هينة والغول👹مكتملة👹

👹الجزء 17👹

#هينة_والغول
#سناء_الصنهاجي
17- تمات راجعة هينة عند السلطان لي كان مزال واقف حاضيها وحاير فيها وقفات قبللتو مبسمة..
هينة : ودابا يمكن لينا نمشيو
يوسف : بغيت نعرف غير منين كتجيبي هاد القوافي وهاد الحيلة لي كتخرجي منها راسك وتخرجي منها ناس؟
هينة(ضحكاات) :
- هادشي سر من عند الله سبحانه معطي لينا من جدودنا
يوسف : عنداك شي واحد فيهم يكون عرفنا؟
هينة : متخاف شاي امولاي غير زيد نكملو طريقنا قبل لا تغرب شمسنا ومانعرفو فين نمشيو ولا فين نروحو...ساكو حميرهم وكملو طريقهم شمس كلما زاد نهار زادت بركات جبدات هينة شكوة ديال الما وشربات منها نغيزة بللات بيها فمها وخلات الباقي ينفعها...يوسف مانطق بحتى كلمة غير معلي راسو ومكمل طريقو...
هينة : شفت مزال مبانت حتى علمة لا شجرة لا قرية لا بنادم واش متأكد غاديين فطريق الصحيحة؟
يوسف(بتعجرف) :
- واش انت يلاه 3 سوايع باش خرجتي من دوار وبغيتينا نوصلو واش حنا إنس ولا من البهايم
هينة : انا غير سولت بشوية عليك اسي يوسف الى جاوبتي مزيان مغاينقص ليك يد ولا رجل
يوسف : حيت انت كتسولي شي أسئلة معندها معنى
هينة : وهاهيا سكتات...كملو طريقها وشمس غادية وكتبرد ومزال مبان حس شي بشار وباين هاد الليلة اللولة غادي يدوزوها غير فالخلا والقيفار..
هينة : هالي كالت هينة شتي باش طلبت من الخادم ديالك الخيام وزاد حيت عرفت بياتنا بين شجر وغطانا سما وسمر
يوسف : معندنا منديرو من غير صبر حسن نوقفو هنا ونوجدو بلاصتنا قبل مايروح الليل ومايبان لينا والو...وقفو بين جوج شطرات وربيع مدرقهم من لور ربطو بهايمهم لشجر وبداو كيقادو فخيامهم...هينة مكبراتش شان لسلطان بينات على حنت إيديها وقدات خيمتها براسها فرشاتها وقداتها وكلسات ترتاح
هينة : الله ياربي رجليا طابو مساكن مصاب هاد البلغة توصلني جاب الله جبت زايد معايا
يوسف : كان خاصك تكوني على بال الأرض كلها تراب وحجر ضروري من البلغة تقطع وتحل...سالة خيمتو وكلس حيد عمامتو وجبد شكوة ديال الما شرب
هينة(علات عينها فيه كيفاش هاز حاجب ومهبط تاني بنخوة) :
- فيك جوع؟
يوسف(دار عندها) :
- لا مافياش الى فيك انت كولي اما انا داتي كاتحمل جوع واخا نبقى بيه مدة أسبوع
هينة(كضحك) :
- سبحان الله فرق بسيط بينك وبين جمل هو كيصبر على العطش وانت على جوع😂😂...ضحكات حتى شبعات شافت فيه لقاتو كيشوف فيها بشوفات ديال الشر
هينة : أحم غير كنبسط معاك وصافي...دورات راسها وجمعات الضحكة جبدات من ساك زاد الخبز والزبدة والعسل...كلات حتى حسات براسها سدات جوعها..سرحات رجليها وسكتات..ماعرفات ماتكول ولا باش تنطق..حتى شافت يوسف ناض وقف
هينة : فين غادي؟
يوسف(خنزر فيها) :
- واش أي حاجة بغيت نديرها خاص نتشاور معاك...خلاها وتم غادي حتى غير بقات دورها فراسها وتسول فين يكون مشى حتى جاتها لبالها بلي يمكن باغي بيت الراحة جاتها ضحكة وعاد فهمات...جمعات رجليها وربعاتهم وبقات دور فعينيها حسات بيه تعطل تشوشات وقلبها ماطمنها فين يكون مشى ياكما يكون زاد وخلاها ودار هادشي كولشي لعبة باش ينتاقم منها بدا الشيطان كيلعب بعقلها هي تستغفر وتعود من شيطان لا مايمكن كون بغى يغدرها ولا يلعب بيها مايجيش معاها براسو يسيفطها غير مع الخادم ديالو...وهيا كتفكر وراسها يدي ويجيب سمعات حسو دارت كيبان ليها جاي وفيديها عرام ديال العواد...عاد رتاحت وتنفسات مزياان..وصل حداها وحط دوك العواد
هينة : خلعتيني يحسابلي غير..
يوسف(قاطعها) :
- عرفت عقلك غادي يمشي بعيد وتكولي بلي غدرت بيك انت مع سلطان ماشي مع دراري صغار لي كينقزو فراس جبل...خنزرات فيه ودورات راسها خلات ليه نخال ينقب فيه...
#يتبع