي ناس كيتخاصمو واحد باغي يضرب تاني وقفات هينة ودارت إيدها على راسها تغطي من شمس باش تشوف مزيان..
دار سلطان بانت ليها واقفة
يوسف : مالك وقفتي مزال مطولنا طريق باش تعياي؟
هينة : ماشي لعيا لي وقفني ولكن دوك ناس وصوتهم وغواتهم لي وقفني
يوسف : وحنا مالنا خلينا غير فحالنا وهمنا
هينة(شافت فيه) :
- وراه انت زعمة لي خاصك توقف وتسول مالهم ماشي أنا انت لي سلطان زعمة وسيد الناس كتعرف المكشوف ولمخبي فراس...خلات بهيمتها معاه ومشات لديك جماعة وقفات عليهم..
هينة : أهاه اهاه حشومة وعيب أش بيكم أهاد الناس...كانو شي عيالات ومعاهم جوج رجال هوما لي مضاربين..نقز واحد فيهم..
- وانت مالك الالة السوق سوقنا وحنا ماليه
هينة : ماكلتي عيب امولاي ولكن حشومة المفاهمة ماشي بليدين بلعقل الحكيم...جاوبها واحد من دوك الرجال كيبان صغر من التاني
- حتى لهادي ومافيها مفاهمة الالة ولات فيها ليدين
هينة : حتى حاجة ماتستاهل وغير بالمهل كيتكال بودنجال شنو بيكم وشنو مخصر خاطركم نلقاو ليه الحل...هضرات وحدة فدوك العيالات
- أجي الالة لقاي ليهم انت الحل اما حنا راه عيينا وتلفنا ومالقينا منديرو وحرنا..
هينة : فهموني شنو واقع وانا بإذن الله انلقى ليكم الحل..
هنا هضر سيد اللول..
- الالة انا وهاد السيد خوت من صغرنا مكنتفارقوش بحال سمن مع العسل حتى حاحة ماتفرق بيناتنا ولا تخصر خواطرنا لا من جيهتي لا من جيهتو واخا ماشي من أم وحدة ولكن من بو واحد وهادو مواتنا..
هينة : حتى لهنا ومزيان زيد كمل
- إيوا يلالة وصل لوقت لي ندير فيه ولادي او وتادي وقصدت الدار الكبيرة دار مولاي الشيخ مانلقى غير خويا حتى هو تما...حكا ما حكا حتى هو باغي يتزوج ودابا تاعت الله شكون لي سبق انا ولا هو؟
هينة : وانت لقيتيه تما هو لي سابقك..جاوبها الخو الصغير
- هاااا هاهيا كالت الصح والمعقول..جاوبها الخو الكبير
- ولكن راه انا لكبير وانا لي سابقو وانا لي خاص نتزوج من دار الشيخ ماشي هو..يلاه أيجاوبو خوها ويبداوها مدابزة حتى وقفاتهم هينة..
هينة : واتسناو ياهاد الجماعة مالكم زربانين مابقا عندكم الصبر واش هاد الخاوة اتفكوها بمقاتلة على قبل مرا خلاوها ماليها وجدودنا الله يرحمهم عليها كلمة اللبن وزبدة كانو خواتات مافرقوهم غير العيالات...عطيوني ودنيكم وفتحو معايا عينيكم..شكون هاد الشيخ بعدا لي قصدتو بابو..هضر الخو الكبير
- الشيخ الموحى..
- هزات هينة حجبانها كتفكر شوية تبسمات..
هينة : شيخ موحى لي جات خيمتو فشوكة حدا النخلة المدلية طويلة
- ايااااه الالة هو هداك..
هينة : إيوا اسيادنا الشيخ موحا راه عندو جوج بنات الكبيرة مولات العقل ورزانة وتباتة قمر وتانية الصغيرة اللبيبة حلوة اللسان نور القنديل وبجوجهم بلا زواج...كون صبرتو غير شوية ومزربتوش كون حتى واحد فيكم مايهز إيديه على تاني ولكن انتوما كفوفكم خف من رزقكم...نسيتو الدم ولي بيناتكم نسيتو عشرتكم نسيتي بلي انت فيك باه وخوه بسباب مرا درتي فيه إيديك هادي هيا الخاوة حدها دنيا غركم الشيطان ياهاد الناس أش هادشي وليتو فيه ماشي حشومة وعيب هكا وصاكم المرحوم على نفوسكم وبعضياتكم دغية شيطان لعب بعقولكم..حدرو راس ومازادو كلمة وحدة معاها..
هينة : ودابا كل واحد ايتزوج بلي بغات قلبو وحل ساروتها قفلو وقبل ماتغيسو حسبو ألف حساب راه الخاوة ولي بيناتكم ماعندها تمان ياهاد الناس..
الخو لكبير : الله ينعلك ياشيطان ماعرفت كيفاش غاب عقلي ويماني عليا(باس راس خوه) سمحليا أخويا وعرسك ايكون قبلي ومنتقدمش قدامك
الخو الصغير : انت لي سمح ليا أخويا طيش مني والله مابقات تعاود وكاع لي تخصر ليك الخاطر بناقص منها..
هينة(ضحكات) :
- وهكا نبغيكم ويلاه يلاه هنية عليكم خليتكم على خير..
الخو الكبير : صبري الالة...حل بزطامو وجبد منو دبالج ديال الذهب مدهم ليها
- هادي هدية منا ليك عفاك لاترضيهاش وقبليها لي يجري فالخير مايلقى غير الخير
هينة(مارضاتهم شداتهم) :
- وسعداتك يافاعل الخير اليد لي طعماتنا حلال تيكونو ناسها قلال خليت ليكم لهنا وراحة البال..
#يتبع