كفاك ظلماً

البارت الاول (الجزء الثاني)

-كـــفـاك ظـــلــمــاً
- طيف عامر 🦋
- البارت الأول (ج2)

لكل فعل رد فعل، لسنا مجانين لنتغير فجأة..

دنمشي اني وبكر وفجأة صفنت وسألته... شگد صارله عمر بالحبس؟؟

صفن شويه وبعدها جاوب ... راح يصيرله سنة وخمس اشهر ..

جريت نفس والجو بارد والهوى كلش قوي صار سنة و100 يوم مشايفة!!!!
وتقريبا سنة وكم شهر على انفصاله..

وصلنا يم اسواق قريبه ع بيت باوعلي بكر وكال... راح اجيب للجهال جبس واجي

هزيت راسي وكملت الطريق مشي والسالفة متروح من بالي أبد..

شفت عمتي مدنگه وتمشي وكفت وصحت عليهه ... عمةةة

فزت من مكانها وكالت... يا عثمان بعد عمتك حبيبي شتسوي هنا بهالبرد لا تمرض

جاوبتها بابتسامة ... اجينا اني وبكر علمود العلاج مال مرته

ردت... ملكيت؟؟

جاوبتها... لا لكينه الحمدلله انتِ وين جنتي؟؟

كالت... جنت اشتري اكل خطية زينة جوعانة وهالايام متاكل

سكتت احس اذا احجي افضح روحي اكثر ويطلع حجم اشتياقي..

كالت ... تجي ويايه ناكل؟؟

ابتسمت وجاوبتها... أيي ليش لا

رحنا اني وياها ندردش سوه لحد ما وصلنا يم الباب سلمت على بابا هو رد عليها

ـ هلا بيج حبيبتي دخلي جوه يابعد اخوج

ردت عليه... لا خويه اني رايحة لبيتي تصبح على خير

هز راسه وكال ... هالايام ماكو ليش ما تجين شعجب تعاي يا بعد اخوج اني ما ارتاح الا اشوفج انتِ وبنتج بالبيت..

هزت راسها مأكده كلامها ورحنا اني وياها دخلنا وزينه جانت بالحوش لازمه بيدها الكتاب باوعتلي وبلعت ريكها..

عمتي ندارت عليه وهي تنزع بعبايتها كالت... تعال بعد عمتك فوت قابل انت غريب.

باوعت على زينه ورجعت التفتت عليه وكالت الها... لا تستحين جا هو اخوج عليمن هالخجل سلمي ودخلي

باوعتلي زينه مصدومه واني كذلك اخوة!!! بعد ما كنا مخطوبين صرنه اخوووه؟!!!!

تنهدت بالم كاتم الحزن الي خيم لمسامعي دخلت للاستقبال حتى نفسيتي نسدت من صبو العشى اكلت شويه وتحججت اني ماكل مسبقاً..

رجعت عمتي مغسله ايدها كعدت يمي وزينه تغسل ع سنگ كالت عمتي

متعرف شي عن مرت اخوك؟؟

جاوبتها ... قصدج طليقتة ، هم مطلگين صارلهم سنة ليش متتقبلين الواقع

ردت عليه بزعل... اني عمتك بس مو عمة عمر، اني صديقتة واخته وعمته وكلشي عمران اعرفه من يحب ويتعلق بوحده شلون يضل گلبه معلگ بيهه..