هينة والغول👹مكتملة👹

👹الجزء 5👹

#هينة_والغول
#بقلم : #سناء_الصنهاجي
5- مقابلة مع هينة هزات إيدها لي مزينة بنبالة دنقرة وخاتم بالحجر عامر..زولات النقاب وبانت تبسيمتها شافتها هينة وتبسمات هزات إيديها وعنقات ورحبات
هينة : نهار كبير هذا منين شفناك اختي أش هاد الغبرة
- إيه زعمة الما سولت انا متسوليش انت أحيانة عليك توحشتك العفريتة غبرتي غبرة وحدة مابقيتي لاتسالي لا تسولي
هينة : واش غادي نكوليك ارحمة انت داري عارفاها وبابها مفتوح لأي واحد انت مكتسولي
رحمة : اباركة من الفهامة حتى انا داري باينة وغير قريبة ليك غير انت لي راسك قاصح الله يهديك
هينة : انت قصرك مقامو عالي وانا غير قصيرة نخاف ندخل ليه منخرج هههه
رحمة : أحيانة عليك راه كنكوليك انت عفريتة وكترت فيك الفهامة
هينة : ودابا واش جيتي تسولي فيا ولا جيتي على شيحاجة خرى راه كنعرفك كتغبري تغبري ومتباني غير شيحاجة
رحمة(ضحكات) :
- هادشي باش كتشهميني حتى حاجة متخفى عليك إيوا يلاه معايا لدار ونشربو كاس دتاي ونهضرو
هينة : لاواااه اجي تحت ديك شجرة البركة فيها تحلى..تبعات رحمة هينة وكلسو تحت الشجرة لي شاف رحمة مايكولش هادي خت مولاي السلطان يوسف الغالي..
هينة : إيوا خوي لمزيودة أش جابك وشنو مقصودك؟
رحمة : العفو منك وخلاص إيوا سمعيني وحلي معايا ودنيك كيف سمعتي خويا يوسف باغي يتزوج حتار وماعرف مايختار مالقاش داكشي لي بغا ليه خاطرو وقلبو...إيوا جيت عندك انت عارفاك كتعرفي بنات القبيلة وحتى لقبيلة لي ملاصقة معانا بغيتك تعاونيني نختار ليه وحدة تكون لطفيفة ولبيبة ولسانها حلو حادكة وقد فمها قد دراعها تكون فهيمة ماشي غشيمة تفهمو من نظرة بلاما يتكلم بلاما يأشر تكون بنت الناس تكون زينة ولكن قد زينها قد فعلها...هينة هزات حاجبها وضحكات
هينة : وعلى هاد القيبال مولاي سلطان هبيل وغشيم يكما خوك بهل ومافيه فايدة بحال بلعمان حمر ومافيه الريحة😂
رحمة : ولاواه لاواه خويا زين والفهامة والأداب وصواب والحكمة والأخلاق قد فعلو قد زينو وكيحكم بالعدل وهيبتو مخلية كولشي ناس يضربو ليها ألف حساب
هينة : ومدام منو لكاينة علاش مايختار بنفسو المرة لي تونسو
رحمة : واخا يختار المرا متعرفها وتعرف شنو تحت راسها غير المرا اما راجل تلعب عليه الغشرة تبين ليه الفهامة وتبين ليه زين والحداكة والهضرة لحلوة غير ديرو فيديها تولي وحدة خرى
هينة : هادي عندك مكدبتيش فيها إيوا شنو انكوليك ابنت الجود ماعرفت منكول
رحمة : كولي بسم الله وديري إيدك فيدي وعاونيني
هينة : إيوا يلالة والله منرضها فوجهك انا معاك ولي بانت ليا فيها الوصف لي كلتي نكولها ليك ونعلمك ونعاونك
رحمة : وانا كل نهار انا عندك ومعاك
هينة : ماكلتي عيب حتى هذا كلام..وقفو بجوج عنقاتها رحمة بنت لالة غيثة وخت سلطان..خلاتها كتشير ليها بيديها وكملات طريقها تنهدات هينة ورجعات بيها داكرة لور نهار تعرفت برحمة سلطانة خت سلطان كانت خارجة وتعرضو ليها القطاطعية كونما هينة كون داو ليها لي قدامها ولي وراها من تم ورحمة عزيزة عليها هينة وزادت عزات عليها من خبيرها وتعاويدها ودابا مالقات غيرها لي يعاونها يلقاو مرة لسلطان..رجعات هينة لدارهم لقات حليمة عند الباب كطلع فيها وتهبط
هينة(كدور فعينيها) :
- مي شفتك واقفة عند الباب كتسناي شي حد؟
حليمة : كنتسناك انت ابنت كرشي اشمن زبلة دايرة تاني أكحلة العفطة انا عارفاك لاش سلطانة رحمة كانت هنا ياك لاباس شحال هذا مادقات بابنا حتى ليوم شي يهودي مات
هينة : والو أمي سيدة اتوحشاتني وجات تزورني
حليمة : أي اي اي توحشاتك وجات تزورك مع انت وياها من صغر حبيكة لبيكة أبنتي راه نواضري ناض فيهم شيب بلاما تبقاي تخبري عليا عند بالك انا هوما دوك بنات لقبيلة لي يضلو يتسنطو ليك لمحاجيك ويتيقوه
هينة : وابغيتي تيقيني مرحبا مابغيتي مرحبتاين سيدة مسكينة امهمومة ومغمومة وجات لعندي طل عليا وتفوج على قلبها مسكينة هذا مكان واش تبغي نكولو لا لخت سلطان حشومة مجاتش تبغي يجري علينا من القبيلة
حليمة : تفوج على قلبها دار جماني هادي ايوا واخا ابنيتي اندير راسي هبيلة ونتيقك واها كلامك راه دخل من هنا وخرج من هنا وسيري تيقي فلبنات راه غير كيضحكو عليك ويبغيو يشربو بيك كاس دتاي لي ديتيه من ياقوت بنت الحداد اتديه من خت سلطان..
هينة(ضحكات وسالفها طلقات) :
- عمرها مدار بيا أمي غير كوني هانية بين جماعو كندير راسي غشيمة وانا راه العقل يوزن قنطار والحيلة عندي حسن من العار وكيف كالو سيادنا لوالة اللحلاحة غلبت سحارة ولالا..
حليمة : وغييير زيدي ابنت كرشي هاد طريق رحمة ومجيتها ماعجباني ودابا تكولي مي كالت اتبقاي تابعة طريق لبنات جتى تجيبيها فراسك وراه مانسيت هادي عوام شنو طرا فالغابة وخلاها با الله يرحمو عليها كلام اللولة عسيلة وتانية سمينة وتالثة حصيلة...
#يتبع