هينة والغول👹مكتملة👹

👹الجزء 39👹

#هينة_والغول
#سناء_الصنهاجي
39- صبح صباح وكان الجو ما بارد ماسخون بحال الأيام لوهرا لي كانت سخونة وشمس ديالها كتحرق...كانت هينة واقفة ححدا حمارها كتقاد عليه الحوايج حتى سمعات تحنحينة ديال يوسف وراها دارت دايرة يد على جنبها ويد مغطية عينيها من شعا
هينة : مالك كتحنحن بحال العود منين فقنا ماسمعنا صوتك عاد طلقوه؟
يوسف : براكة من المزايدة فالهضرة بغيت غير نكوليك على هضرت البارح
هينة : لالا كاعما تكول انا حدي نوصل معاك لمورادك ونمشي فحالي كاع لي مايتسنط ليا ومايدير بكلامي هناني ومكساني ماعراني نمشي فحالي نقابل نيت معيزاتي توحشتهم
يوسف(بنهيض) :
- كتليك نقصي شوية من الهضرة زايدة لي معندها فايدة وسمعيني مزيان انا قابل على لكلام لي كلتيه ولكن سمعيني مزيااان حتى لحيتي والله لا قربتي ليها أبنت علال وحليمة
هينة(طلعاتو وهبطاتو وضحكات ومعرفاتش كيفاش الكلمة حتى خرجات من فمها) :
- أصلا مايهونش عليا نحيدها ليك هيا لي مزيناك ومحلياك...يوسف هز حاجب وهبط الثاني مصدوم من كلامها يعني بلي كتشوفو زوين وبلي حاجة عليه العين هادشي خلات فرحتو تكبر حيت قلبو هاد المدة مال ليها كاع لي كان يتمناه فشريكة حياتو لقاه فيها زين وتباتة والعقل والحكمة وهادشي شحال وهو يقلب عليه ولكن لقاه مخبي فهينة بنت تاجر علال لي سلبات ليه القلب وحلات بابو وسكنات فيه بلاما يحس ولا يدرى..
- هينة عاد حسات براسها أشنو كالت بلعات ريقها ودورات وجها عاد نطقات وهيا كتنش على وجها :
  - الحال عاد كان مزيان شفت الشمس رخات سخونيتها ويلاه بلاما نضيعو الوقت يلاه نشدو طريق...كلامها فيقو من سهوتو حرك ليها راسو بالإيجاب ركب على حمارة وحتى هيا هكاك وشدو طريق...
- طول طريق حد ماهضر مع الثاني كل واحد فاش كيفكر ويخمم المطارق فراسو خدامة تدي وتجيب...يوقفو شوية يرتاحو ويرويوهم عطشهم ويرجعو يكملو طريق من جديد حتى بانت واحد المرة غادية كتسرح فالبهيمات ديالها زادو قربو منها كانت بنت مزال صغيرة شوية شادة شعرها ظافرها ولاوياه على راسها لابسة واحد البلغة او واحد القفطان بالي شوية وعليه واحد الحايك فالبيض حتى هو كيبان قديم...نزلات هينة من فوق حمارها وحتى يوسف نزل خلاتو ومشات لعند ديك البنت قربات منها ولوخرا هزات عينها شافت فيها بتردد ..
هينة : سلامو عليكم
البنت(بتردد وصوت رقيق) :
- وعليكم السلام
هينة : ماتخافي ماتدهشي حنا بحالنا بحالك غير انا وخويا تلفنا فطريق ماعرفنا فين حنا حتى شفناك واش كاينين الناس فهاد المكان ولا غير ريح وشيح؟
البنت(بحال الى رتاحت) :
- لالا كاين الناس غير تمشاو شوية اتبان ليكم القبيلة
هينة(تبسمات) :
- الله ينورك ويبلغ مقصودك عفاك شنو الى جات على خاطرك نسولك شنو سميت هاد المكان زعمة هاد القبيلة؟
البنت(حركات راسها) :
- فهمتك هاد القبيلة عمري مشيت ليها حيت ساكنة مع والديا فوق هاد الكودية ولكن سمعت با حيت كيمشي يبيع فيها الصوف بلي زوينة بزاااف داكشي باش سميتها ألف ليلة وليلة...هينة حلات عينيها بالفرحة وشافت فيوسف لي ماسمعهمش مزيان ومافهم والو...دارت هينة عند البنت وضحكات ليها
هينة : الله ينورك ويعلي شانك وقدرك...دارت وخلاتها تكمل على طريقها ورجعات عند يوسف لي سولها :
   - شنو كالت ليك وشنو كلتي ليها؟
هينة : سولتها واش كاين شي ناس هنا كاتليا بلي نمشيو غير شوية وغادي نلقاو واحد القبيلة
يوسف : كملي كلامك شفت الفرحة وسرور فعيانك
هينة(كتهضر بالفرحة) :
- وعلاش لا والقبيلة لي كالت ليا عليها هاد البنية عيا قبيلة ألف ليلة وليلة هادشي كيعني بلي وصلنا لمورادنا ومقصودنا😄
يوسف(تنهد ورتاح) :
- الحمد لله ولكن واش متأكدة؟
هينة : وعلاش البنت أتكذب البنت صغيرة ماتعرف لا تكذب لا تغدر
يوسف : نكملو طريق ونوصلو ونسولو من جديد ونحيدو الشك
هينة : حتى انا هادشي لي كلت ولكن قبلو مانحطو رجلنا فيها خاصك تبدل هاد الحالة☺
يوسف(بستغراب) :
- من دابا؟
هينة : وعلاش يحسابلك اتدخل لقبيلة بحال هكا هضرنا وتكلمنا بلا ملاغية وزايدة فالهضرة من دابا انا مك عينة وانت بنتي فضيلة المرضية😉
#يتبع