هينة والغول👹مكتملة👹

👹الجزء 3👹

#هينة_والغول
#بقلم : #سناء_الصنهاجي
3- دخلات هينة لدار حطات الحطب فالمراح ومشات لبيت هينة كانت وحيدة وليديها لالة حليمة وسي علال مول ثواب هينة كتبدل فحوايجها وهيا ساهبة حتى دخلات عليها مها قفزاتها من بلاصتها
حليمة : أمالك أهاد البنت حالك مكايعجبك ياك لاباس شنو واقع منين جيتي من الغابة وانت منطقتي لا بحرف ولا بكلام وماشي عوايدك هادو
هينة(دارت وشافت فيها) :
- مي نعاود ليك معرفتك تيقيني ولا تكدييني وتكولي هادي فير هبيلة ضرب فيها برد المغرب وتسطات
حليمة : فين عمري كدبنت ابنت كرشي كولي شنو كاين انا ميمتك الما تيقتك شكون ايتيقك
هينة(تقادات فالكلسة وبدات تعاود لمها من طاق طاق لسلامو عليكم)..حليمة شعر لحمها وقف ولحمها بورش فاش سمعات هضرت بنتها
حليمة : أش داك تهزي ديك الحديدة من دون البنات يالمنحوسة لملبوسة أش داك
هينة : وانا علمت ولا عرفت معندي مندير مكتوب ومقدر والمكتوب على جبين لازم تشوفز العين...بقات مها ساكتة شحاال هزات عينها وشافت فبنتها
حليمة : بسبابك انتحرمو من السمن المالح والى بغاه باك شنو نكوليه؟
هينة : كولي ليه بلي هينة ولات غير دوقو ولا تشم ريحتو كطيح طيحة وحدة وانت عارفة با شحال عزيزة عليه مايخسر ليا خاطر
حليمة : وانت كتعرفي تخسري لخواطر الالاهم هينة
هينة : مكتااب هذا والمكتاب انصرفوه انت غير عمرك تجبدي سيرة السمن واخا يدوزو عوام وعوام...شافت فيها مها وقفات وحدرات راسها
حليمة : إيوا شنو انكوليك أبنتي لا إله إلا الله ماعلينا ابصبر وداك الحطب عمرك مزال لا مشيتي جبتيه من ديك الغابة بلعاني كتبغي تمشي انت ودوك نخلات حتى لتم وهاهيا ماجبتيها غير انت فضلوعك من غيرهم هوما الالة لي بغا يمشي الغابة يمشي وحدة انا صاخطة عليك الى وصلتي ديك لغابة مزال وانا علمتك...خرجات وخلات هينة دايرة يدها على خدها وتخمم ديك ليلة باتت بلا عشا مابغاش يدوز ليها دخلات لبيت فرشات بلاصتها ونعسات تحل صندوق ديال حوايجها وبانت حديدة الغول كتلمع مخبية بين الحوايج كيفاش حتى دخلات لصندوق الله وحدو العالم...
#الحاضر
جنب الواد حاطة بانيو من الحديد دايرة فيه الما وصابون تفرك فالحوايج وتحط حتى وقفات عليها لعالية بنت شيخ قاسم تلعب فظفايرها وتقلي فسمها..
العالية : ههههه هينة شنو كديري جنب الواد؟...علات فيها هينة راسها هازة حاجب ومهبطة تاني تبسمات ليها
هينة : غير حوايجي مساكن خنقاتهم الخيمة وجيت نمشيهم شوية جنب الواد على وعسا يلقاو مكتابهم علاش غير بنادم لي عليه الله يضل يدور على الواد باش يلوح صنارتو ويصيد صيادتو
العالية(غوبشات فيها) :
- شفتك بحال الى كتحشي لهضرة؟
هينة : إيوا تيكوليك الحر بالغمزة والعبد بدبزة ولالا العالية😁
العالية : حكل فيك ياقوت لي عندها زديح ورديح فدار تزوجات ومعيطاتش عليك وياحسرة راك صاحبتها بقيتي فيا
هينة : ههههه لالا امولاتي الى كانت غير ديك العراضة زينة معندي مندير بيها وصاحبي هو لساني وفهامتي وحيلتي اما صحبة العيالات فيها غير لخلا وجلا خليت ليك شطيح ورديح وهز لكتاف حيت انت لي مالفة بيه😂...العالية تعصبات وعرفات راسها مغاتدي من هينة لا حق لا باطل ضربات بجلايلها وكملات طريقها ومشات...ضحكات هينة وكملات صابونها سلات وشلات وهزات حوايجها رجعاتهم لدارهم ونشراتهم...فطريق كولشي كيوقف هينة كيبغي يخطف منها غير دقيقة يسمع لكلامها وقوافيها لي مكتقاداش يموت عليه صغير ولكبير داكشي باش عزيزة عند كولشي من غير شي بنات دوار لي ماحملينها مقابلينها وخايفين منها لا تدي ليهم مولاي سلطان يوسف الغالي واخا هيا كاعما كاين على بالها ولا حاسة بيه ولا عارفاه كاين ولا مكاين..من بعد نشيرها لحوايج ومن بعد الخبز ماخمر طيباتو وجدات طاجين وتجمعات عليه هيا ومها وباها..
حليمة : عمري شفت بحال صحبة ديال الغدر سوسة كانت تدخل لداري وتاكل طعامي ونهار تزوجات عوجت الوقفة حرام مجات حتى كالتها ليك ولا عرضات عليك خافتك تلحسي ليها طباسل
هينة : شغلها هداك أمي مالي اندير ليها سيف على عنقها ونكوليها عرضيني عراضاتها مكساتني ماعراتني بالعكس غير هناتني(بدات كتضحك)
علال : والله أبنيتي إلى عندك الصح بنادم لي معرضك هناك تكلسي فداركم حسن ليك ماكساك ماعراك مزادك طرف مانقصو منك
حليمة : انا بقات فيا أشمتة لي ضل تدق فبابي وتعيط على البنت تبغي تشد بيها جماعة وديرها فراجة وفالأخر أشافت راجل بحال معرفت شنو شافت وهو داير بحال ديك نخلة لي تقوس ظهرها ولوات
علال : أتقاي الله أهاد المرة راه تعياب فخلق الله خايب ستغفري مولاك
حليمة(كتقطع فالخبز) :
- أستغفر الله العظيم وأتوب إليه ياربي تسمح ليا لسان مافيه عظم اغير تعصبت وصافي
هينة : براكة علينا من هاد السيرة وخليونا نكملو ماكلتنا زينة لحلوة لبنينة ونعرفوها منين دازت..قلبوها ضحك ومحاجية وهذا حلهم فكل مخاصمة يرجعوها ضحك ولعب بحال الى حتى حاجة مكاينة..
#يتبع