هينة والغول👹مكتملة👹

👹الجزء 18👹

#هينة_والغول
#سناء_الصنهاجي
18- ليل راحل ودنيا ظلامت من غير الكمرة ونجوم ولعافية لي شاعلة هوما لي مضويين المكان يوسف كان كالس رجل مسرحها ورجل موقفها مشات عينو لهينة لي موسدة رزمتها وكتشوف فسما
يوسف : علاما كالت ليا ختي رحمة بلي انت لي عتقتيها المرة لولة من قطاع الطريق كيفاش زعمة لمرة لولة كنتي شجيعة ودابا خوافة؟
هينة(شافت فيه) :
- عرفتك لاش كترمي وحشيان الهضرة مكاين لاش والى بانت المعنى لا فايدة فتكرار المرة لولة كنت جنب الواد وكنت بوحدي والحجر فيدي وهيا دارو بيها بوحدها اما هاد المرة راه جاونا بجوج وعلى غفلة وشدوني وشدوها ولكن لومة ماشي عليهم لومة على حاكم البلاد لي مخلي دنيا سايبة ومعارف داخلها من خارجها وكونماشي لطف الله كون كاع بنات دوار غبر ليهم الأطر
يوسف(خنزر فيها) :
- كتلوحي ليا الهضرة أنا مكتحشمي مكترمشي دايرة بحال ديك اللفعة لي كضرب هك وهك
هينة : ياك أمولاي إيوا بعدا اللفعة راه كتنفع مرة مرة خلاوها ناس زمان دير خير مايطرا ليك باس أعباس..
يوسف : لي بغيت نفهم هو علاش ناس دوار كامل يهترو بيك ويضربو المثال بسالفك وزينك وانا حتى لدابا ماشفت والو من غير لخيوبة وطول لسان
هينة(ضحكاات) :
- إيزا كيكولي خايبة وتنوس ولا غزالة وتهوس أما سالف هينة أمولاي راه راكد فغارو حنش طويل شاد تيقارو ما يشوفو غير راجلي وتاج راسي ومنو رجال غارو والفاهم يفهم والعاقل يرزم فدارو😉..
يوسف : نعسي حسن ليك لسانك طويل طول من طريق ومضى من الموس وانا صبري قليل مكنحملش تقابيح وكترة الهضرة ويلى ضبرة ضراتني كنقطعها كيف كالو قطع الضبرة تبرا..
هينة(ضحكات) :
- تبات فراحة الله أمولاي...حدرات الرواق الرقيق وتخطات بلحاف خفيف وعطاتو بظهر ونعسات...حتى سمعاتو نباها
يوسف : كنتمنى متكوني كتشخري فنعاسك ولا تهضري فليلك
هينة : نعس أمولاي نعس ورتاح انا دايرة الما لي فالبير ماتسمع صوتي ماتسمع لغاية...هكا ختماتها وخلاتها ومع عيا طريق دغيا غفات ونعسات أما هو جنب يديه وجنب يخليه حتى نعاسو جا وتسدو عينيه..
****
فالقصر الثاني يامنة واقفة قدام باب من نحاس كبير ومسدود قدامو جوج خدم..لي فتحوه بشوية وهوما حانيين الراس...حدرات ياكنة راسها ودخلات حتى وقفات وسط داك البيت لي كان قدو بقامتو طويل وعريض وعالي نموسية واسعة يجري فيها الخير مغطية بأحسن غطا وأحسن رواق دالحرير وجنب منها عود موسيقي وطبلة فيها صمغ وريشة البيت كلو مضوي بشمع وجنب سرجم الكبير واقف بقدو وقامتو طويل وغير شعرو لي باين من اللور داير إيديه وراه إيديه كيكسيهم شعر خفيف وجوج خواتم من فضة مرصعين بالحجر الكريم..
نطقات يامنة وهيا شادة يديها وراسها فالأرض
- طلبتيني امولاي؟...تسمع صوتو الرجولي التقيل مدارش ومدار حتى حركة من غير لسانو لي نطق
- شنو درتو مع ديك الخادم لي جبتو؟
يامنة : والو أسيدي رافضة تاكول ولا تشرب واخا حبسناها وضربناها مدينا منها لا حق لاباطل
السلطان : ماعرفتوش شكون هيا ومنين جابوها معرفتوهاش فين هيا وبلي مخاصهاش تخالف قانون ديال هاد المكان وقانون مولاي سلطان لقمان
يامنة(حادرة راس ومخلوعة من نبرة السلطان) :
- أسيدي خفت نكوليك وتقلق؟😣
لقمان(بزعاف) :
- هضري أيامنة خلاص كتعرفيني مكنبغيش لملاغية بزااف
يامنة : كتكول بلي مكيهمها لا سلطان لا قانون وبلي سيادتكم مكتعرفوهاش هيا شكون وبلي حتى هيا سلطانة خت سلطان
لقمان : شرحي مزيان أيامنة شكون هاد السلطان وشكون هيا واش معارفينش بلي ممنوع بنات ديور لكبار يكونو من أهل هاد الدار
يامنة : أسيدي الحراس هوما لي جابوها مع باقي البنات كتكول بلي سميتها رحمة أخت سلطان يوسف حاكم قرية اولاد بن حدو...دار لقمان بزربة وعلى وجهو دهشة شعرو رطب لي طايح شوية على جبهتو وزغبات من شيب عاطيبنو وقار وحكمة ولحية لخفيفة لمتوسطة وجهو..
لقمان : كيفاش أخت سلطان يوسف؟
يامنة : أه أسيدي هادشي لي كالت
لقمان : بغيتك طلعيها من الحبس وتعطيها بيت مايكونش فيه الغاشي وتأكدي ليا من صحة كلامها واش فعلا سلطانة ولا مخبولة فعقلها وياك تحطي عليها إيديك والى كانت كيف كالت ديك ساع أيكون حديث وكلام أخور دابا سيري
يامنة(راجعة بلور وكتردد) :
- واخا أسيدي أمرك ومايكون غير خاطرك...رجع لقمان عاطي وجهو لزاج كيفكر فكلام يامنة واش يكون كذوب ولا بصح والى كان فعلا كلامها بصح فرحمة مابقى عندها لرجوع ولا خروج من القصر...
#يتبع