It Seems There is Light || ဘာသာပြန် 《Completed》

Chapter 16:ဆေးရုံတက်ခြင်း

ရှစ်အန်းကအလွန်ပေါ့ပါးသည့်တိုင် အမြန်ဆုံးသောအရှိန်ဖြင့်ပြေးရင်း သူ့အားချီထားရသည်က အလွန်ပင်ပန်းသောကိစ္စ ဖြစ်နေဆဲသာ။

ရှစ်အန်းမှာ နာကျင်မှုများပြင်းထန်လွန်းနေသဖြင့် သူ၏ခန္ဓာကိုယ်ကို မကြာခဏဆိုသလိုခွေခေါက်ကာ ကွေးနေရန် ကြိုးစားနေခဲ့ပြီး ပြင်းပြင်းထန်ထန်တုန်ခါသွားတတ်ကာ မငြိမ်မသက်ဖြင့် ရုန်းကန်နေခဲ့လေသည်။

ယန်လျန့်၏ကိုယ်လုံးကိုယ်ပေါက်က သူ့ထက်ပိုကြီးကာ ပို၍လည်း အရပ်ရှည်လေသည်။အစပိုင်း၌ တည်ငြိမ်စွာချီမထားနိုင်ခဲ့သော်လည်း ရှစ်အန်းမှာ သူနှင့်ရွယ်တူ ယောက်ျားလေးတစ်ယောက်ဖြစ်သဖြင့် မကြာခင်၌ အလွန်ပင်ပန်းလာခဲ့တော့သည်။

ယန်လျန့်မှာ အလွန်ကြောက်လန့်နေသဖြင့် သူ့ဦးနှောက်မှာလည်း လုံးဝကိုစဉ်းစားနိုင်ခြင်းမရှိတော့ဘဲ ရှစ်အန်းတုန်ယင်သွားတိုင်း သူ့ဦးနှောက်ကလည်း လိုက်၍တဝီဝီဖြစ်လာ၏။

ကျောင်းမှပြေးထွက်လာချိန်၌ သူကခြေထောက်ကိုမြှောက်ရုံသာ မြှောက်နိုင်တော့ပြီး သူ့လည်ချောင်းမှာလည်း ဖျော့တော့သောသွေးနံနှင့်အတူ တစ်ချက် တစ်ချက် နာကျင်လာခဲ့တော့သည်။

သူ့ခြေထောက်များက အားနည်းလွန်းနေသဖြင့် နေရာ၌ပင် ဒူးထောက်ချလိုက်ချင်သော်လည်း သူကမရပ်ဝံ့ခဲ့ပေ။

အကြောင်းအရင်းမှာ သူ့ကျောပေါ်ရှိလူက အလွန်အမင်းနာကျင်နေပြီး ပိန်ပါးသောခန္ဓာကိုယ်လေးကပင် မရပ်မနားတုန်ယင်နေကာ သူ့လည်ပင်းအားဖက်တွယ်ထားသည့်လက်များက အလွန်အေးစက်နေခဲ့ခြင်းကြောင့်ပင်။

ယန်လျန့်၏ အာရုံများအားလုံးက ဟန့်တားခံထားရပြီး ရှေ့သို့ မည်သို့ပြေးရမလဲဆိုသည်ကိုသာ သိတော့သည်။

ကျောင်းတံခါးမှပြေးထွက်လာပြီးနောက် ရုတ်တရက် ဒယိမ်းဒယိုင် ဖြစ်လာတော့သည်။သူ့ခြေထောက်များက အားနည်းနေခဲ့ပြီးဖြစ်၏။ဤနေရာသို့ခရီးက လေးကန်ထိုင်းမှိုင်းမှုနှင့်အတူ သူ့အားပြိုလဲအောင် ပြုလုပ်နေခဲ့လေသည်။

သူကပင်ပန်းလွန်းနေခဲ့ပြီး သူ့ဒူးများကလည်းအားနည်းနေပြီးဖြစ်ကာ ခဏမျှအနားယူနိုင်စေရန်အတွက် တိုက်ရိုက်ပင် ပြိုလဲကျချင်နေခဲ့တော့သည်။