كفاك ظلماً

البارت ١٥(الجزء٢)

رمضان ڪࢪيم

(ڪفاك ظلماً /البارت١٥ /ج٢ /طيف عامر)

........

ما اتاني
المايحبني
بيه شمره
من القطار.

ـ روووح

سمعت صوت طرقة على الباب وصوت امي تنادي
....روح يمه بيج شي
.... لا مابيه
.... تاخرتي
.... هسه أطلع

غسلت بسرعة وطلعت أمي تباوعلي بشفقه أكره هاي النظرة   ..
ردت اروح للغرفة كالت... امشط شعرج..!؟

... لا اني امشط ليش انتِ؟
... حبيت امشطلج شعرج تعاي يمي
... مـا
... لا تعاندين تعاي لامج

جابت المشط من الغرفه الي خاص بيه وليسار واجت يسار كاعد يباوعلي من بعيد
فتحت ايدي ركض يرمي نفسه بحضني

وامي تمشط شعري واني اغمض عيوني من تسحبه احس فروه راسي كلهه تتشلع
خليت ايدي على راسي وصحت
...  على كيفج منا جرح العمليه لا تلجمين جروحي وتهيجي عليه وين اروح ..

رمت المشط ع أرض وصارت تبحث عن المكان وتبعد شعري للطرف الأخر..
حسيت نكشف كدامها اخذت موقف الصمت..

إبني يباوعلهه ويباوعلي حسيت بوسه براسي وصوتها الحنون وهي تنطق
...  تبقين حلوه شما الزمن جار عليج

هزيت راسي وسكتت وشعري يتساقط الخصله باكملهه ويا المشط
تعودت على هالموقف كل يوم هيج يصير وكاني مريضة الكانـشر..

كمت من مكاني لزمت ايد يسار ودخلت للغرفه بردانه من ابرد انام
فرشت الفراش وطفرت ع مخده وفتحت اديدي لابني . 

وتفكيري المعهود رغم تركته يبقى كما هوّ، هسه هم يفكر بيه، كلامة صح من يكول احبج لو بس علمود ارجعله ويوهمني؛؟

زين اذا يحبني بعد مننجمع لأن هو خلاص ابتعد بشكل كلي عني واني ماكدر ارجعله او افكر اكون زوجة اله.. 

هم يجي يوم ويتزوج ويعيش ويا غيري وتحبه وتحله بعينه وهو نسونجي اذا تدلع وتلبس يمكن ينسطر وينساني وينسى حتى اطفاله.

نمت والدموع تنزل صحيح عفته بس ماكدر اتحكم بنفسي
احس بنفسي داموت ع بطئ..

فزيت على يسار يحوس بالفراش فتحت عيوني وهو ضحك وضحكته جبرتني انسى غضبي وابادله الابتسامة..

جنت شبه غافيه بس صحيت من هو كال "مـامـا"  ..

فزيت من مكاني ولزمته من ايده وسحبته لحضني.
... شنو كلت؟ ماما عيدها مره لخ خلي اسمعهه يله حبيبي

سكت بس مبتسم حضنته ودموعي تنزل يا حبيبي وكلشي بالنسبة الي اموت عليك يروحي..

باسني بخدي وكام وعيني وراه سمعت امي تحاجي بيه.
.. تعال اكعد راح اصبلك واجي